JESAYA 64

₁Nke nkabe o pharola legodimo wa theoga! Ke mo dithaba di bego di tla šikinyega ge o batamela. ₂Etla ka pela bjalo ka mollo ge o fiša mašašana, o tle ka maatla boka mollo ge o bediša meetse. Etla o utolle maatla a gago manabeng a gago, gore ditšhaba di thothomele pele ga gago! ₃Go kile gwa ba le nako mola o etla o dira dilo tše di šiišago tše re bego re se ra di letela; dithaba di be di šikinyega pele ga gago. ₄Ga go yo a kilego a bona goba a kwa ka Modimo wa go swana le wena, wa go direla ba ba mo holofelago mediro ye mebjale. ₅O loketše bao ba kgahlwago ke go dira tše di lokilego, ba ba go gopolago ge ba bona tše o di dirago. O be o re galefetše, eupša rena ra no fela re dira dibe; le ge go le bjalo o be o re phološa ka mehla. ₆Ka lebaka la dibe tša rena, bohle re swana le motho yo a tšhilafetšego; ešita le tšona ditiro tša rena tše dibotsebotse ke makgapa bjalo ka diaparo tše di tšhilafetšego. Ka lebaka la dibe tša rena re swana le matlakala a a omeletšego; makgopo a rena a re budula bjalo ka phefo. ₇Ga go yo a go rapelago; ga go yo a fišegelago go tla go wena gore o mo thuše. O iphihletše rena gomme wa re gafela makgopong a rena.

₈Eupša o Tatagorena, Morena. Rena re swana le letsopa, gomme wena o swana le mmopi. O re bopile, ₉ka fao o se ke wa re galefela kudu, goba wa gopola dibe tša rena go ya go ile. Nke o bone, ka moka ga rena re setšhaba sa gago. ₁₀Metse ya gago ye mekgethwa nke ke lešoka; Jerusalema le thaba ya Sione ke marope a a tlogetšwego, ₁₁le Tempele ya rena, lona lefelo lela le lekgethwa le lebotse, mola borakgolokhukhu ba rena ba bego ba go reta gona, e fišitšwe ka mollo. Meago ka moka yela re bego re e rata ke marope. ₁₂Aowii, Morena, na o ka fela o phuthile matsogo dilo di le ka mokgwa wo, wa dio lebelela ka mahlo, wa re tlaiša go feta tekanyo?