JOBO 10

₁“Ke tennwe ke go phela;

ke tla phula pelo maroba,

ka tšholla sello sa ka, ka ge ke tsota.

₂Ke tla kgopela Modimo ka re:

Hle, o se ntahle,

mpotše se ke go fošeditšego ka sona.

₃Na o bona e le tshwanelo go nkgatelela,

go nyatša se se dirilwego ke wena mong,

wa kgahlwa ke merero ya bakgopo?

₄Kgane mahlo a gago ke mahlo a nama,

o bona dilo bjalo ka batho?

₅Na bophelo bja gago ke bjo bokopana

go etša bja motho?

Na bophelo bja gago bo fela ka pela bjalo ka bja motho?

₆Bjale o reng o hlomere bokgopo bja ka,

o šetše dibe tša ka morago,

₇etšwe o tseba gore molato wona ga ke nawo,

le gore ga go yo a kago ntamolela go wena?

₈“Ke dirilwe ke wena,

wa mpopa ka diatla tša gago,

gomme bjale o a boa o a mpheleletša.

₉Gopola gore o mpopile ka letsopa.

Kgane o nyaka go mphetoša lerole gape?

₁₀A ke re ke wena o ntšholotšego boka lebese,

wa nkgahliša bjalo ka mafsi a makgahla?

₁₁Wa ntshwaraganya ka marapo le mešifa,

wa nkapeša nama le letlalo.

₁₂O dirile gore ke belegwe,

wa fela o nthata,

wa ntlhokomela ka go mpabalela.

₁₃Fela bjale ke a tseba gore ka pelong o be o ntaletše,

o loga maano a go tlo nkweša bohloko.

₁₄O be o ntebeletše gore ke dire sebe,

gore o tle o gane go ntshwarela.

₁₅Ge eba ke na le molato, ga ka le bona;

le ge eba ke se ne molato,

ke šitwa go lebanya mahlo le batho,

ke gobogile, ke tlaišega kudu.

₁₆Ge ke re ke tsoša hlogo,

o ntsoma bjalo ka tau;

o dira le ka dimakatšo gore o nkgobatše.

₁₇O dula o nkhweletša bohlatse bja go ntahla;

o nkgalefela o eya pele,

o fela o ntlhasela leboelela.

₁₈“O reng o ntesitše ke belegwa?

Nke nkabe ke ikhwetše pele ke bonwa.

₁₉Ge nkabe ke hwile ke sa tšo belegwa,

ka bolokwa,

go ka be go swana le ge ke sa ka ba gona.

₂₀A ke re matšatši a ka ga a sa le nene?

Ntlogele ge, ke phuthologe gannyane,

₂₁pele ke ikela nageng ya leswiswi le lesoleso,

moo nka se sa tsogago ke boile,

₂₂nageng ya kgampipi le tlhakantswiki,

moo seetša se swanago le leswiswi.”