Morena o tla otla Baamone
1Mabapi le Baamone Morena o re:
“Kgane Israele ga a sa na bana?
Ga a na mojalefa?
Bjale modimo Milkomo o reng a thopile
naga ya kgoro ya Gade,
mme batho ba wona ba dula metseng ya wona?
2Fela nna, Morena, ke re go tla tla nako
ya gore ke hlabele batho ba motse wa Raba wa Baamone mokgoši wa ntwa,
gomme wona e tla šala e le matoko,
le metsana ya wona e tla šala e tšhumilwe ka mollo.
Ya ba gona Baisraele ba amogago bale ba go ba thopela naga ya bona.
Ke realo, nna, Morena.
3Lena batho ba Heshbone, gololang,
gobane motse wa Ai o thubilwe!
Lena basadi ba Raba, hlabang mokgoši!
Aparang tša go ilela, le lle!
Tlarumang mašakeng a dihuswane!
Milkomo, modimo wa lena,
o tla išwa bothopša gotee le baprista le badiredi ba wona.
4Le reng le ikgantšha ka meeding ya lena ya monono,
bakgelogi tenang?
Etse le botile mahumo a lena, mme le re:
‘Ke mang yo a ka re hulago ona?’
5Nna, Mong wa bohle,
Morena Ramaatlaohle, ke re
ke tla dira gore baagišani bohle ba lena ba le tšhoše.
Le tla šwalalanywa,
mme mongwe le mongwe o tla tšhaba,
a leka go iphološa,
gomme batšhabi ba hloka mokgoboketši.
6“Eupša ka morago ke tla kgoboketša Baamone ba ba lego bothopša.
Ke realo, nna, Morena.”
Morena o tla otla Baedomo
7Mabapi le Baedomo Morena o re:
“Na ga go sa na ba bohlale moo Temane?
Kgane dihlalefi tša bona ga di sa ba eletša?
Na e ka ba bohlale bja bona bo nyameletše?
8Lena batho ba Dedane,
retologang le tšhabe!
Khutang mo go sa fihlwego!
Ke ya go fediša ditlogolo tša Esau,
ka gobane nako ya gore ke ba otle e fihlile.
9Ge bafudi ba diterebe ba ka tsena ka dirapeng tša lena,
na ba ka se tlogele mabudutša?
Mahodu ona ge a ka tla bošego,
na a ka se utswe se a se ratago?
10Eupša nna ke hlakotše ditlogolo tša Esau,
gomme ka fenyekolla le bokhuto bja bona
gore ba se sa kgona go khuta.
Setšhaba sa Edomo se fedišitšwe,
bomorwarragobona le baagišani ba bona ba fedišitšwe – ga ba sa le gona.
11Šadišang ditšhiwana tša gabolena le nna,
gomme ke tla di hlokomela.
Bahlologadi ba gabolena a ba bote nna.
12“Ge ešita le bale ba bego ba se ba swanela go otlwa ba ile ba otlwa, na wena o gopola gore o tla phonyokga kotlo? Le gatee; o swanetše go otlwa! 13Nna, Morena, ke re ke ikanne gore motse wa Botsra o tla fetoga setšhoša, batho ba tla o kwera, e tla ba mašope, ba le kgatlela motswiri. Metse yohle ya kgauswi e tla fetoga matoko go ya go ile.”
14Ke ile ka re:
“Ke amogetše molaetša wa go tšwa go Morena.
O romile motseta gore a tle a botše ditšhaba gore di rape madira,
di itokišetše ntwa,
di hlasele Edomo.
15Edomo, Morena o tla go nyenyefatša gare ga ditšhaba tšohle,
wa nyatšwa ke batho.
16Ga go motho yo a go tšhabago ka mo wena o gopolago ka gona.
O forilwe ke boikgogomošo bja gago,
wena o phelago magageng,
o tsoramego ntlhohlong ya thaba.
Le ge o agile malekelekeng boka ntšhu,
Morena o tla go thenkgolla moo.
O realo, Morena.”
