NUMERI 20

₁Ka kgwedi ya mathomo setšhaba ka moka sa Israele sa fihla lešokeng la Tsine, mme sa hloma mešaša Kadeshe. Gona moo Miriamo a hlokafala gomme a bolokwa.

₂Fao go be go se na meetse, ka gona setšhaba sa bokanela Moshe le Arone ₃mme ba omanya Moshe ba re: “Go ka be go bile kaone ge re ka be re ikhwetše pele ga Tente ya Morena gotee le Baisraele ba gaborena. ₄O re tlišeditšeng mo lešokeng le? Gore re tle re hwele mo le diruiwa tša rena? ₅O re ntšheditšeng Egepeta wa re tliša mo nageng ye mpe ye? Ga go mabele, ga go mago, ga go diterebe, ga go digarenate. Go hlokega le wona meetse a go nwa!” ₆Moshe le Arone ba tloga pele ga setšhaba ba ya ba ema mojakong wa Tente. Ba itahlela fase ka difahlego, gomme ba bona seetša se se fahlago sa letago la Morena.

₇Morena a re go Moshe: ₈“Tšea lepara le le lego pele ga Polokelo ya Kgwerano, gomme wena le Arone le kgobokanyeng setšhaba ka moka. Moo pele ga bona ka moka o laele leswika lela, gore le tšwe meetse. Ka tsela ye o tla ntšhetša setšhaba meetse leswikeng, gore bona le diruiwa tša bona ba tle ba nwe.” ₉Moshe a yo tšea lepara lela, bjalo ka ge Morena a laetše.

₁₀Yena le Arone ba kgobokanya setšhaba ka moka pele ga leswika lela, gomme Moshe a re: “Theetšang, lena dinganga tenang! Kgane re le ntšhetše meetse leswikeng le?” ₁₁Ke moo Moshe a emišitšego lepara a itia leswika lela gabedi ka lona, gomme moela wo mogolo wa meetse wa phulega, mme setšhaba le diruiwa ka moka ba nwa.

₁₂Eupša Morena a omanya Moshe le Arone a re: “Ka gobane ga se la dumela go nna la ntlhompha pele ga setšhaba sa Israele ka ge ke le mokgethwa, le ka se ba goroše nageng ye ke ba holofeditšego yona.”

₁₃Se se diregile kua Meriba, moo Baisraele ba ilego ba omanya Morena, moo a ilego a ba laetša gore ke yo mokgethwa.

₁₄Moshe a roma banna ba tloga Kadeshe go ya go kgoši ya Edomo. Bona ba re: “Molaetša wo o tšwa go meloko yeno, Baisraele. O tseba mabothata a re bilego nao, ₁₅ka moo borakgolokhukhu ba rena ba ilego ba ya Egepeta moo re dutšego mengwaga ye mentši. Baegepeta ba tlaišitše borakgolokhukhu ba rena le rena, ₁₆gomme re lletše Morena gore a re thuše. O kwele sello sa rena gomme a roma morongwa yo a re ntšhitšego Egepeta. Bjale re mola Kadeshe, motse wo o lego mollwaneng wa naga ya lena. ₁₇Hle, re dumeleng go putla mo nageng ya lena. Rena le diruiwa tša rena re ka se aroge tsela le gatee, goba ra tsena mašemong a lena, goba dirapeng tša lena tša merara, le gona re ka se nwe meetse didibeng tša lena. Re tla fela re tšere ka tselakgolo ya kgoši go fihlela re etšwa nageng ya lena.”

₁₈Eupša Baedomo ba ba fetola ba re: “Re a gana go le lesa le putla naga ya rena! Ge le ka leka, re tla tšwa ra le hlasela.”

₁₉Baisraele ba re: “Re tla fela re swere tsela ye kgolo, gomme ge re ka nwa meetse a lena, rena goba diruiwa tša rena, re tla a lefela; se re se nyakago ke go iphetela fela.”

₂₀Baedomo ba boeletša ba re: “Re a gana!” Ke moo ba tšwilego ka madira a go tia go yo ba hlasela. ₂₁Ka gobane Baedomo ba ile ba gana go ba lesa ba putla nageng ya bona, Baisraele ba ile ba phamoga ba swara ye nngwe tsela.

₂₂Setšhaba ka moka sa Israele sa tloga Kadeshe gomme sa fihla thabeng ya Hore, ₂₃mollwaneng wa naga ya Edomo. Moo Morena a re go Moshe le Arone: ₂₄“Arone a ka se tsene nageng ye ke e holofeditšego Baisraele; o tlilo hwa, ka gobane lena ka babedi le nyaditše taelo ya ka kua Meriba. ₂₅Tšea Arone le morwa wa gagwe, Eleasara, o namele le bona thaba ya Hore, ₂₆gomme o apole Arone diaparo tša boprista o di apeše Eleasara. Arone o tla hlokafalela moo.” ₂₇Moshe a dira se Morena a mo laetšego sona. Ba namela thaba ya Hore ba lebeletšwe ke setšhaba ka moka, ₂₈gomme Moshe a apola Arone diaparo tša boprista mme a di apeša Eleasara. Gona moo godimo ga thaba Arone a hlokafala, gomme Moshe le Eleasara ba theoga. ₂₉Setšhaba ka moka sa kwa gore Arone o hlokafetše, gomme bohle ba mo ilela matšatši a masome a mararo.