MATEU 19

₁E rile ge Jesu a feditše go bolela ditaba tšeo, a tloga Galilea a ya nageng ya Judea ka mošola wa noka ya Jordane. ₂Batho ba bantši ba mo latela, gomme a fodiša ba ba babjago mo go bona.

₃Bafarisei ba bangwe ba tla go yena ba mo leka ba re: “Na monna o dumeletšwe go hlala mosadi wa gagwe ka lebaka la tabana ye nngwe le ye nngwe?”

₄Jesu a ba fetola a re: “Na ga se la bala gore mathomong Mmopi ‘o bopile batho e le monna le mosadi,’ bjalo ka ge Mangwalo a Makgethwa a bolela? ₅Gomme a re: ‘Ke ka lebaka leo monna a tlago tlogela tatagwe le mmagwe, a kopana le mosadi wa gagwe, mme bobedi bja bona ya ba mmele o tee.’ ₆Ka gona ga e sa le ba babedi, eupša ke mmele o tee. Ka lebaka leo, se se kopantšwego ke Modimo, motho a se ke a se aroganya.”

₇Bafarisei ba mmotšiša ba re: “Bjale ke ka lebaka lang Moshe a ile a bea molao wa gore monna a fe mosadi wa gagwe lengwalo la tlhalo, gomme a mo hlale?”

₈Jesu a ba fetola a re: “Moshe o le dumeletše go hlala basadi ba lena ka lebaka la bothata bja dipelo tša lena; eupša mathomong go be go se bjalo. ₉Bjale ke le botša gore monna yo a ka hlalago mosadi wa gagwe, e se ka lebaka la bootswa, mme a nyala mosadi yo mongwe, o a otswa.”

₁₀Barutiwa ba gagwe ba re go yena: “Ge eba tša lenyalo la monna le mosadi di bjalo, gona go kaone gore motho a se ke a nyala.”

₁₁Jesu a ba fetola a re: “Taba ye ga e kgonwe ke mang le mang, eupša e kgonwa ke bao Modimo a ba kgontšhitšego yona. ₁₂Go na le batho ba ba ka se kgonego go nyala ka gobane ba lomilwe ke mmutla; ba bangwe ba ka se kgone go nyala ka gobane ba amogilwe ke batho bonna, mme ba bangwe ba ikiletša go nyala ka lebaka la mmušo wa Modimo. Yo a ka kgonago taba ye a a e dire.”

₁₃Batho ba bangwe ba tliša bana go Jesu gore a ba bee diatla a ba rapelele, eupša barutiwa ba gagwe ba kgalema batho bao. ₁₄Jesu a re: “Lesang bana bao ba tle go nna, le se ke la ba thibela, gobane mmušo wa Modimo ke wa ba babjalo.”

₁₅A ba bea diatla, ke moka a tloga fao.

₁₆Monna yo mongwe a tla go Jesu, a mmotšiša a re: “Moruti, ke eng sa go loka se nka se dirago gore ke tle ke be le bophelo bjo bo sa felego?”

₁₇Jesu a mo fetola a re: “O reng o mpotšiša ka sa go loka? Wa go loka ke o tee fela. Ge o nyaka go tlo ba le bophelo bjo bo sa felego, o phethe melao ya Modimo.”

₁₈Monna yoo a mmotšiša a re: “Melao ya gona ke efe?”

Jesu a mo fetola a re: “O se ke wa bolaya; o se ke wa otswa; o se ke wa utswa; o se ke wa bolela bohlatse bja maaka; ₁₉o hlomphe tatago le mmago; o rate ngwaneno bjalo ka ge o ithata.”

₂₀Lesogana lela la mo fetola la re: “Melao yeo ka moka ke e phethile. Bjale ke eng se go sa nyakegago gore ke se dire?”

₂₁Jesu a re go yena: “Ge o nyaka go ba moloki yo a feletšego, sepela o yo rekiša tšohle tše o nago le tšona. O tšee tšhelete ya gona o e fe badiidi, mme o tla ba le lehumo legodimong. Ke moka o tle o ntatele.”

₂₂Ge lesogana le ekwa phetolo yeo, la tloga le nyamile, ka gobane le be le humile kudu.

₂₃Ke mo Jesu a itšego go barutiwa ba gagwe: “Ruri, ke le botša gore mohumi o tla tsena legodimong ka bothata. ₂₄Ke a boeletša ke re: Go bonolo gore kamela e tsene ka lešobana la nalete, go na le gore mohumi a tsene legodimong.”

₂₅Ge barutiwa ba gagwe ba ekwa a realo ba tlabega kudu. Ba mmotšiša ba re: “Ge go le bjalo gona ke mang yo a ka phologago?”

₂₆Jesu a ba lebelela, a ba fetola a re: “Mo go batho taba ye ga e kgonege, eupša go Modimo tšohle di a kgonega.”

₂₇Ke moo Petrose a rilego: “Bona, rena re tlogetše tšohle tše e lego tša rena ra go latela. Bjale re tla boelwa ke eng?”

₂₈Jesu a re go bona: “Ruri, ke le botša gore mohla lefase le mpshafatšwago, ge Morwamotho a dutše setulong sa bogoši sa letago la gagwe, lena balatedi ba ka ba lesome le metšo ye mebedi le tla dula ditulong tša bogoši, la buša ba dikgoro tše lesome le metšo ye mebedi tša Israele. ₂₉Le gona mang le mang yo a tlogetšego lapa la gagwe, goba bomorwarragwe, goba dikgaetšedi tša gagwe, goba tatagwe, goba mmagwe, goba bana ba gagwe, goba mašemo a gagwe ka lebaka la ka, o tla fiwa tše di fetago tšeo kgolekgole, gomme o tla ba le bophelo bjo bo sa felego. ₃₀Eupša ba bantši bao bjale e lego ba maemo e tla ba ba ba se nago maemo, mme ba bantši bao bjale e sego ba maemo e tla ba ba maemo.”