JEREMIA 45

₁Ka ngwaga wa bone wa ge Joyakime, morwa wa Josia, e le kgoši ya Juda, Baruke a ngwala tše Jeremia a bego a mo laela tšona ka pukung. Ya ba Jeremia o mmotša a re: ₂“Morena Modimo wa Israele o re: ‘Wena Baruke, ₃o re: Jonna! Morena o nkokeleditše matshwenyego ka manyami. Ke lapišitšwe ke mefegelo ya ka, le khutšo ga ke e hwetše!’

₄“Morena o mpoditše gore ke go botše gore o re yena o hlahlamolla se a se agilego, ebile o tumola se a se bjetšego. Seo o tla se dira mo nageng yohle. ₅Kgane wena o nyaka go swarwa ka mokgwa wo mongwenyana wo mokaone? O se nyake bjalo. Morena o tlišetša batho bohle masetlapelo, eupša wena o tla go phološa lehung kae le kae mo o yago gona. O realo, yena Morena.”