NUMERI 11

₁Setšhaba se ile sa thoma go ngongoregela Morena ka ga mehlako ya bona. Ge Morena a ekwa dingongorego tšeo, a befelwa gomme a romela mollo setšhabeng, wa tšhuma lehlakore le lengwe la mešaša. ₂Setšhaba sa llela Moshe se nyaka thušo; yena a rapela Morena, gomme mollo woo wa tima. ₃Ka gona felo fao gwa rewa leina la Tabera, ka gore moo mollo wa Morena o ile wa tuka gare ga bona.

₄Go be go na le bafaladi ba bangwe ba ba bego ba sepela le Baisraele. Bona ba be ba duma nama kudu, mme Baisraele le bona ba thoma go ngongorega ba re: “Nke nkabe re ka no hwetša namanyana! ₅Kua Egepeta re be re tlwaetše go ja hlapi re sa ntšhe selo. Gopolang maraka ale le magapu le digwere le dieie le dikonofolo tše re bego re di ja! ₆Eupša bjale maatla a rena a ile. Ga re na sa go ja, ge e se ona manna a re a bonago ka mehla a!”

₇Manna a be a swana le dipewana tše nnyane, mmala wa ona e le wa bošweu bja bodipa. _8-9A be a wela mešašeng bošego gotee le phoka. Mosong wa le le latelago setšhaba se be se eya ka gohle se a kgobela, ba a šila lwaleng goba ba a setla ka mosetlo, ba a bediša, ba dira diphaphatha ka ona. Ka ganong a be a le bjalo ka senkgwa se se apeilwego ka makhura a mohlware.

₁₀Moshe a kwa setšhaba se ngongorega, lapa le lengwe le lengwe le eme mojako wa mošaša wa lona. Morena a ba galefela, mme Moshe a hlomoga pelo, ₁₁a re go Morena: “O reng o ntlišetša matshwenyego a, nna, mohlanka wa gago? Ke go selekile ka eng ge o tla ba wa nthweša morwalo wa setšhaba se ka moka? ₁₂Na ke nna ke ba imilego goba ke ba tswetšego, ge o nkgopela gore ke be bjalo ka mofepi, ke ba kuke ka matsogo bjalo ka masea tseleng ya go ya nageng ye o enetšego borakgolokhukhu ba bona wa re o tla ba fa yona? ₁₃Ke tla hwetša kae nama ye e lekanego batho ba ka moka? Ba dula ba ntelela ba nyaka nama. ₁₄Nna ga ke sa kgona ke nnoši go rwala morwalo wo setšhaba se ka moka se nthwešago wona; o a nkimela! ₁₅Ge o ntira ka mokgwa wo gona go kaone o mpolaye; ge o ntebeletše ka botho gona a ke se hlwe ke bona bošula bjo bja ka.”

₁₆Morena a re go Moshe: “Kgobokanya bagolo ba masome a a šupago bao ba tsebjago e le baetapele ba setšhaba, o ba tliše go nna Tenteng ya bodulo bja ka, mme o ba botše gore ba eme moo ka thoko ga gago. ₁₇Ke tla theoga ka bolela le wena fao, gomme ke tla ba abela moya wo ke go filego wona. Ba tla go rwadiša morwalo wa setšhaba se, gomme o ka se hlwe o o šikere o nnoši. ₁₈Botša setšhaba o re: ‘Itlhwekišetšeng la bosasa; le tla ba le nama ye le tlago e ja. Morena o le kwele ge le belaela le re le duma ge le ka hwetša nama, le ge le re le be le ipshina kua Egepeta. Bjale Morena o tla le fa nama la ja. ₁₉Le ka se e je fela letšatši le tee goba a mabedi goba a mahlano goba a lesome, le ge e le a masome a mabedi, ₂₀eupša le tla e ja kgwedi ka moka go fihlela e le tlapela, e bile e le nkgela, e le ka gobane le hlanogetše Morena yo a lego mo gare ga lena, la mo ngongoregela la re nkabe le sa ka la tloga Egepeta.’ ”

₂₁Moshe a re go Morena: “Bahlabani ba ba nago le nna ke ba dikete tše makgolo a a selelago, gomme o re o tla ba fa nama ye e lekanego kgwedi ka moka? ₂₂Ke dikgomo le dihuswane tše kae tše di kago hlabja tša ba lekana? Kgane dihlapi ka moka tša ka lewatleng di ka ba lekana?”

₂₃Morena a mo fetola a re: “Na go na le se se ka mpalelago? Gonabjale o tla bona ge eba seo ke se boletšego se tla phethega goba se ka se phethege!”

₂₄Ke moka Moshe a tšwa, a botša setšhaba se Morena a se boletšego. A kgetha bagolo ba masome a a šupago setšhabeng mme a ba emiša go dikanetša Tente ya bodulo bja Morena. ₂₅Ya ba Morena o theoga ka leru mme o bolela naye. A abela bagolo bao ba masome a a šupago moya wo a o filego Moshe. Ge moya o ba tsena ba thoma go porofeta, fela ba se ke ba tšea nako ye telele.

₂₆Ba babedi ba bagolo bao ba masome a a šupago, Eldade le Medade, ba be ba šetše mešašeng, ba se ba ya Tenteng. Gona moo mešašeng moya wa tla go bona, gomme ba thoma go porofeta. ₂₇Lesogana le lengwe la tla le kitima go botša Moshe la re: “Eldade le Medade ba a porofeta kua mešašeng!”

₂₈Ke moo Joshua, morwa wa Nunu, yo e bilego mohlanka wa Moshe go tloga ge e sa le lesogana, a rilego go Moshe: “Ba homotše, mong wa ka, Moshe!”

₂₉Moshe a mo fetola a re: “Kgane o tshwenyega ka nna? Nke nkabe Morena a efa setšhaba sa gagwe ka moka moya wa gagwe mme a dira gore bohle ba porofete!” ₃₀Ke moka Moshe le bagolo bao ba masome a a šupago ba Baisraele ba boela mešašeng.

₃₁Ka bjako Morena a fokiša phefo ye e ilego ya tliša dikhwiri di etšwa lewatleng. Phefo yeo ya di wetša mešašeng le tikologong ya yona yohle ya go lekana leeto la letšatši, go fihlela di pharelana fase mo e ka bago metara go ya godimo. ₃₂Ka gona setšhaba sa hlwa se swara dikhwiri letšatši leo ka moka le bošego bja gona, le letšatši le le latelago; mang le mang a swara tše di imelago dikilokramo tše sekete, goba go feta. Ba di anega mo gohle mešašeng gore di ome. ₃₃Ya re ba sa khupile nama, le go e hlahuna ba se ba tšwe ba e hlahuna, Morena a ba galefela, a ba otla ka bolwetši bjo bošoro bja leuba. ₃₄Felo fao go ile gwa rewa leina la “Mabitla a go duma”, ka gobane moo ba be ba bolokile batho bao ba ilego ba duma nama.

₃₅Go tloga moo setšhaba sa hudugela Hatserote, moo ba hlomilego mešaša gona.