Morena o rweša Baisraele molato
1Theeletšang, Morena o re Baisraele ba obile molato.
Morena, ema o hlagiše taba ya gago pele ga dithaba, mme meboto e kwe tše o di bolelago.
2Lena dithaba, lena metheo ya go ya go ile ya lefase, theeletšang taba ya Morena! Morena o na le taba ye a tšwago setšhaba sa gagwe go yona. O tlilo rweša Baisraele molato.
3Morena o re: “Setšhaba sa ka, na ke le dirile eng? Ke le lapišitše ka eng? Mphetoleng! 4Ke le ntšhitše Egepeta; ke le hlakodišitše bokgobeng; ke romile Moshe le Arone le Miriamo gore ba tle ba le ete pele. 5Setšhaba sa ka, gopolang se Balaka, kgoši ya Moaba, a kilego a ikemišetša go le dira sona, le ka mo Bileamo, morwa wa Beore, a ilego a mo fetola ka gona. Gopolang dilo tše di ilego tša direga mo tseleng ge le tloga mešašeng kua Megohlong le eya Gilgale; ke moo le tlago lemoga tše ke le diretšego tšona gore ke le phološe.”
Se Morena a se nyakago
6Na Morena, Modimo wa godimodimo, nka mo tlišetšang ge ke tlilo mo obamela? Kgane nka mo tlišetša marojana a go mo direla dihlabelo tša go tšhungwa ka moka? 7Na Morena a ka thabišwa ke diketekete tša dikgapa tše nka mo tlišetšago tšona, goba meelaela ya makhura a mohlware? Kgane nka mo direla sehlabelo sa tshwarelo ya dibe ka morwa wa ka wa leitšibolo, ka lefa makgopo a ka ka morwa yo ke mo tswetšego? 8Aowaa, Morena o boditše wena, motho, tše e lego tša go loka. Bjale ke eng se a se nyakago go wena, ge e se gore o dire tše di lokilego, o rate Modimo le batho ka mehla, le gore o phele o ikokobetša go Modimo wa gago?
9Go boifa Morena ke bohlale. O bitša ba motse wa Jerusalema o re: “Theeletšang, lena le kgobokanego mo motseng wo! 10Ka dintlong tša batho ba kgopo go na le mahumo ao ba a ikhweleditšego ona ka bohwirihwiri. Ba šomiša dikelo tša bofora, e lego selo se ke se hloilego. 11Na nka napa ka swarela batho ba ba šomišago dikelo le dikeloboima tša bofora? 12Bahumi ba gabolena ba rata boganka, le gona ka moka ga lena le bompheane ebile le baradia. 13Ka gona ke šetše ke thomile go le otla, gomme ke tla le bolaya ka lebaka la dibe tša lena. 14Le tla ja, fela la se khore – gabotsebotse la no swarwa ke tlala. Tše le di thopilego di ka se lotege. Se sengwe le se sengwe se le se lotilego ke tla se fediša ka ntwa. 15Le tla bjala mabele, eupša la se a bune. Le tla pitla dihlware ka maoto, eupša la se tlole ka makhura a tšona. Le tla hlotla beine, eupša la se e nwe. 16Tšeo di tla le hlagela ka ge le phethile ditaelo tša Omri, la ba la dira tše mpe tše ba ga Ahaba ba bego ba di dira. Le dirile tša maikemišetšo a bona, ka gona motse wa lena ke tla o fetoša marope, le tla kwerwa ke batho, la nyatšwa ke ditšhaba tše dingwe.”
