NUMERI 35

₁Melaleng ya Moaba, mošola wa Jordane go lebana le Jeriko, Morena a re go Moshe: ₂“Botša Baisraele gore mo nageng ye ba e hweditšego ba fe Balefi metse ye mengwe ye ba ka dulago go yona, le phulo go dikologa metse yeo. ₃Metse yeo e tla ba ya Balefi, mme ba dula go yona. Phulo e tla ba ya dikgomo le diruiwa tšohle tša bona. ₄Naga ya phulo ye e dikologilego metse ye le e filego Balefi e be dimetara tše makgolo a mane le masome a a selelago go tloga morakong wa motse, ₅mme e be ya botelele bja dimetara tše makgolo a senyane le masome a mabedi. Ka mathoko ohle a motse go be le lefelo le le bjalo gore motse o be gare. ₆Le feng Balefi metse ye e selelago ya botšhabelo yeo motho a ka tšhabelago go yona ge a bolaile yo mongwe ka phošo. Godimo ga moo le ba fe le metse ye mengwe ye masome a mane le metšo ye mebedi gotee le phulo ya yona. ₇Metse yohle ya bona ge e kopana e be ye masome a mane le ye seswai. ₈Dikgoro tše di hweditšego naga ye kgolo di swanetše go fa Balefi metse ye mentši go feta tšeo di hweditšego naga ye nnyane.”

₉Morena o laetše Moshe ₁₀gore a botše setšhaba sa Israele a re: “Ge le tshetše noka ya Jordane mme le gorogile nageng ya Kanana, ₁₁le kgethe metse ya botšhabelo yeo motho a ka tšhabelago go yona ge a bolaile yo mongwe ka phošo. ₁₂Moo o tla bolokega go moloko wa kgauswikgauswi wa mohu yo a nyakago go lefeletša yoo a bolailwego, gore yo a rwešwago molato wa go bolaya motho a se ke a bolawa ntle le go sekišwa phatlalatša. ₁₃Le kgethe metse ye e selelago, ₁₄ye meraro ka bohlabela bja Jordane, le ye meraro ka nageng ya Kanana. ₁₅Ye e tla ba metse ya botšhabelo ya Baisraele le bafaladi bao ba dulago le Baisraele lebakanyana fela, goba bao ba duletšego le bona sa ruri. Yo a bolailego yo mongwe a se a ikemišetša a ka tšhabela go wo mongwe wa yona.

_16-18“Fela ge motho a ka bolaya yo mongwe ka sebolai sa tshipi goba sa kota goba ka leswika, o na le molato wa polao, gomme o swanetše go bolawa. ₁₉Moloko wa kgauswikgauswi wa mohu a bolaye mmolai yoo ge a mo hweditše.

₂₀“Ge motho a hloile yo mongwe mme a mmolaya ka go mo kgoromeletša fase, goba ka go mo foša ka se sengwe, ₂₁goba ka go mo tia ka letswele, o na le molato wa polao mme o swanetše go bolawa. Moloko wa kgauswikgauswi a bolaye mmolai yoo ge a mo hweditše.

₂₂“Ge motho a ka tšhoga a bolaile yo mongwe e se ka lehloyo, e ka ba ka go mo kgoromeletša fase, goba ka go mo foša ka se sengwe, ₂₃goba a mo kgatla ka leswika a sa mmone mme a mmolaya e se lenaba la gagwe, a bile a se a ikemišetša go mo gobatša, ₂₄gona setšhaba se ahlole taba ya mmolai le moloko wa mohu yo a nyakago tefeletšo go ya ka ditaelo tšeo. ₂₅Setšhaba se phološe motho yoo a nago le molato wa go bolaya motho go moloko wa mohu, mme se mmoetše motseng wa botšhabelo woo a tšhabetšego go wona. A dule moo go fihlela ge Moprista yo Mogolo wa nako yeo, yo a tloditšwego ka makhura a makgethwa, a ehwa. ₂₆Ge motho yo a nago le molato wa go bolaya motho a ka tloga motseng wa botšhabelo wo a tšhabetšego go wona, ₂₇gomme moloko wa mohu a mo hwetša mme a mmolaya, gona ga a na molato tefeletšong yeo ya polao. ₂₈Motho yo a nago le molato wa go bolaya motho o swanetše go dula motseng wa botšhabelo go fihlela ge Moprista yo Mogolo a ehwa; ka morago ga moo gona a ka gomela gae. ₂₉Melao ye e ama lena le ditlogolo tša lena mo gongwe le mo gongwe mo le ka bego le dula gona.

₃₀“Motho yo a rwešwago molato wa polao a ka bonwa molato gomme a bolawa fela ge dihlatse tše pedi goba go feta fao di hlatsela bjalo; bohlatse bja hlatse e tee ga bja lekana go ka thekga molato wa polao. ₃₁Mmolayi yo a bonwego molato wa polao o swanetše go bolawa. A ka se pheme kotlo ya gagwe ka go lefa ka tšhelete. ₃₂Le se ke la dumelela motho yo a tšhabetšego motseng wa botšhabelo go lefa gore a boele gae pele ga ge Moprista yo Mogolo a ehwa. ₃₃Le se ke la kgotlela naga ye le dulago go yona. Polao e kgotlela naga, gomme ga go ka moo go ka phethagatšwago tiro ya tlhwekišo ya naga yeo motho a bolaetšwego go yona ka gona, ntle le ka lehu la mmolai. ₃₄Le se ke la tšhilafatša naga ye le dulago go yona moo go dulago nna, ka gobane ke nna Morena, gomme ke dula gare ga setšhaba sa Israele.”