LUKASE 12

₁E rile ge batho ba bantšintši ba bothegile ebile ba gatana godimo, Jesu a botša barutiwa ba gagwe pele a re: “Le hlokomele komelo ya Bafarisei, ke ra boikaketši bja bona. ₂Ga go se se bipilwego se se ka se kego sa bipollwa, le sephiri se se ka se kego sa tsebja ga se gona. ₃Ka gona, se le se boletšego sephiring se tla kwagala phatlalatša; le se le se sebetšego motho ka phapošing se tla goeletšwa godimo ga dintlo.”

₄“Bagwera ba ka, ke le botša gore le se ke la boifa bao ba rego go bolaya mmele, gwa se be le se sengwe se ba se kgonago. ₅A ke le botše gore le boife mang: le boife Modimo yo a rego go bolaya motho a ba a ba le maatla a go mo lahlela heleng. Agaa, ke yena yo ke rego le mmoife!

₆“Ga ke re diphorogohlo tše tlhano di rekwa ka disente tše pedi? Fela ga go le e tee ya tšona ye e lebalwago ke Modimo. ₇Ešita le meriri yohle ya lena e badilwe. Ka gona le se ke la boifa; lena le ba bohlokwa go feta diphorogohlo tše dintši.”

₈“Ke le botša gore mang le mang yo a ipegago phatlalatša gore ke wa ka, le nna, Morwamotho, ke tla begela barongwa ba Modimo gore ke wa ka. ₉Eupša yo a ntatolago phatlalatša, le nna, Morwamotho, ke tla mo latola go barongwa ba Modimo.

₁₀“Mang le mang yo a bolelago Morwamotho gampe a ka lebalelwa; eupša yo a nyefolago Moya wo Mokgethwa yena a ka se lebalelwe.

₁₁“Ge ba le iša ka disinagogeng goba go babuši goba balaodi go sekišwa, le se ke la tshwenyega gore le tla iphetolela bjang goba le tla bolelang. ₁₂Gobane tše le swanetšego go di bolela le tla di rutwa ke Moya wo Mokgethwa ka yona nako yeo.”

₁₃Monna yo mongwe mo lešabeng leo a re go yena: “Moruti, nke o botše yo morwarre gore a abelane le nna lefa la rena.”

₁₄Jesu a mo fetola a re: “Warra, etse ke mang yo a mpeilego moahlodi wa go le abaganyetša lefa la lena?” ₁₅Ya ba o laya batho bao ka moka o re: “Le hlokomele, le itote gore le se goketšwe ke megabaru ya mehutahuta; gobane bophelo bja nnete bja motho ga bo laolwe ke thoto ye a nago le yona, le ge a humile bjang goba bjang.”

₁₆Ya ba o ba botša seswantšho o re: “Monna yo mongwe wa mohumi o kile a dika a bolaile mabele ka mašemong a gagwe. ₁₇A bolela ka pelong a re: ‘Ke direng, ka ge ke se na bobeo bja go lekana mabele a ka?’ ₁₈A phetha ka go re: ‘Se ke tlago se dira sese: Ke tla kgereša matlolo a ka, ka aga a magolo a go bolokela mabele a ka ka moka le tše dingwe tše ke nago le tšona. ₁₉Ka napa ka re ka pelong: Ekwa nna! Tše ke nago le tšona ke tše dintši tše di kgobokeleditšwego mengwagangwaga. Bjale ge, a ke iketle, ke je, ke nwe, ke ipshine!’ ₂₀Eupša Modimo a re go yena: ‘Setlaela towe, bjona bošegong bjo o tlile go hwa, gomme tše o di bolokilego tše e tla ba tša mang?’ ”

₂₁Jesu a fetša ka go re: “Agaa, seo ke se se hlagelago bao ba ikgobelelago mahumo, eupša go tša Modimo ba se na selo.”

₂₂Ya ba Jesu o re go barutiwa ba gagwe: “Ke ka lebaka leo ke le botšago gore le se ke la balabala ka dijo le diaparo tše le di hlokago bophelong. ₂₃Bophelo bo bohlokwa go phala dijo, mmele le wona o bohlokwa go phala diaparo. ₂₄Lebelelang magokobu: ga a bjale, ga a bune, ga a na difala goba matlolo, le ge go le bjalo Modimo o a a otla. Bjale ga ke re lena le bohlokwa kudu go feta dinonyana? ₂₅Kgane ke mang mo go lena yo a ka ikokeletšago bophelo ka go bo balabalela? ₂₆Bjale ge tše dinyenyane ka mokgwa wo di le palela, tše dingwe tšona le tshwenyegelang ka tšona? ₂₇Lebelelang ka mo matšoba a naga a melago ka gona: ga a šome, ga a ithokele diaparo. Eupša ke le botša gore le Kgoši Solomone, le ge a be a humile le dinala, o be a sa tšhephe bjalo ka le lengwe la ona. ₂₈Bjale ge ešita le bjang bja naga, bjo bo bago gona lehono, ka moswane bo tsoge bo lahletšwe sebešong, Modimo a bo apeša ka mokgwa wo, na lena a ka nama a se le apeše le go feta, lena ba tumelo ye nnyane?

₂₉“Ka gona le se ke la tshwenyega, la dula le balabala go re le tla ja eng, la nwa eng. ₃₀Tšeo ke tše baditšhaba ka moka ba lefase le ba dulago ba balabala ka tšona. Tate wa lena o a tseba gore le phela ka tšona. ₃₁Lena le šomele mmušo wa Modimo, gomme tše dingwe tšeo Modimo o tla le okeletša ka tšona.”

