JEREMIA 28

₁Go be go na le moprofeta yo mongwe wa go tšwa Gibeone yo leina la gagwe e bego e le Hanania, morwa wa Asure. Ka wona ngwaga woo, ka kgwedi ya bohlano ya ngwaga wa bone wa ge Tsedekia e le kgoši, o ile a bolela le Jeremia ka Tempeleng ya Morena, a mmotša pele ga baprista le batho ka moka ba ba bego ba le moo ₂gore Morena Ramaatlaohle, Modimo wa Israele, o re: “Ke amogile kgoši ya Babilonia maatla. ₃Pele mengwaga ye mebedi e fela, thoto ka moka ya ka Tempeleng ya ka yeo Kgoši Nebukadnesare a e tšerego mo a e iša Babilonia ke tla be ke e bušitše. ₄Ke tla buša le kgoši ya Juda, Joyakine, morwa wa Joyakime, gotee le mathopša ohle a Juda a a išitšwego Babilone. Ee, ke tla amoga kgoši ya Babilonia maatla. Ke realo, nna, Morena.”

₅Ke moka moprofeta Jeremia a botša moprofeta Hanania pele ga baprista le batho ka moka bao ba bego ba eme ka Tempeleng ya Morena a re: ₆“Nke go ka ba bjalo! A Morena a dire bjalo! A a phethagatše tše o di porofetilego mme a buše thoto ya Tempele ya gagwe, le mathopša ohle a a lego Babilonia a a bušetše mo. ₇Nke o hlwaye tsebe, o kwe tše ke go botšago tšona, wena le batho ka moka. ₈Go tloga mehleng yela ya bogologolo baprofeta ba ba bilego gona pele ga ka le wena ba be ba porofetela dinaga tše dintši le mebušo ye maatla dintwa le masetlapelo le mauba a bolwetši. ₉Moprofeta yo a porofetago boiketlo o lemogwa gore ka nnete ke moprofeta yo a romilwego ke Morena ge fela tše a di porofetilego di hlaga.”

₁₀Ke moo moprofeta Hanania a tšerego joko yela molaleng wa moprofeta Jeremia, a e robaganya, ₁₁gomme a bolela pele ga batho ka moka a re: “Morena o rile joko yeo Kgoši Nebukadnesare wa Babilonia a e rwešitšego ditšhaba tšohle melaleng o tla e roba ka wona mokgwa wo, gomme seo o tla se dira go sešo gwa feta mengwaga ye mebedi.” Ke moka moprofeta Jeremia a tloga.

₁₂Ka moragonyana ga ge moprofeta Hanania a robile joko ye a bego a e tšere molaleng wa moprofeta Jeremia, Morena a laela Jeremia ₁₃gore a yo botša Hanania a re: “Morena o rile ge e le joko ya kota yona o ka no kgona go e roba, eupša yena o tla dira ya tshipi legatong la yona. ₁₄Morena Ramaatlaohle, Modimo wa Israele, o rile o tla rweša ditšhaba tše ka moka joko ya tshipi melaleng, gomme tšona di tla šomela Nebukadnesare, kgoši ya Babilonia. O tla dira gore le diphoofolo tša naga di šomele Nebukadnesare.”

₁₅Ke mo moprofeta Jeremia a boditšego moprofeta Hanania a re: “Theeletša, wena Hanania! Ga se wa rongwa ke Morena, gomme o dira gore batho ba ba dumele maaka. ₁₆Ka gona Morena o re o tla go tloša tšatšing. Ka wona ngwaga wo o tla hwa ka gobane o boditše batho gore ba kgeloge go Morena.”

₁₇Moprofeta Hanania a hwa ka kgwedi ya bošupa ya wona ngwaga woo.