LEFITIKOSE 26

₁Morena o rile: “Le se ke la dira medimo ya diswantšho, goba la tsema dihlwadieme, goba dikokwane tša matlapa, goba matlapa a a betlilwego gore le di obamele, ka gobane Modimo wa lena ke nna, Morena. ₂Le keteke menyanya ya sedumedi, gape le hlompheng felo ga ka mo gokgethwa. Ke nna Morena.

₃“Ge le phela go ya ka melao ya ka mme le phetha ditaelo tša ka, ₄ke tla le nešetša pula ka nako ya gona, gore naga e tle e mediše dibjalo, le mehlare e enywe. ₅Le tla be le sa fola mabele ge nako ya go fula diterebe e fihla, mme le tla be le sa fula diterebe ge nako ya go bjala mabele e fihla. Le tla ba le dijo ka bontši, le gona le tla dula le bolokegile nageng ya lena.

₆“Ke tla le fa khutšo nageng ya lena, le gona le tla robala le sa tšhoge motho. Ke tla tloša dibata nageng ya lena, le dintwa di ka se sa ba gona. ₇Le tla hlomara manaba a lena la a fenya ka tšhoša; ₈ba bahlano ba lena ba tla kgona go hlomara ba lekgolo, mme ba lekgolo ba tla kgona go hlomara ba dikete tše lesome ba ba fenya ka tšhoša. ₉Ke tla le šegofatša, ka le fa le bana ba bantši; ke tla botegela kgwerano ye ke e dirilego le lena. ₁₀Le tla be le sa ja tša ngwagola, la ba la di tloša tša šuthela tše mpsha. ₁₁Ke tla dula gare ga lena ka tenteng ya ka ye kgethwa, gomme nka se tsoge ke le hlanogetše. ₁₂Ke tla ba le lena; ke tla ba Modimo wa lena, gomme lena le tla ba setšhaba sa ka. ₁₃Nna, Morena Modimo wa lena, ke le ntšhitše Egepeta gore le se ke la hlwa le le makgoba. Ke fedišitše maatla a bagateledi ba lena, ka le hlakodiša.”

₁₄Morena o rile: “Fela ge le sa ntheetše, le sa phethe ditaelo tša ka, le tla otlwa. ₁₅Ge le gana go phetha melao ya ka, le nyatša ditaelo tša ka gomme le lahla kgwerano ye ke e dirilego le lena, ₁₆ke tla le otla. Ke tla le tlišetša madimabe – bolwetši bja mafahla le bja letadi la go foufatša le go le fokotša la ba la hwa. Le tla bjala dibjalo tša lena, eupša go ka se le hole selo, ka gobane manaba a lena a tla di ja. ₁₇Ke tla le hlanamela la ba la fenywa, gomme la bušwa ke ba ba le hloilego; le tla no tšhaba le ge le sa rakedišwe ke motho.

₁₈“Ge le ka no se ntheeletše le ge ke le dirile tše ka moka, ke tla oketša kotlo ya lena gašupa. ₁₉Ke tla fediša maatla a le ikgodišago ka ona; leratadima le ka se le nešetše pula, ka gona naga ya lena e tla omelela, ya thatafala bjalo ka mphiri. ₂₀Le ge le ka šoma gaboima le ka se holege ka selo, ka gobane naga ya lena e ka se mediše dibjalo, le mehlare e ka se enywe.

₂₁“Ge le ka no fela le nngangabalela mme la se ntheetše, ke tla oketša kotlo ya lena gašupa gape. ₂₂Ke tla le romela dibata tše di tlago bolaya bana ba lena, tša fediša le diruiwa tša lena, gomme tša le fokotša mo ditsela tša lena di tlago wela kgwahlana.

