Diema tše dingwe tša Solomone
1Tše dingwe diema tša Solomone tše di ngwalolotšwego ke bahlankedi ba Hiskia, kgoši ya Juda, šedi:
2Modimo o hlomphelwa ge a bipa ditaba;
magoši a hlomphelwa ge a bipolla ditaba.
3Tša ka pelong ya kgoši ga di tsebje,
di etša go akalala ga legodimo le boteng bja lefase.
4Hlokolang silibera, makgone a bope se sengwe ka yona.
5Ntšhang yo kgopo ka mošate,
kgoši e tle e buše ka toka.
6Se ithete pele ga kgoši goba wa ipea le ba maemo.
7-8Go kaone ge o ka botšwa gore o ye madulong a ka pele,
go na le gore o kokobetšwe pele ga bakgomana.
O se kitimele kgorong ya tsheko go yo bega se o se bonego;
o tla reng ge hlatse ye nngwe e ka go bontšha gore o fošitše?
9Ge o sekišana le moagišani kgorong,
sephiri sa mongwe sona o se se utolle.
10Ka gore ge a ka tseba a ka go sola,
wa napa wa kgomarelwa ke bogoboga.
11Lentšu le le boletšwego ka nako ye e lebanego
le etša mekgabišo ya diapola tša gauta
tše di tlokilwego sebjaneng sa silibera.
12Go motho wa tsebe go kgalwa ke motho yo bohlale
go etša lengina la gauta goba sekgabišo sa gauta.
13Morongwammotegi o lapološa baromi ba gagwe
go etša lehlwa le le timolago phišo nakong ya ge go bunwa.
14Mokgantšhampho tša molomo o swana le maru
le phefo ye e sa tlišego pula.
15Bopelotelele bo kgona le babuši;
leleme le boleta le fetša manganga.
16Morafadinose o di ja ka tekanyo;
sejagobe se kgonwa ke go hlatša.
17Se etele moagišani kgafetšakgafetša,
ka gore o ka mo tena a ba a go hloya.
18Mpharamongwe o bjalo ka thoka,
goba tšhoša,
goba mosebe wa mantsi.
19Go ikanya sefelele tlalelong
ke go sohla ka ino la go bola,
goba go gata ka leoto la go hlotša.
20Go opelela mojapelo koša ya lethabo
go etša go apola motho kobo mohla go tonya,
goba go tšhaša ntho ka sekanama.
21Ge lenaba la gago le swerwe ke tlala o le fe dijo;
ge le nyorilwe o le fe meetse le nwe.
22Ka mokgwa woo o tla le leša dihlong,
gomme Morena o tla go putsa.
23Lesebo le hlola kgalefo
bjalo ka ge phefo e tšwago ka leboa e hlola pula.
24Go itulela nkhutlwaneng ya tlhaka
go phala go dula le mosadi wa go ngamola hlogo.
25Ditaba tše di thabišago tša go tšwa nagakgole
di etša meetsematonya go yo a nyorilwego.
26Moloki yo a palelwago ke yo kgopo
o swana le sediba se se dubegilego,
goba mothopo wo o hlapetšwego.
27Go ja dinose kudu ga se gwa loka;
go ithatiša batho go feta tekanyo
le gona go bjalo.
28Motho yo a tshelwago ke pelo o kotsing
go swana le motse wo manaba a o kgerešitšego merako.
