JEREMIA 7

_1-3Morena o ile a nthoma lesorong la Tempele leo batho ba Juda ba bego ba tsena ka lona go yo mo khunamela. A mpotša gore ke eme moo gomme ke bege tšeo yena Morena Ramaatlaohle, Modimo wa Israele, a bego a nyaka go ba botša tšona, ke re: “Tlogelang mekgwa le ditiro tša lena, gomme ke tla le lesa la fela le dula mo nageng ye. ₄Lesang go dumela mantšu a bofora ao a hlwago a bolelwa a go re: ‘Re bolokegile! Ye ke Tempele ya Morena, ye ke Tempele ya Morena, ye ke Tempele ya Morena.’ ”

₅Morena o re: “Lahlelang sa ruri mekgwa le ditiro tša lena, le tloge le phedišana ka toka. Lesang go gatelela bafaladi, ₆ditšhiwana le bahlologadi. Tlogelang go bolaya ba ba se nago molato mo nageng ye, le go khunamela medimo ye mengwe, ka gobane seo se tla le tlišetša masetlapelo. ₇Ge le ka dira tše ke le botšago tšona, ke tla le lesa la fela le dutše mo nageng ye le e fetšwego ke borakgolokhukhu ba lena sa ruri.

₈“Bonang, le botile mantšu a bofora ao a ka se le holego ka selo. ₉Le a utswa, le a bolaya, le a otswa, le ena ka maaka, le direla Baale dihlabelo, le khunamela le medimo ye pele le bego le sa e tsebe. ₁₀Le dira tšona dilo tše ke di šišingwago tše, ya ba gona le tlago pele ga ka ka Tempeleng ye ke swanetšego go khunamelwa go yona, la re: ‘Re bolokegile!’ ₁₁Kgane Tempele ye ya ka ke legolo la bahlakodi? Nna tše le di dirago ke di bone. Ke realo, nna, Morena! ₁₂Eyang lefelong la ka kua Shilo, lela pele ke bego ke le kgethile gore ke khunamelwe go lona, gomme le bone se ke se dirilego lefelo leo ka lebaka la bokgopo bja setšhaba sa Israele. ₁₃Le dirile dibe tše ka moka, nna ka bolela le lena leboelela, la se ntheeletše; ka le bitša, la se nkarabe. ₁₄Ka gona seo ke se dirilego Shilo ke tla se dira Tempele ye ya ka ye le e botilego, le lefelo le ke le filego borakgolokhukhu ba lena. ₁₅Ke tla le raka la tloga mahlong a ka bjalo ka ge ke ile ka raka bana ba bolena, setšhaba ka moka sa Israele.”

₁₆Morena a re: “O se ke wa rapelela setšhaba se. O se ke wa ba llela goba wa ba kgopelela selo; o se ke wa ba phophothela go nna, ka gobane nka se go theeletše. ₁₇Kgane ga o bone tše ba di dirago metseng ya Juda le mekgotheng ya Jerusalema? ₁₈Bana ba rwalela dikgong, banna ba gotša mello, gomme basadi ba duba bupi bja go apeela modimo wa mosadi dinkgwana wo ba o bitšago Mohumagadi wa Legodimo. Le gona ba tšhelela medimo ye mengwe dikabelo tša dino gore ba nkgopiše. ₁₉Na gabotse ba kgopiša nna? Aowa, ba a ikgopiša bona beng, mme bona beng ba a ikgoboša. ₂₀Ka gona, nna Morena, Mong wa bohle, ke re ke tla tšhollela pefelo ya ka le kgalefo godimo ga naga ye. Ke tla di tšhollela godimo ga batho le diphoofolo, le godimo ga mehlare ya naga, le dibjalo tša ka mašemong. Kgalefo ya ka e tla lauma ya se tingwe ke motho.

₂₁“Nna, Morena Ramaatlaohle, Modimo wa Israele, ke re le dire dihlabelo tša go tšhungwa ka moka le dihlabelo tše dingwe, mme nama ya dihlabelo tša go tšhungwa ka moka le yona le ka no e ja. ₂₂Borakgolokhukhu ba lena ga se nke ka ba laela selo mabapi le dihlabelo tša go tšhungwa ka moka, goba dihlabelo tša mohuta wo mongwenyana mola ke ba ntšha Egepeta. ₂₃Se ke ba laetšego sona ke go ntheeletša, gore ke tle ke be Modimo wa bona, mme bona e be setšhaba sa ka. Le gona ke ile ka ba botša gore ba phele ka mo ke ba laetšego ka gona, gore ba tle ba atlege. ₂₄Eupša bona ba ile ba se ke ba ntlhwaela tsebe, ba se ke ba ntheeletša. Ba ile ba ngangabala ba itirela tše ba bego ba ikemišeditše tšona ka dipelongmpe tša bona, mme seemo sa bona sa befela pele bakeng sa go kaonafala. ₂₅Go tloga tšatšing lela borakgolokhukhu ba lena ba etšwa Egepeta go fihlela lehono, ke ile ka no fela ke roma bahlanka ba ka, baprofeta, go lena ka matšatši. ₂₆Fela bona ba ile ba se ke ba ntlhwaela tsebe, ba se ke ba ntheeletša. Eupša ba ngangabala go feta borakgolokhukhu ba bona.

₂₇“Ka lebaka leo, o ba botše ditaba tše ka moka, eupša bona ba ka se go theeletše; ge o ba bitša ba ka se arabe. ₂₈O ba botše gore ke bona setšhaba sa go se ntheeletše, nna, Morena Modimo wa bona, setšhaba sa bomaganagokgalwa, sa go se botege. Ebile potego ga go sa bolelwa ka yona”.

₂₉Morena o re:

₃₀“Batho ba Juda ba dirile taba ye ke bonago e le ye mpe. Ba beile medimo ya bona ya diswantšho ya go šišimiša Tempeleng mo ke swanetšego go khunamelwa gona, ba e tšhilafatša. ₃₁Kua moeding wa Hinomo ba bopile ntotoma ye e bitšwago Tofete, gore ba tle ba dire dihlabelo ka barwa le barwedi ba bona mollong. Ga se ba laelwe ke nna go dira taba yeo, le go e nagana ga se nke ke e nagane. ₃₂Ka gona, nako e tla tla mohla ntotoma yeo e ka se sa bitšwago Tofete, le moedi woo o ka se sa bitšwago moedi wa Hinomo, eupša o tla bitšwago Moedi wa Polao. Ba tla boloka batho gona, ka gobane go tla be go se sa na le mo ba kago ba boloka. ₃₃Ditopo tša setšhaba se e tla ba dijo tša manong le dibata, gomme go ka se be le wa go di tšhoša. ₃₄Metseng ya Juda le mekgotheng ya Jerusalema ke tla fediša mekgolokwane ya lethabo le tlhalalo, le ya mekete ya lenyalo, gobane naga ye e tla fetoga leganata.”