JOBO 28

₁“Go na le moo go epšago silibera;

go na le mafelo moo go hlwekišwago gauta.

₂Tshipi e epša mobung,

mphiri wona o hwetšwa ka go tološa borale.

₃Batho ba bonega leswiswi.

Ba putuka matlapa ka maswiswing a masomaso, ka fase ga lefase.

₄Ba epa mekoti ya meepo kgole le mo go dulago batho,

ba lebalwa le ke bafeti ba tsela.

Ke moo ba šomago gona kgole le batho,

ba šikinyega ba lekeletše ka dithapo.

₅Godimo ga lefase go mela tša go lewa,

eupša ka fase ga lona go a biloga,

go swana le ka gare ga mollo.

₆Maswika a lefase a swere magakabje a botala bja leratadima,

a swere le dithorwana tša gauta.

₇Tsela ya go ya meepong ga e tsebje le ke ntšhu,

le pekwa ga se ya ka ya e bona.

₈Ga go sebata se se kilego sa gata moo,

goba tau ye e kilego ya sepela gona.

₉“Batho ba epa maswika a bothatathata,

ba phekgola le dithaba ka medu.

₁₀Ge ba le gare ba phula tsela maswikeng,

ba hwetša magakabje a mehutahuta.

₁₁Mo go rothago meetse ba a go thiba,

gomme se se utegilego ba se tliša nyanyeng.

₁₂Eupša bohlale bo hwetšwa kae?

Tlhaologanyo yona e humanega kae?

₁₃“Ga go tsebje ke motho wa nama;

ga bo hwetšwe lefaseng mo go dulago batho.

₁₄Lewatle le re:

‘Bohlale ga bo na le nna;’

le phamphamadiba e re:

‘Ka gare ga ka bohlale ga bo gona.’

₁₅Ga bo rekwe ka gauta ye e sego ya tswakwa, goba ka silibera.

₁₆Le gauta ye e tšwago Ofire e ka se lekantšhwe le bjona,

ešita le magakabje a bohlokwahlokwa.

₁₇Bo phala gauta le galase ka mohola,

ebile bo ka se rekwe le ka moruswi wa gauta ye e hlwekišitšwego.

₁₈Bohlale bo phala pheta ya thaga,

le legakadima le perela.

₁₉Bo phala legakabje la Etopia ka mohola;

le gauta ye e sego ya tswakwa e ka se lekantšhwe nabjo.

₂₀“Bjale bohlale bo tšwa kae, ge?

Tlhaologanyo yona e humanega kae?

₂₁Ga go sephedi se se kago bona bohlale,

ešita le yona nonyana e ka se bo bone.

₂₂Felo ga tahlego le lehu di re:

‘Rena re di kwa fela ka mabarebare.’

₂₃“Ke Modimo a nnoši yo a tsebago tsela ya go ya go bohlale,

yo a tsebago mo bo hwetšwago gona,

₂₄ka gore yena o bona mellwane ya lefase,

o bona tšohle tša ka fase ga leratadima.

₂₅Mola Modimo a efa phefo maatla,

a beela le lewatle magomo;

₂₆mola a beela pula melao ya go na,

a phulela legadima tsela,

₂₇ke gona a hlodilego bohlale,

a bo lebelela, a bo sekaseka.

₂₈“A botša batho a re:

‘Go boifa Morena ke bjona bohlale;

go tlogela bobe ke yona tlhaologanyo.’ ”