₂₃“Ge le ka morago ga kotlo ye le ka fela le sa ntheetše mme la tšwela pele la ntwantšha, ₂₄gona le nna ke tla le lwantšha mme ka le otla gašupa gabohloko go feta pele. ₂₅Ke tla le tsošetša dintwa go itefeletša ka ge le lahlile kgwerano ya ka le lena, gomme le ge le ka bokana metseng ya lena gore le itote, ke tla le romela bolwetši bja leuba la ba la gapeletšega go ineela go manaba a lena. ₂₆Ke tla le hlokiša dijo mo e lego gore basadi ba lesome ba tla apea dinkgwa ka ontong e tee. Ba tla di ngwathelana, gomme la re go di ja la no fela le sa swerwe ke tlala.

₂₇“Ge le ka morago ga kotlo tšeo le ka no fela le tšwela pele le go se ntheetše mme la ntwantšha, ₂₈gona le nna ke tla le lwantšha ke befetšwe, ka le otla gape gašupa gabohloko le go feta pele. ₂₉Tlala e tla le golela la ba la ja bana ba lena. ₃₀Ke tla phušola dintotoma tše le khunamelago medimo ya diswantšho go tšona, ka kgereša dialetare tša lena tša seorelo, ka lahlela ditopo tša lena godimo ga medimo ya lena ya diswantšho ye e welego. Ke tla le šišingwa, ₃₁ka fetoša metse ya lena marope, ka senya mafelo ao le khunamelago go ona, ka ba ka gana dihlabelo tša lena. ₃₂Ke tla senya naga ya lena mo e lego gore manaba a a tlago dula go yona a tla tšhošwa ke go senyega ga yona. ₃₃Ke tla tliša manaba gore a lwe le lena, ka le šwalalanya le ditšhaba. Naga ya lena e tla fetoga lešoka, le metse ya lena e tla šala e le marope. _34-35Ke gona naga e tlago ba le mengwaga ya go khutša ye le bego le gana go e fa yona; e tla dula e tlogetšwe gomme ya hwetša khutšo ya yona mola lena le le nageng ya manaba a lena.

₃₆“Ke tla dira gore mašaledi a lena ao a lego nageng ya manaba a ona a tšhošwe le ke mogwaša wa matlakala ao a itšeelwago ke phefo, ba tšhabe. Ba tla tšhaba mo nkego ba hlomerwe ntweng, ba wa mola go se lenaba le le ba lelekišago. ₃₇Ba tla thetšana ba sa rakedišwe ke motho, gomme ba ka se be le maatla a go lwa le manaba a lena. ₃₈Ba tla hwa e le mathopša, ba metšwa ke naga ya manaba a bona. ₃₉Mašaledi a lena nageng ya manaba a lena a tla fokotšega a ehwa ka lebaka la sebe sa lena le sa borakgolokhukhu ba lena.

₄₀“Ditlogolo tša lena tšona di tla dumela gore tšona le borakgolokhukhu ba tšona bao ba sa mpotegelego gomme ba ntwantšhago ba dirile dibe, ₄₁mme ba ntira gore ke ba lwantšhe ke be ke ba romele bothopša nageng ya manaba a bona. Mafelelong, ge ditlogolo tša lena tše di ngangabetšego di kokobeditšwe gomme di lefile molato wa bokgopo bja bona, ₄₂ke tla gopola kgwerano ya ka le Jakobo le Isaka le Abrahama, mme ka gopola le naga ya lena. ₄₃Fela pele, batho ba swanetše go tlošwa nageng gore naga e tle e ipshine ka go khutša, mme ba swanetše go lefa molato wa bona ka botlalo wa ge ba ganne melao ya ka mme ba hlaswitše ditaelo tša ka. ₄₄Le ge go le bjalo, ge ba sa le nageng ya manaba a bona, nka se ba tlogelele sa ruri, goba ka ba feleletša sa ruri. Seo se ka fediša kgwerano ya ka le bona, gobane ke nna Morena Modimo wa bona. ₄₅Ke tla mpshafatša kgwerano ye ke e dirilego le borakgolokhukhu ba bona ge ke laetša ditšhaba ka moka maatla a ka ka go ba ntšha Egepeta, gore nna, Morena, ke tle ke be Modimo wa bona.”

₄₆Tše ka moka ke melao le ditaelo tša setšhaba sa Israele tše Morena a di filego Moshe thabeng ya Sinai.