17Morena o re: “Edomo e tla fetoga setšhoša. Mofeti wa tsela o tla gakgamala, a kgotsa masetlapelo ohle a yona. 18Se se ilego sa hlagela Sodoma le Gomora mola yona metse yeo gotee le ya kgauswi le yona e fedišwa, ke sona se se tlago hlagela Edomo mo e lego gore go ka se sa tsoga go phetše motho moo, go ka se sa tsoga go dutše motho. Ke realo, nna, Morena. 19Ke tla ragoga bjalo ka tau ye e tšwago ka sethokgweng sa Jordane e hlasela dihuswane mafulong a kgauswi le moela. Ke tla tla ka leleka Baedomo nageng ya bona. Ke gona moetapele yo ke mo kgethago a tlago buša setšhaba. Ke mang yo a swanago le nna? Ke mang yo a ka ntshekišago? Ke moetapele mang yo a ka lwago le nna? 20Ka gona, theeletšang maano ao ke a logetšego Baedomo le se ke ikemišeditšego go se dira badudi ba motse wa Temane: Le bana ba bona ba tla gogoišwa, gomme setšhaba sohle se tla tšhoga. 21Mohla Edomo e ewa, go tla kwagala modumo wa go rekemiša lefase, gomme mokgoši o tla kwagala le go fihla Lewatleng la Mahlaka. 22Setšhabatsoko se tla tla sa phuthuma Botsra bjalo ka ntšhu ye e phurulotšego diphego. Mohlang woo dioka tša Edomo di tla boifa bjalo ka mosadi ge a belega.”
Morena o tla otla Damaskose
23Mabapi le Damaskose Morena o re:
“Badudi ba Hamate le ba Arpade ba gakanegile ka gobane ba kwele mašula.
Ba tshwenyegile, ga ba na maduledi,
ba etša lewatle le le sa tholego.
24Batho ba Damaskose ba nolegile moko
mme ba itokišetša go hlanola direthe,
ba gakanegile.
Ba swerwe ke tlalelo le dihlabi bjalo ka mosadi ge a belega.
25Motse wola wa go tuma wo o bego o dula o thabile, o ngadilwe.
26Nna, Morena Ramaatlaohle, ke re: Mohlang woo masogana a wona a tla bolaelwa mabaleng a motse,
bahlabani bohle le bona ba tla bolawa.
27Ke tla tšhuma morako wa Damaskose ka mollo,
wa fiša le dibo tša Kgoši Benhadade.”
Go otlwa ga ba kgoro ya Kedara le ba Hatsore
28Mabapi le kgoro ya Kedara le mebušo ya ba Hatsore ye e bego e fentšwe ke Nebukadnesare, kgoši ya Babilonia, Morena o re:
“Eyang le hlaseleng Bakedara,
le fediše ba kgoro yeo ya ka bohlabela!
29Ba thopeleng mešaša, le dihuswane,
le digareteine tša mešaša,
gotee le dithoto tšohle.
Le gape dikamela tša bona,
le ba goelele le re:
‘Le dikaneditšwe ke tše di šiišago!’
30“Lena setšhaba sa Hatsore,
nna, Morena, ke le botša gore le tšhabele kgole,
mme le khute mo go sa fihlwego,
gobane Nebukadnesare,
kgoši ya Babilonia,
o le logetše maanomabe.
31Yaang le hlasele setšhaba sela se sa iketlile,
se sa lotegile.
Motse wa bona ga o ne dikgoro le mapheko,
le gona ba dula ba le noši.
32“Dikamela le bontši bja mehlape ya bona di tla thopša.
Bomokotatlopo ke tla ba šwalalanyetša mathokong ohle,
gomme ka ba tlišetša masetlapelo a go tšwa gohle.
33Hatsore e tla fetošwa segola sa diphukubje,
lešoka la go ya go ile.
Go ka se sa tsoga go phetše motho moo,
go ka se sa tsoga go dutše motho.”
Morena o tla otla Baelamo
34Ge Tsedekia a seno bewa kgoši ya Juda, Morena a bolela le Jeremia ka naga ya Elamo. 35Yena Morena Ramaatlaohle a re:
“Ke tla bolaya boramesebe ka moka
ba ba dirilego gore Elamo e be ye maatla ka mokgwa wo.
36Ke tla tšutliša madimo Elamo a etšwa ka mathoko ohle,
gomme ke tla šwalalanyetša batho ba gona mafelong ohle,
go fihlela go se na setšhaba seo bafaladi ba sona ba sego ba ya go sona.
37Ke tla dira gore batho ba Elamo ba tšhabe manaba a bona ao a ratago go ba bolaya.
Nna, Morena, ke re ke tla tlišetša batho ba Elamo masetlapelo ke galefile,
ka ba romela madira a ba bolaya ka tšhoša go fihlela ke ba feleletša.
38Nna, Morena, ke re ke tla bolaya kgoši ya bona le baetapele,
gomme ka hloma setulo sa ka sa bogoši Elamo.
39Eupša ge nako e fihla Baelamo ba ba lego bothopša ke tla ba kgoboketša.
Ke realo, nna, Morena.”
