MARKOSE 14

₁Go be go šetše matšatši a mabedi pele ga Monyanya wa Paseka le wa Dinkgwa tše di se nago komelo. Baprista ba bagolo le boramangwalo ba be ba lakane go swara Jesu ka bohwirihwiri, gore ba tle ba mmolaye. ₂Ba re: “E se be ka nako ya monyanya, gore setšhaba se se ke sa tsoša mpherefere.”

₃Jesu o be a le motseng wa Bethania, ka ga Simone, monna yo a bego a kile a swarwa ke bolwetši bja letlalo bja go mo tšhilafatša. Ya re Jesu a sa ja, mosadi yo mongwe a tla a swere sedibelo sa leswika le le bitšwago alapastere se tletše senkgabose se se sego sa tswakwa sa theko ye kgolo sa narete, a fihla a thuba sedibelo sela, mme a tšhela Jesu ka senkgabose seo hlogong. ₄Ba bangwe ba ba bego ba le moo ba selekega, ba botšišana ba re: “O senyetšang senkgabose se? ₅Etse se ka be se rekišitšwe dipapetlana tša silibera tša go feta tše makgolo a mararo, gomme tšhelete yeo ya fiwa badiidi!” Ya ba ba mo sola kudu.

₆Jesu a re: “Mo leseng, le mo tshwenyetšang? Gape o ntiretše se sebotse. ₇Gobane badiidi le na le bona ka mehla, gomme le ka ba thuša nako ye nngwe le ye nngwe ge le rata; eupša nna le ka se be le nna ka mehla. ₈Yena o dirile se a bego a se kgona; o tšhetše mmele wa ka ka senkgabose go o lokišetša poloko le ge nako e sešo ya fihla. ₉Ruri, ke le botša gore gohle lefaseng mo Ebangedi ye e tlago begwa gona, go tla bolelwa le se mosadi yo a se dirilego, e le gore a fele a gopolwa.”

₁₀Yo mongwe wa barutiwa ba Jesu ba lesome le metšo ye mebedi, yo leina la gagwe e bego e le Judase Iskariote, a ya go baprista ba bagolo gore a ba gafele yena. ₁₁Bona ge ba di kwa, ba thaba, mme ba mo holofetša tšhelete. Ke moka Judase a thoma go nyaka nako ye e lebanego ya go gafela Jesu diatleng tša bona.

₁₂Ka letšatši la pele la Monyanya wa Dinkgwa tše di se nago komelo, e lego letšatši leo ka lona go bego go hlabja dikwana tša Paseka, barutiwa ba gagwe ba mmotšiša ba re: “O nyaka gore re yo go lokišetša dijo tša Paseka kae?”

₁₃Ke moka Jesu a roma barutiwa ba gagwe ba babedi, a re go bona: “Eyang motseng, mme le tla gahlanetšwa ke monna yo mongwe a rwele moeta wa meetse. ₁₄Le mo latele go fihla mo a tsenago gona, gomme le botše monglapa leo le re: ‘Moruti o rile re tle re botšiše gore na phapoši yeo yena le barutiwa ba gagwe ba ka jelago Paseka ka go yona e kae.’ ₁₅O tla le laetša phapoši ye kgolo ya ka godimo, ye e lokišeditšwego go jela. Le re lokišetšeng ka go yona.”

₁₆Barutiwa bale ba tloga ba ya motseng, ba fihla ba hwetša go le bjalo ka ge Jesu a be a ba boditše, mme ba lokišetša Paseka.

₁₇E rile ge e le mantšiboa Jesu a tla le barutiwa ba gagwe ba lesome le metšo ye mebedi. ₁₈Ya re ge ba dutše tafoleng ba eja, Jesu a re go bona: “Ruri, ke le botša gore yo mongwe wa lena yo a jago le nna o tlilo nkeka.”

₁₉Barutiwa ba gagwe ba nyama mme ba mmotšiša ka o tee ka o tee ba re: “Kgane o ra nna?”

₂₀Jesu a ba fetola a re: “Ke yo mongwe wa lena ba lesome le metšo ye mebedi, yo a šebago le nna ka thiswaneng. ₂₁Morwamotho go tloga gona o tla tloga, ka ge Mangwalo a Makgethwa a realo; eupša go madimabe yo a ekago Morwamotho! Go ka be go bile kaone ge motho yoo a ka be a se a ka a tswalwa!”

