JESAYA 7

₁Mehleng ya ge Kgoši Ahase, morwa wa Jotamo le setlogolo sa Usia, a buša naga ya Juda, go ile gwa tsoga ntwa. Retsine, kgoši ya Siria, gotee le Pekage, morwa wa Remalia, kgoši ya Israele, ba ile ba hlasela motse wa Jerusalema, fela ba palelwa ke go o thopa.

₂Ge kgoši ya Juda a ekwa gore madira a Siria a šetše a le ka nageng ya Israele, yena le setšhaba sa gagwe ba tšhoga kudu ba ba ba thothomela bjalo ka mehlare e tšokotšwa ke phefo sethokgweng.

₃Morena a re go Jesaya: “Tšea morwago, Sheare-Jashube, o yo gahlanetša Kgoši Ahase. O tla gahlana le yena tseleng ye e bapetšego le tšhemo ya mohlatswi wa mašela, mafelelong a mokero wo o tlišago meetse a a tšwago letshaneng la ka godimo. ₄O mmotše gore a phafoge, a thekge ditho, a se ke a boifa goba a nolega moko ka lebaka la kgalefo ya Kgoši Retsine le Basiria ba gagwe, le ya Pekage, morwanyana yola wa Remalia. Ba swana le dirumola tše pedi tše di thunyago muši. ₅Basiria le setšhaba sa Israele gotee le kgošinyana yela ya sona, Pekage, ba go lakane. ₆Ba nyaka go hlasela Juda gore ba e fenye, ba arolelane naga, gomme ba bee morwa wa Tabeale kgoši.

₇“Eupša nna, Morena, ke re seo se ka se tsoge se diregile, ₈ka lebaka la gore maatlana a Siria a lekana le a Damaskose, mošate wa yona, gomme le ona maatlana a Damaskose a lekana le a Retsine, kgoši ya Siria. Ge e le Israele yona, mengwageng ye masome a a selelago a metšo ye mehlano e tla ba e pšhatlagane, e se sa le setšhaba. ₉Maatlana a Israele a lekana le a Samaria, mošate wa yona, gomme le ona maatlana a Samaria a lekana le a Pekage, kgošinyana yela ya Israele.

“Ge le sa kgolwe, le ka se kgotlelele.”

₁₀Morena a buša a laela Jesaya gore a botše Ahase gape a re: ₁₁“Kgopela Morena Modimo wa gago gore a go fe sešupo. E ka ba sa go tšwa fase bodulabahu, goba sa go tšwa godimodimo.”

₁₂Ahase a mo fetola a re: “Nka se kgopele sešupo; nka se leke Morena.”

₁₃Ge a realo Jesaya a mo fetola a re: “Bjale ge, theeletša, wena setlogolo sa Kgoši Dafida. A ga wa kgotsofala ge o tena batho – kgane o rata go tena le Modimo? ₁₄Gona Morena, Mong wa bohle, o tla go fa sešupo ka boyena: Kgarebe e imile gomme e tla belega morwa ya mo thea leina la Imanuele. ₁₅Ge a šetše a godile, a tseba go gana bobe le go kgetha botse, o tla ja lebebe le dinose. ₁₆Le pele ga moo dinaga tša magoši a mabedi ao a le tšhošago kudu di tla be di tlogetšwe ke batho ba tšona.

₁₇“Morena o tlilo tlišetša wena le setšhaba sa gago le lapa lohle la mošate mehla ye mebe ye le sego la ka la e bona go tloga mola mmušo wa Israele o aroganago le wa Juda – o tlilo le tlišetša kgoši ya Asiria.

₁₈“Mehleng yeo Morena o tla bitša Baegepeta ka molodi gore ba tle bjalo ka dintšhi ba etšwa mathomong a dinokana tša Naele, le Baasiria gore ba tle bjalo ka dinose ba etšwa nageng ya bona. ₁₉Ka moka ba tla bokana ka melapong le ka dimphatšeng tša maswika le mehlašaneng yohle ya meetlwa le mafulong ka moka.

₂₀“Mehleng yeo Morena o tla le boola dihlogo ka legare le a tlago le adima kua mošola wa noka ya Yufratese. Legare leo ke kgoši ya Asiria.

₂₁“Mehleng yeo motho yo a kgonnego go šala le lethole le tee le dihuswane tše pedi fela, ₂₂di tla šiša mo e lego gore o tla ja lebebe. Le bohle ba e lego mašaledi nageng ba tla ja lebebe le dinose.

₂₃“Mehleng yeo serapa se sengwe le se sengwe sa merara ye sekete, se se ka rekwago ka dipapetlana tše sekete tša silibera, se tla mela mehlašana ya meetlwa le mabjang. ₂₄Batho ba tla yo tsoma gona ka mesebe. Ee, naga yohle e tla tlala mehlašana ya meetlwa. ₂₅Meboto yohle yeo batho ba bego ba lema go yona ka megoma ya diatla e tla tlala meetlwa le mabjang mo e lego gore motho a ka se ye gona. E tla ba mafulo a dikgomo, gomme dinku tša gatakela felo fao.”