JOSHUA 20

₁Morena o ile a laela Joshua ₂gore a botše setšhaba sa Israele a re: “Kgethang metse ya botšhabelo ye ke laetšego Moshe gore a le botše ka yona. ₃Motho yo a bolailego yo mongwe ka phošo, a ka tšhabela go yona mme a phonyokga motho yo a nyakago go lefeletša mohu yoo. ₄A ka tšhabela go wo mongwe wa metse yeo, a ya kgorong ya motse mme a hlathollela baetapele seo se diregilego. Ka morago ga moo ba mo amogele a tsene motseng, mme ba mo fe moo a kago dula gona. ₅Ge motho yo a nyakago go lefeletša mohu a ka mo latiša go fihla fao, batho ba motse woo ba se ke ba mo gafela yena. Ba mo šireletše ka gobane o bolaile Moisraele wa gabo ka phošo, e se ka lebaka la gore o be a mo hloile. ₆O swanetše go dula moo motseng go fihlela ge a sekišitšwe phatlalatša, le go fihlela ge yo e lego Moprista yo Mogolo ka nako yeo a hwile. Ke gona mmolai yoo a kago boela lapeng la gagwe motseng wa gabo woo a tšhabilego go wona.”

₇Ka gona, ka bodikela bja Jordane ba hlaola Kedeshe kua Galilea, nageng ya dithaba ya Naftali; Shekeme kua nageng ya dithaba ya Efraime, le Kiriate-Arba, ke go re Hebrone, kua nageng ya dithaba ya Juda. ₈Ka mošola wa Jordane, ka bohlabela bja Jeriko, ba ile ba kgetha Betsere molaleng wa lešoka nageng ya Rubene; ba kgetha Ramote kua Gileade, ka nageng ya Gade, le Golane kua Bashane, ka nageng ya Manase. ₉Ye e be e le metse ya botšhabelo ye e kgethetšwego setšhaba ka moka sa Israele le bafaladi ba ba dulago gare ga bona. Yo a bolailego motho ka phošo o be a ka tšhabela go yona gore a se ke a bolawa ke motho yo a nyakago go lefeletša mohu; o be a ka se bolawe ntle le go sekišwa phatlalatša.