MATEU 11

₁Ge Jesu a fetša go laya barutiwa ba gagwe ba lesome le metšo ye mebedi, a tloga fao gomme a yo ruta batho, a bega molaetša wa gagwe metseng ye mengwe ya selete seo.

₂Ge Johanese Mokolobetši ka kgolegong a ekwa ka tše Kriste a di dirago, a roma barutiwa ba bangwe ba gagwe go yena. ₃Bona ge ba fihla go yena ba mmotšiša ba re: “Na ke wena yo go letetšwego gore o tla tla, goba re letele yo mongwe?”

₄Jesu a ba fetola a re: “Eyang le botše Johanese tše le di kwago le tše le di bonago: ₅difofu bjale di a bona, digole di a sepela, ba ba swerwego ke malwetši a letlalo a go ba tšhilafatša ba a fodišwa ba hlweka, ditholo di a kwa, bahu ba a tsošwa, le badiidi ba begelwa Taba ye Botse ya mmušo wa Modimo. ₆Go lehlogonolo bao ba sa mpelaelego!”

₇Ge barutiwa ba Johanese ba tloga, Jesu a botšiša lešaba mabapi le Johanese a re: “Mola le etšwa motseng le eya lešokeng, le be le yo bonang? Kgane le be le yo bona lehlaka le le tšokotšwago ke phefo? ₈Ke re le be le tšwetše go yo bonang? Afa le be le sa ye go bona monna yo a aparago diaparo tša masethesethe? Gape ba ba aparago diaparo tša masethesethe ba dula ka dintlong tša magoši. ₉Ke re le be le tšwetše go yo bonang? Afa le be le se la yo bona moprofeta? Ruri, ke le botša gore le bone wa go feta le moprofeta. ₁₀Gobane Johanese ke yena yo Mangwalo a Makgethwa a mmolelago a re: ‘Ke roma motseta wa ka a go eta pele a go kgorela tsela.’ ₁₁Ruri, ke le botša gore ga se gwa ka gwa tswalwa motho wa go feta Johanese Mokolobetši. Eupša yo e lego yo monnyane mmušong wa Modimo o a mo feta. ₁₂Go tloga mehleng ya Johanese go fihlela gonabjale mmušo wa Modimo o hlaselwa kudu, gomme barukhuhli ba leka go o thopa. ₁₃Go fihlela ka nako ya Johanese baprofeta ka moka le melao ya Moshe ba be ba bolela ka mmušo wo; ₁₄gomme ge eba le nyaka go dumela se ba bego ba se bolela, molaetša wa bona ke wa go re: Johanese ke yena Eliya yo a bego a tlilo tla. ₁₅Yo a nago le tsebe a a kwe!

₁₆“Batho ba mehleng yeno nka ba swantšha le eng? Ba swana le bana ba ba dutšego mapatlelong a motse ba goelelana ba re: ₁₇‘Re le leleditše dinaka, la se bine! Ra le retela sereto sa mahloko, fela la se lle!’ ₁₈Johanese o be a ikona dijo a bile a sa nwe beine, eupša batho ba re: ‘O na le modemone!’ ₁₉Gwa tla Morwamotho a eja, a bile a enwa, gomme ba re: ‘Bonang motho wa sejagobe, wa go nwa kudu, mogwera wa balekgetho le badiradibekabona!’ Bohlale bja Modimo bjona bo hlatselwa ke tše a di dirilego.”

₂₀Jesu a thoma go kgala badudi ba metse yeo a dirilego mehlolo ye mentši go yona, ka ge ba ile ba se sokologe dibeng tša bona, a re: ₂₁“Go madimabe lena badudi ba Gorasine! Go madimabe lena badudi ba Betsaida! Ge nkabe mehlolo ye e dirilwego go lena e dirilwe Tirose le Sidone, batho ba gona nkabe e le kgale ba apere diaparo tša mogohla, ba itšhetše ka melora go laetša gore ba sokologile! ₂₂Fela ke le botša gore ka Letšatši la Kahlolo Modimo o tla le otla gagolo go feta batho ba Tirose le ba Sidone. ₂₃Ge e le lena badudi ba Kapernaume, kgane le gopola gore le tla rotošetšwa legodimong? Gape sa lena ke go theošetšwa fasefase bodulabahu. Ge nkabe mehlolo ye e dirilwego go lena e dirilwe Sodoma, motse woo o ka be o sa le gona le lehono! ₂₄Fela ke le botša gore ka Letšatši la Kahlolo Modimo o tla le otla gagolo go feta batho ba Sodoma.”

₂₅Ka nako yeo Jesu a re: “Tate, wena Morena wa legodimo le lefase, ke a go reta ka ge o bontšhitše ba go hlalefetšega gabonolo tše o di utetšego ba bohlale le ba go rutega. ₂₆Ee, Tate, ke ka mo o nyakilego gore go be ka gona.

₂₇“Dilo ka moka ke di filwe ke Tate. Ga go yo a tsebago Morwa ge e se Tate; le yo a tsebago Tate ntle le Morwa ga a gona, ge e se yoo Morwa a ratago go mo utollela yena.

₂₈“Etlang go nna bohle ba le lapilego gape le imelwago, gomme ke tla le khutšiša. ₂₉Phelang ka dithuto tša ka, gomme le ithuteng ka nna, ka gobane ke yo botho, ke wa pelo ya boikokobetšo, gomme ke tla le khutšiša. ₃₀Gobane go phetha tše ke le rutago tšona ga go bothata, le mediro ye ke le fago yona go bonolo go e dira.”