Jeremia o a sekišwa
1-2E rile ge Joyakime, morwa wa Josia, a sa tšo bewa kgoši ya Juda, Morena a re go Jeremia: “Ema ka lapeng la Tempele ya ka o begele batho ba ba tlago go rapela ba etšwa metseng ya Juda tšohle tše ke go laetšego tšona gore o ba botše. O se ke wa tlogela selo. 3Mohlomongwe setšhaba se ka go theeletša gomme sa tlogela mekgwa ya sona ye mebe. Ke mo ke tlago lesa masetlapelo a ke ikemišeditšego go ba otla ka ona ka lebaka la mediro ya bona ye mebe.”
4Morena a mpotša gore ke botše setšhaba ke re: “Nna, Morena, ke rile le ntheeletše le phethe melao ye ke le beetšego yona, 5le šetše tše di boletšwego ke bahlanka ba ka, baprofeta, bao ke bego ke fela ke ba roma go lena. Ga se la phetha tše ba le boditšego tšona. 6Ge le ka no se di phethe, gona Tempele ye ke tla e dira se ke se dirilego Shilo, gomme ditšhaba tšohle tša lefase di tla kgatla motswiri ka leina la motse wo.”
7Baprista le baprofeta le setšhaba ka moka ba ile ba kwa Jeremia ge a bolela ditaba tšeo ka Tempeleng ya Morena, 8gomme ge a fetša go bolela tšohle tše Morena a bego a mo laetše go di botša setšhaba, baprista le baprofeta le setšhaba ka moka ba mo swara ba re: “O swanetše go bolawa! 9Ke go reng ge o bolela ka leina la Morena o re Tempele ye e tla swana le Shilo, le gona motse wo e tla ba mašope, gwa se dule motho go wona?”
Ya ba setšhaba se mmokanela gona moo Tempeleng ya Morena.
10E rile ge baetapele ba Juda ba ekwa se se diregilego, ba rotoga mošate ba ya Tempeleng gomme ba fihla ba dula Lesorong le Lefsa. 11Baprista le baprofeta ba nama ba re go baetapele le go setšhaba ka moka: “Monna yo o lebanwe ke go ahlolelwa lehu, ka gobane o porofetetše motse wo tše mpe. Le mo kwele ka tša lena ditsebe.”
12Ke mo Jeremia a rilego go baetapele ka moka le setšhaba ka moka: “Nna ke romilwe ke Morena gore ke porofete tšohle tše le kwelego ke di bolela ka Tempeleng ye le motseng wo. 13Ka gona, sokologang mekgweng ya lena ye mebe le go tše mpe tše le di dirago, gomme le theeletše Morena Modimo wa lena. Ke mo a tlago lesa masetlapelo ao a le boditšego gore o tla le otla ka ona. 14Ge e le nna, ke diatleng tša lena! Dirang ka nna se le bonago gore se lokile ebile se a swanela. 15Fela le tsebe gore ge le ka mpolaya, lena le badudi ba motse wo le tla be le ikobela molato wa go bolaya monna yo a se nago molato, ka gobane gabotsebotse yo a nthomilego go le botša taba tše ka moka ke Morena.”
16Ke mo baetapele le setšhaba ka moka ba boditšego baprista le baprofeta ba re: “Monna yo o boletše le rena ka leina la Morena Modimo wa rena; ga se a swanela go bolawa.”
17Bagolo ba bangwe ba setšhaba ba ema, ba re go batho ka moka ba ba bego ba kgobokane: 18“Mola Hiskia e le kgoši ya Juda, moprofeta Mika wa Moreshete o kile a botša setšhaba ka moka sa Juda gore Morena Ramaatlaohle o rile:
“ ‘Sione e tla lengwa boka tšhemo,
Jerusalema e tla fetoga mašope,
le thaba ya Tempele e tla ba mmoto wa sethokgwa.’
19“Kgane Kgoši Hiskia le setšhaba ka moka sa Juda ba ile ba bolaya Mika? Na Hiskia ga se a boife Morena, a ithapeletša go yena, mme Morena a lesa masetlapelo ao a bego a ba boditše gore o tla ba otla ka ona? Bjale ge, rena re šetše re ikobela masetlapelo a a šiišago.”
20Go be go na le yo mongwe monna ba re ke Uria, morwa wa Shemaya, wa go tšwa Kiriate-Jearime, yo a bego a porofetela motse wo le naga ye tše mpe ka leina la Morena tša go swana le tše di bego di porofetwa ke Jeremia. 21Ge Kgoši Joyakime le madira a gagwe le bakgomana bohle ba ekwa tše Uria a di boletšego, kgoši a nyaka go bolaya Uria. Eupša Uria a re go kwa a tšhoga, gomme a tšhabela Egepeta. 22Kgoši Joyakime a roma Elnathane, morwa wa Akboro, le banna ba bangwe Egepeta ba go mo felesetša. 23Ba fihla ba swara Uria gona kua Egepeta, ba mo tliša go Kgoši Joyakime. Yena a laela gore a bolawe ka tšhoša, mme setopo sa gagwe se lahlelwe ka mabitleng a go bolokela bathofela.
24Eupša Jeremia o ile a se gafelwe setšhaba gore se mmolaye, ka gobane Ahikamo, morwa wa Shafane, o be a ema le yena.