₂₂Ya re ge ba eja, Jesu a tšea senkgwa, a tumiša Modimo, a mo leboga, a se ngwathaganya, a se fa barutiwa ba gagwe a re: “Tšeang le jeng, se ke mmele wa ka.”

₂₃A tšea le senwelo, a leboga Modimo, a ba neela sona, mme ba se nwa bohle ka go šielana. ₂₄Yena a re: “Se ke madi a ka ao a tiišetšago kgwerano ya Modimo, ao a tšhollelwago ba bantši. ₂₅Ruri, ke le botša gore nka se sa nwa beine go fihlela mohla ke enwa ye mpsha legodimong.”

₂₆Ge ba seno opela sefela sa tumišo, ba tšwa ba ya Thabeng ya Mehlware.

₂₇Jesu a re go bona: “Ka moka ga lena bošegong bjo le tla ntšhabela, ka gobane Mangwalo a Makgethwa a re: ‘Ke tla bolaya modiša, gomme dinku tša gagwe tša šwalalana.’ ₂₈Eupša e tla re ge ke tsogile bahung, ka le tlogela pele go ya Galilea.”

₂₉Petrose a re go yena: “Le ge bohle ba ka go tlogela, nna nka se go tlogele.”

₃₀Jesu a re go yena: “Ruri, ke go botša gore lehono, gona bošegong bjo, e tla re mokoko o sešo wa lla la bobedi, wa be o ntatotše gararo.”

₃₁Petrose a boeletša a tiišitše le go feta a re: “Nna nka se tsoge ke go latotše, le ge eba e ka ba gore ke hwe le wena!”

Le barutiwa ba bangwe ka moka ba realo.

₃₂Ka morago Jesu a ya le barutiwa ba gagwe lefelong le lengwe le le bitšwago Getsemane, gomme a re go bona: “Dulang mo, ke sa ya go rapela.” ₃₃A tloga le Petrose le Jakobose le Johanese, mme a thoma go gakanega le go tlalelwa, ₃₄gomme a re go bona: “Ke nyamile la go hwa. Dulang mo le letele.”

₃₅Ke moka a ya pejana, a itahlela fase, a rapela gore, ge go kgonega, a hlakodišwe nakong yeo ya go tlalelwa. ₃₆A rapela a re: “Tate, Tate, wena ga o palelwe ke selo. Hle, tloša senwelo se sa tlaišego mo go nna; fela go se phethege ya ka thato, go upše go phethege ya gago.”

₃₇Ge a boa a hwetša barutiwa bale ba gagwe ba bararo ba robetše. A re go Petrose: “Simone, na o robetše? O šitilwe ke go itiša le nna lebakanyana fela? ₃₈Letelang le rapele, gore le se lekwe. Ge e le maikemišetšo ona le nawo, fela le a palelwa.”

₃₉A boelela a yo rapela, a boeletša ona mantšu ale. ₄₀Ge a boela go barutiwa ba gagwe, a ba hwetša ba ile ka boroko gape, ka gobane ba be ba potuma kudu, ebile ba sa tsebe se ba ka mmotšago sona.

₄₁Ge a boa la boraro, a re go bona: “Na le sa robetše, le a khutša? Ga go sa kgonega, nako e fihlile. Bonang, Morwamotho o gafelwa diatleng tša badiradibe. ₄₂Emang, re sepeleng! Bonang, monna yo a nkekago o šetše a batametše!”

₄₃Jesu a re a sa bolela, Judase, e lego yo mongwe wa barutiwa ba gagwe, a fihla a na le lekoko le legolo le le itlhamilego ka ditšhoša le melamo, le romilwe ke baprista ba bagolo, le boramangwalo, le bagolo ba setšhaba. ₄₄Moeki o be a lakane le lekoko leo, a ba boditše a re: “Monna yo ke tlago mo atla, ke yena, le mo sware, le tloge naye le mo dišitše.”

