Pesalome 140

₁Morena, ntamolele go bakgopo,

o mphepiše batho ba šiši.

₂Ke ba ba akanyago tše mpe ka dipelong,

ba ba hlolago diphapano ka mehla.

₃Ba lootša maleme a bona a ba bjalo ka a dinoga;

ka ganong ga bona go tšwa bohloko bja mokopa. Sela

₄Morena, mphahlele bakgopo;

ntamolele go batho ba šiši,

ba ba lakanago go mphereketša.

₅Baikgogomoši ba ntheile ka difu tša dithapo;

ba ntheetše mereo tseleng,

ba ntheile ka melaba. Sela

₆Nna ke botša Morena ke re:

“Ke wena Modimo wa ka.”

Morena, hle, o nkwe ge ke go kgopela.

₇Morena, Mong wa ka,

wena Mohlakodišitia wa ka,

ke wena o ntšhireletšago ntweng.

₈Morena, bakgopo o se ba dumelele tše ba di nyakago;

maanomabeng a bona ba se atlege,

e ka tla ya ba bona bafenyi. Sela

₉A ba boelwe ke bobe bjo ba mpolelago ka bjona.

A ba welwe ke magala,

₁₀ba lahlelwe ka mekoting ya leraga,

moo ba ka se kgonego go tšwa.

₁₁Raleleme o mo hlokiše bodulo nageng ye;

rašiši a a welwe ke mašula ka go latelana.

₁₂Nna ke tseba ge Morena a šetša gore mohlaki le mohloki ba direlwe ka toka.

₁₃Baloki ba tla go tumiša e le ruri;

bahlokabosodi ba tla phela ba na le wena.