MARKOSE 10

₁Jesu a tloga moo a ya nageng ya Judea, a selela ka mošola wa noka ya Jordane. Mašaba a buša a mmokanela, gomme yena a ba ruta ka mo a bego a tlwaetše ka gona.

₂Bafarisei ba bangwe ba tla go yena ba mo leka ba re: “Na monna o dumeletšwe go hlala mosadi wa gagwe?”

₃Jesu a ba fetola ka potšišo a re: “Moshe o le laetšeng?”

₄Bona ba mo fetola ka go re: “Moshe o dumeletše monna gore a ngwale lengwalo la tlhalo, a nape a hlale mosadi wa gagwe.”

₅Jesu a re go bona: “Moshe o le ngwaletše taelo yeo ka lebaka la go ba le melala ye mathata ga lena. ₆Fela mathomong, mola Modimo a hlola dilo, Mangwalo a Makgethwa a re: ‘O bopile batho e le monna le mosadi. ₇Ke ka lebaka leo monna a tlago tlogela tatagwe le mmagwe, a kopana le mosadi wa gagwe, ₈mme bobedi bja bona ya ba mmele o tee.’ Ka gona ga e sa le ba babedi, eupša ke mmele o tee. ₉Ka lebaka leo, ba ba kopantšwego ke Modimo ba se ke ba aroganywa ke motho.”

₁₀Ge ba boetše ka ngwakong, barutiwa ba gagwe ba mmotšiša taba ye. ₁₁Jesu a re go bona: “Monna yo a hlalago mosadi wa gagwe mme a tšea yo mongwe, o phošetša mosadi wa pele ka go otswa. ₁₂Le mosadi yo a hlalago monna wa gagwe mme a tšewa ke yo mongwe, o a otswa.”

₁₃Batho ba bangwe ba tliša bana go Jesu gore a ba bee diatla, eupša barutiwa ba gagwe ba kgalema batho bao. ₁₄Jesu ge a di bona a befelwa, a re go barutiwa ba gagwe: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo. ₁₅Ruri, ke le botša gore yo a sa dumelego go bušwa ke Modimo, a sa etšego ngwana, a ka se tsoge a tsene legodimong.” ₁₆Ke moka a ba gokara, a ba bea diatla, a ba šegofatša.

₁₇Jesu ge a etšwa ka gae a wela tsela gape, monna yo mongwe a mo kitimela, a khunama pele ga gagwe, a mmotšiša a re: “Moruti wa go loka, ke direng gore ke tle ke be le bophelo bjo bo sa felego?”

₁₈Jesu a mo fetola a re: “O reng o mpitša wa go loka? Ga go yo a lokilego ge e se Modimo fela. ₁₉Melao o a e tseba, e re: ‘O se ke wa bolaya; o se ke wa otswa; o se ke wa utswa; o se ke wa bolela bohlatse bja maaka; o se ke wa hlalefetša; o hlomphe tatago le mmago.’ ”

₂₀Yena a mo fetola a re: “Moruti, melao yeo ka moka e sa le ke e phetha go tloga bjaneng bja ka.”

₂₁Jesu a mo tseparela ka mahlo a go bontšha lerato, a re go yena: “O sa hlaelelwa ke se sengwe. Sepela o yo rekiša tšohle tše o nago le tšona, o tšee tšhelete ya gona o e fe badiidi, mme o tla ba le lehumo legodimong. Ka morago ga moo o tle o ntatele.” ₂₂Ge monna yoo a ekwa phetolo yeo a nyama, mme a tloga a hlokofetše, gobane o be a humile kudu.

₂₃Jesu a gaša barutiwa ba gagwe mahlo, a re go bona: “Go bothata bjang gore mohumi a tsene legodimong!”

₂₄Ge a realo barutiwa ba gagwe ba tlabega, fela Jesu a tšwela pele a re: “Bana ba ka, ga se ka bothata go tsena legodimong! ₂₅Ebile go bonolo gore kamela e tsene ka lešobana la nalete, go na le gore mohumi a tsene legodimong.”

₂₆Barutiwa ba gagwe ba tlabega kudu, ba botšišana ba re: “Ge go le bjalo, ke mang yo a ka phologago?”

₂₇Jesu a ba lebelela, a ba fetola a re: “Batho taba ye ga ba e kgone, eupša e sego Modimo, gobane yena o kgona tšohle.”

₂₈Petrose a tla ka tša gagwe a re: “Bona, rena re tlogetše tšohle tše e lego tša rena ra go latela.”