₃₂“Le se ke la boifa, lena mohlapenyana wa ka, gobane Tate wa lena o thabela go tlo buša le lena mmušong wa gagwe. ₃₃Le rekiše tše le nago le tšona, gomme tšhelete ya gona le e fe bahloki. Lena dikhwama le ipeele tše di sa felego tšhelete, e lego lehumo le le sa fokotšegego legodimong, le le sa batamelwego ke lehodu, le le sa lewego ke ditšhwele. ₃₄Gobane mo go lego lehumo la motho ke mo go bago pelo ya gagwe.”

₃₅“Dulang le itokišitše, le mabone a lena a tuka, ₃₆le etše bahlanka ba ba letetšego mong wa bona gore a boe monyanyeng wa lenyalo. E re ge a fihla a kokota, ba akgofe ba mmulele mojako. ₃₇Go lehlogonolo bahlanka bao mong wa bona a rego ge a boa a ba hwetša ba phafogile. Ruri, ke a le botša, o tla itokiša, a ba dudiša fase, a ba thota ka dijo. ₃₈Ba tla ba lehlogonolo, ge a ka re a etla le ge e le bošegogare goba ka masa a ba hwetša ba phafogile. ₃₉Ruri, ke a le botša, ge monglapa a ka be a ka tseba gore lehodu le tla tla neng, o be a ka se dumelele lapa la gagwe le šwahlelwa. ₄₀Le lena le dule le itokišitše, ka gobane Morwamotho o tla tla ka nako ye le sa mo naganego ka yona.”

₄₁Petrose a mmotšiša a re: “Morena, na e ka ba o botša rena fela ka seswantšho se, goba o botša batho ka moka?”

₄₂Morena a mo fetola a re: “Bjale mohlanka yo a tshepegago, yo bohlale, ke mang? Gape ke yo mong wa gagwe a tlago mmea mohlokomedi wa bahlanka ba gagwe, a ba fa tša bona dijo ka nako ya gona. ₄₃Go lehlogonolo mohlanka yo mong wa gagwe a tlago mo hwetša a dira bjalo ge a boa. ₄₄Ruri, ke le botša gore mong wa gagwe o tla mmea mohlokomedi wa tšohle tše a nago le tšona. ₄₅Fela ge mohlanka yoo a ka re ka pelong: ‘Mong wa ka o diegile go boa,’ gomme a thoma go betha bahlankakayena ba banna le ba basadi, le go dulela go ja le go nwa le go tagwa, ₄₆mong wa gagwe a ka boa ka tšatši le lengwe le a sa mo naganego, le ka nako ye a sa e tsebego. O tla mo kgaola ditho a ba a mo dira se se dirwago ba ba sa botegelego mong wa bona.

₄₇“Mohlanka yo a rego a tseba thato ya mong wa gagwe a se itokišetše go e phetha, o tla otlwa gabohloko. ₄₈Eupša yo e rego a sa tsebe thato ya mong wa gagwe a dira tše di swanelago kotlo, o tla otlwa gannyane. Gape yo mongwe le yo mongwe yo a filwego tše dintši, go yena go tla nyakwa tše dintši; le yo a filwego go hlokomela tše dintšintši, go yena go tla nyakwa tše dintšintši.”

₄₉“Ke tletše go tšhuma lefase ka mollo, gomme nke nkabe mollo wo o šetše o tuka! ₅₀Fela ke sa lebanwe ke go tlaišwa kudu, gomme ke tla no dula ke tshwenyegile ka wona mokgwa wo go fihlela matshwenyego a a feta. ₅₁Na kgane le re ke tlišitše boiketlo lefaseng? Ga go bjalo; nka re ke tlišitše phapano. ₅₂Go tloga bjale ba e lego ba bahlano ka lapeng ba tla dula ba elwa. Ba bararo ba tla dula ba elwa le ba babedi, ba babedi ba elwa le ba bararo. ₅₃Tatagomotho o tla dula a elwa le morwagwe, le morwa wa motho a dula a elwa le tatagwe; mmagomotho o tla dula a elwa le morwediagwe, le morwedi wa motho a dula a elwa le mmagwe; mmatswale wa motho o tla dula a elwa le ngwetši ya gagwe, le ngwetši a dula a elwa le mmatswalagwe.”

₅₄Jesu a tšwela pele a botša lešaba leo a re: “Ge le bona leru le rotoga ka bodikela le akgofa go re pula e tla na, gomme e ne. ₅₅Le ge le ekwa phefo ya ka borwa e foka, le re go tla fiša, gomme go fiše. ₅₆Baikaketši tenang! Le kgonetše go tseba seemo sa boso ka go lebelela lefase le leratadima; bjale le reng le sa kgone go tseba gore mehla yeno e šupang?”

₅₇“Le reng le sa ikgethele ka bolena se se lokilego? ₅₈Ge motho a ka re o go iša kgorong ya tseko, o leke go boelana naye le sa le tseleng. Ge o ka se dire bjalo o tla go iša go moahlodi ka kgang, moahlodi a go gafela maphodisa, maphodisa a go lahlela ka kgolegong. ₅₉Ke go botša gore o ka se tšwe gona o sešo wa lefa tšheletenyana ya mafelelo ya kotlo ya gago.”