MARKOSE 3

₁Jesu a buša a tsena ka sinagogeng, ka moo go bego go na le monna wa go repha letsogo. ₂Go be go na le batho ba ba bego ba beile Jesu leihlo gore ba bone ge a ka mo fodiša ka letšatši la Sabatha, gore ba tle ba mmee molato. ₃Jesu a re go monna yoo wa go repha letsogo: “Etla o eme mono pele.” ₄A botšiša batho a re: “Etse ke eng se motho a dumeletšwego go se dira ka letšatši la Sabatha, ke se sebotse goba ke se sebe, ke go phološa motho goba ke go mmolaya?”

Eupša bona ba homola. ₅Jesu a ba gadima a befetšwe, a bile a nyamišitšwe ke go ba le melala ye methata ga bona. A botša monna yola a re: “Otlolla letsogo la gago!” A le otlolla, gomme la fola. ₆Bafarisei ba napa ba tšwa ka sinagogeng, ba lakana le ba sehlopha sa Heroda gore ba tle ba bolaye Jesu.

₇Jesu a tloga le barutiwa ba gagwe a ya letsheng la Galilea, mme batho ba bantši ba mo latela ba etšwa Galilea le Judea ₈le Jerusalema, le seleteng sa Idumea, le ka mošola wa noka ya Jordane, le tikologong ya motse wa Tirose le wa Sidone, ka gobane ba be ba kwele tše a di dirago. ₉Lešaba la batho e be e le le legolo moo Jesu a ilego a ba a laela barutiwa ba gagwe gore ba dule ba mo lokišeditše leselawatle gore lešaba leo le se ke la mo pitlaganya. ₁₀Ka ge a be a fodiša batho ba bantši, bohle ba ba bego ba babja ba ile ba mmokanela gore ba mo kgwathe. ₁₁Le batho ba ba tsenwego ke meoya ye mebe ge ba mmona ba be ba itahlela fase pele ga gagwe, ba goa ba re: “Ke wena Morwa wa Modimo!”

₁₂Jesu a ba kgala kudu gore ba se mo tsebagatše.

₁₃Jesu a rotogela thabeng, a bitša ba a ikgethetšego bona, mme ba tla go yena. ₁₄A bea ba lesome le metšo ye mebedi baapostola gore ba be le yena, le gore a tle a ba rome go yo bega Taba ye Botse ya Modimo, ₁₅le gore ba be le maatla a go leleka bademone.

₁₆Ba lesome le metšo ye mebedi ba a ba beilego baapostola šeba: Simone yo a reilwego la Petrose, ₁₇le Jakobose, morwa wa Sebediose, le Johanese, ngwanabo, bao Jesu a ba reilego leina la Boanergese, ke go re “Boramodumo”, ₁₈le Andrease, le Filipi, le Bartolomeose, le Mateu, le Thomase, le Jakobose, morwa wa Alfeose, le Thadeose, le Simone, Mollelatokologo, ₁₉le Judase Iskariote, yola wa go mo eka.

₂₀Jesu a boela gae, mme lešaba le legolo la tla la kgobokana gape mo yena le barutiwa ba gagwe ba ilego ba ba ba se hwetše nako ya go ja. ₂₁Ba gabo ge ba ekwa tšeo, ba tšwa go yo mo swara, gobane batho ba be ba re o hlakane hlogo.

₂₂Boramangwalo ba bangwe ba go tšwa Jerusalema ba re: “O na le Beeltsebulo!” Ba re: “O leleka bademone ka yena mmuši yoo wa bona!”

₂₃Jesu a ba bitša, a bolela le bona ka diswantšho a re: “Na kgane Sathane a ka kgona go leleka Sathane? ₂₄Mmušo ge o ka ikarola dihlopha tše di lwago seng sa tšona, o ka se kgone go tia. ₂₅Le lapa ge le ka ikarola diripa tše di lwago, le ka se kgone go tia. ₂₆Le yena Sathane ge a ka itsogela maatla a ikarola dihlopha, a ka se kgone go tia, e tla napa ya ba bofelo bja gagwe.

₂₇“Ga go motho yo a ka kgonago go tsena ka ngwakong wa monna wa senatla a thopa thoto ya gagwe a se a mo tlema pele, a kgona a mo thopela.

₂₈“Ruri, ke le botša gore batho ba tla lebalelwa dibe tša bona ka moka le tšohle tše ba ka nyefolago Modimo ka tšona. ₂₉Eupša yo a ka nyefolago Moya wo Mokgethwa a ka se tsoge a lebaletšwe, o tla be a obile molato wo o sa felego.” ₃₀Jesu a realo ka ge batho ba be ba re o na le moya wo mobe.

₃₁MmagoJesu le banababo ba fihla. Ba ema ka ntle, mme ba roma motho go yo ba biletša yena. ₃₂O be a dikaneditšwe ke lešaba, gomme lona la re go yena: “Mmago le bomorwarrago ba ka kua ntle, ba a go nyaka.”

₃₃Jesu a ba fetola a re: “Mma le bomorwarre ke bomang?” ₃₄Bao ba bego ba mo dikaneditše a ba gadima, a re go bona: “Mma le bomorwarre šeba, ₃₅gobane yo a dirago thato ya Modimo ke yena morwarre, ke yena kgaetšedi ya ka, ke yena mma.”