₂₉Jesu a mo fetola a re: “Ruri, ke le botša gore mang le mang yo a tlogetšego legae, goba bomorwarragwe, goba dikgaetšedi tša gagwe, goba tatagwe, goba mmagwe, goba bana ba gagwe, goba mašemo a gagwe ka lebaka la ka le ka lebaka la Taba ye Botse ya mmušo wa Modimo, ₃₀o tla boelwa kudu mehleng yeno. O tla fiwa magae le bomorwarragwe le dikgaetšedi le bommagwe le bana le mašemo ka bontši le go feta, gammogo le matshwenyego, gomme mo mehleng ye e tlago o tla ba le bophelo bjo bo sa felego. ₃₁Eupša ba bantši bao bjale e lego ba maemo e tla ba ba ba se nago maemo, mme ba bantši bao bjale e sego ba maemo ya ba ba maemo.”

₃₂Jesu le barutiwa ba gagwe ba be ba le tseleng ba rotogela Jerusalema, Jesu a ba etile pele. Barutiwa ba gagwe ba be ba tlabegile, le batho ba ba bego ba mo latela ba be ba boifa. Jesu a buša a biletša barutiwa ba gagwe ba lesome le metšo ye mebedi ka thoko, mme a ba botša tše di yago go mo hlagela. ₃₃A re: “Theeletšang mo: Re rotogela Jerusalema, moo Morwamotho a yago go gafelwa go baprista ba bagolo le boramangwalo, bona ba mo ahlolela lehu mme ba mo gafela go baditšhaba. ₃₄Ba tla mo kwera, ba mo tshwela ka mare, ba mo otla ka tshelane, ba mmolaya; eupša ka letšatši la boraro o tla tsoga bahung.”

₃₅Ke ge Jakobose le Johanese, barwa ba Sebediose, ba batamela Jesu ba re go yena: “Moruti, re be re rata ge o ka re direla se re nyakago go go kgopela sona.”

₃₆Jesu a ba botšiša a re: “Le rata ge nka le direlang?”

₃₇Bona ba mo fetola ba re: “Re kgopela gore mohla o buša o le Kgoši o re dumelele go dula le wena – mongwe ka letsogong la gago la go ja, mongwe ka go la nngele.”

₃₈Jesu a ba fetola a re: “Ga le tsebe se le se kgopelago. Kgane le ka kgona go meletša ditlaišo tša go swana le tše ke yogo tlaišwa ka tšona kgauswinyana, le go bolawa ka tsela ye ke swanetšego go bolawa ka yona?”

₃₉Bona ba mo fetola ba re: “Ee, re ka kgona.”

Jesu a re go bona: “Go tlaišwa bjalo ka nna gona le tla tlaišwa, le go bolawa bjalo ka nna le tla bolawa. ₄₀Eupša ge e le go dula ka letsogong la ka la go ja le ka go la nngele ga se taba ye e laolwago ke nna, go lebane bao ba go lokišeditšwego.”

₄₁Ge barutiwa ba bangwe ba lesome ba ekwa taba yeo, ba befelelwa Jakobose le Johanese. ₄₂Ke mo Jesu a ba biditšego ka moka, a re go bona: “Le a tseba gore bao go thwego ke babuši ba ditšhaba tša lefase ba a di gatelela; baetapele ba tšona sa bona ke go di buša ka sehlogo. ₄₃Lena go lena go se ke gwa ba bjalo. Yo a nyakago go ba yo mogolo mo go lena e swanetše go ba mohlanka wa lena. ₄₄Yo a nyakago go ba mohlomphegi mo go lena e swanetše go ba lekgoba la bohle. ₄₅Gobane le Morwamotho ga se a tlela go hlankelwa, eupša o tletše go hlankela batho le go ikgafela go bolawa, gore e be seloba sa ba bantši.”

₄₆Ba fihla motseng wa Jeriko, mme ya re ge Jesu a etšwa motseng woo a na le barutiwa ba gagwe le lešaba le legolo, mokgopedi yo mongwe wa sefofu yo a bitšwago Bartimeose, morwa wa Timeose, a be a dutše ka thoko ga tsela. ₄₇Ge a ekwa gore ke Jesu wa Nasaretha, a goeletša a re: “Jesu, Morwa wa Dafida, ntšhokele!”

₄₈Ba bantši ba mo kgalema, ba re a homole; fela ya ba gona a goeletšago le go feta a re: “Morwa wa Dafida, ntšhokele!”

₄₉Jesu a ema, a re ba mmitše.

Ba mmitša, ba re go yena: “Tia maatla, emelela, o a go bitša.”

₅₀A lahla seaparo sa gagwe, a nanoga, a tla go Jesu.

₅₁Jesu a mmotšiša a re: “O rata gore ke go direle eng?”

Monna yoo wa sefofu a mo fetola a re: “Moruti, ke nyaka gore ke boele ke bone.”

₅₂Jesu a re go yena: “Sepela, tumelo ya gago e go fodišitše.”

A boela a bona le semeetseng, gomme a latela Jesu.