₄₅Judase ge a fihla a ya go Jesu, mme a re go yena: “Thobela, Moruti!” Gomme a mo atla. ₄₆Ke moka ba swara Jesu ba mo tiiša. ₄₇Yo mongwe wa bao ba bego ba eme moo a khwamola tšhoša ya gagwe, a rema mohlanka wa Moprista yo Mogologolo ka yona, a mo kgaola tsebe. ₄₈Jesu a re go bona: “Le reng le tlile ka ditšhoša le melamo go ntshwara mo nkego ke nna mohlakodi? ₄₉Tšatši le lengwe le le lengwe ke be ke eba le lena ka Tempeleng ke ruta batho, gomme le sa ntshware. Eupša tše di direga gore go phethege Mangwalo a Makgethwa.”

₅₀Ke moka barutiwa ba gagwe bohle ba mo tlogela, ba tšhaba.

₅₁Lesogana le lengwe la mo latela le se la apara selo mmeleng, ge e se lešela. Ya re ge ba re ba a mo swara, ₅₂a tšhaba a hlobotše, a tlogela lešela lela.

₅₃Jesu a išwa go Moprista yo Mogologolo, moo go bego go kgobokane baprista ba bagolo ka moka, le bagolo ba setšhaba ka moka, le boramangwalo ka moka. ₅₄Petrose a ba latela a le kgojana, a ba a yo tsena ka lapeng ga Moprista yo Mogologolo, gomme a fihla a dula fase le baleti a ikomoša mollong. ₅₅Baprista ba bagolo le Kgorokgolo ka moka ba nyaka bohlatse bjo ba ka pharago Jesu ka bjona gore ba tle ba mmolaye, eupša ba bo hloka. ₅₆Dihlatse tše dintši di be di mo phara ka maaka, fela bohlatse bja bona bo sa kwane.

₅₇Ba bangwe ba ema ba mo phara ba re: “Rena re mo kwele a re: ₅₈‘Ke tla kgereša Tempele ye ya go agwa ke batho, ka aga ye nngwe ka matšatši a mararo ye e sego ya agwa ke batho.’ ” ₅₉Fela le bona bao bohlatse bja bona bo be bo sa kwane.

₆₀Moprista yo Mogologolo a emelela a ya ka pele ga bona ka moka, a botšiša Jesu a re: “Na ga o iphetolele? O reng ka se ba go beago molato ka sona?”

₆₁Eupša Jesu a no ikhomolela, a se fetole selo.

Moprista yo Mogologolo a mmotšiša gape a re: “Na ke wena Mesia, Morwa wa Modimo Motumišwa?”

₆₂Jesu a mo fetola a re: “Ee, ke nnaena. Gomme ka moka le tla bona Morwamotho a dutše ka letsogong la go ja la Ramaatlaohle a etla ka maru.”

₆₃Ke moo Moprista yo Mogologolo a gagotšego diaparo tša gagwe a re: “Dihlatse re sa di iša kae? ₆₄Le ikwetše ka bolena ge a nyefola Modimo. Bjale le reng ka yena?”

Bohle ba mo tšwa ba re: “O lebanwe ke lehu!”

₆₅Ba bangwe ba mo tshwela ka mare, ba mo khupetša sefahlego, ba mo itia ka matswele, ba re go yena: “Ka ge o le moprofeta re botše gore o itiilwe ke mang!” Le baleti ba mo faphola ka dintahle.

₆₆E rile ge Petrose a sa dutše ka kua fase ka lapeng gwa tla modiredi yo mongwe wa mosetsana wa Moprista yo Mogologolo. ₆₇Ge a bona Petrose a ikomoša, a mo tomolela mahlo a re: “Le wena o be o na le Jesu wa Nasaretha.”

₆₈Fela Petrose a latola a re: “Tše o di bolelago nna ga ke di tsebe ebile ga ke di kwešiše.” A napa a ya seferong sa lapa. Ya ba mokoko o a lla.

₆₉Modiredi yola ge a bona Petrose moo, a boeletša a botša ba ba emego fao a re: “Yo ke yo mongwe wa bona.” ₇₀Fela Petrose a latola gape.

Ka moragonyana ga fao ba ba emego naye ba buša ba re go yena: “Ka kgonthe o yo mongwe wa bona, gobane le wena o Mogalilea.”

₇₁Ke moka Petrose a thoma go rogana le go ikana a re: “Monna yoo le bolelago ka yena ga ke mo tsebe!”

₇₂Ka yona nako yeo mokoko wa lla la bobedi, gomme Petrose a elelwa sela Jesu a ilego a mmotša sona a re: “Pele mokoko o lla la bobedi o tla be o ntatotše gararo.” A napa a thoma go lla.