NUMERI 25

₁E ile ya re ge Baisraele ba hlomile mešaša Moeding wa Megohlo, banna ba thoma go robala le basadi ba Bamoaba. ₂Basadi bao ba ba laletša go tla didimong tše ba bego ba di direla modimo wa Moaba. Baisraele ba ja dijo tša mohuta woo mme ba khunamela modimo wa seswantšho, ₃Baale wa Peore. Ka go itlemaganya le modimo yoo ba ile ba galefiša Morena, ₄gomme yena a re go Moshe: “Tšea baetapele ka moka ba Israele mme o nkgodiše ka go ba bolaya letšatši le hlabile; ke moo ke tlago tlogela go galefela setšhaba se.” ₅Moshe a re go baetapele: “Yo mongwe le yo mongwe wa lena o swanetše go bolaya monna wa kgoro ya gabo yo a itlemagantšego le Baale wa Peore.”

₆Yo mongwe wa Baisraele a tsenya mosadi wa Momidiane mošašeng wa gagwe Moshe le setšhaba ka moka ba lebeletše mola ba sa lla mojakong wa Tente ya bodulo bja Morena. ₇Ge Finease, morwa wa Eleasara, setlogolo sa moprista Arone, a bona seo, a emelela a tloga go setšhaba. A ya a tšea lerumo, ₈a latela monna yoo le mosadi yoo ka moo mošašeng, mme a ba phuleletša ka babedi ga bona ka lona. Ka tsela ye bolwetši bja leuba bjoo bo bego bo fetša Baisraele bja emišwa, ₉fela bo be bo šetše bo bolaile batho ba dikete tše masome a mabedi le tše nne.

₁₀Morena a re go Moshe: ₁₁“Ka lebaka la seo Finease a se dirilego ga ke sa galefetše setšhaba sa Israele. Ga se a kgotlelela gore modimo wo mongwe ka ntle ga ka a khunamelwe, mme lebaka ke lona leo ge ke se ka ba fediša mola ke sa befetšwe. ₁₂Ka gona, mmotše gore ke dira kgwerano le yena. ₁₃Yena le ditlogolo tša gagwe ba beetšwe sa ruri go ba baprista, ka gobane ga se a kgotlelela gore modimo wo mongwe ka ntle ga ka o khunamelwe, mme ka go realo o boelantše setšhaba le nna.”

₁₄Leina la Moisraele yo a bolailwego le mosadi wa Momidiane e be e le Simri, morwa wa Salu, hlogo ya lapa le lengwe kgorong ya Simeone. ₁₅Leina la mosadi yoo e be e le Kosbi. Tsure, tatagwe, e be e le kgoši ya sehlopha se sengwe sa dikgorwana tša Bamidiane.

₁₆Morena a laela Moshe a re: ₁₇“Hlasela Bamidiane, o ba fediše ₁₈ka lebaka la bobe bjo ba le dirilego bjona ge ba le hlalefetša kua Peore, le ka lebaka la Kosbi yo a bolailwego nako yela ya bolwetši bja leuba gona moo.”