JESAYA 59

₁Le se gopole gore Morena ga a ne maatla a go kgona go le thuša, goba o thibane ditsebe mo e lego gore a ka se kwe dillo tša lena! ₂Taba ke gore molato wa lena o le aroganya le Modimo, gomme ke ka lebaka la dibe tša lena ge a sa le kwe. ₃Diatla tša lena di thankgetše madi, le dira tše mpe fela. Le bolela maaka, le sebelana tša bokgopo.

₄Le sekišana melato kgorong ya tsheko ka ntle le toka; le ge le phophotha le bolela maaka. Le tshephile boradia le bohwirihwiri gore le tšwelele melatong ya lena. Le loga maanomabe a go tsenya ba bangwe mathateng, mme la ba dira tše mpe. _5-6Maanomabe a lena a bjalo ka letata, a ne kotsi go swana le mokopa. Yo a ka jago mae a wona o tla hwa. Ge motho a ka gata lee la wona go tla tšwa mokopana! Eupša maanomabe ao a lena a ka se le hole ka selo, a swana le seaparo se se logilwego ka letata la segokgo. Seaparo seo motho a ka se se apare. Mediro ya lena ke ye mebe mme le tlwaetše go dira tše šoro. ₇Le dula le gopola go dira tše mpe mme le fišegela go di dira. Ge le nyaka go bolaya motho yo a se nego molato ga le be le pelopedi. Gohle mo le fihlago gona le a lobiša la senya, ₈gomme mo le lego gona ga go motho yo a iketlago. Ga le ke le phetha melao; le tšea ka tsela ya baradia, gomme mang le mang yo a radiago batho o dula a foa.

₉Setšhaba se re: “Bjale re a tseba gore lebaka ke eng ge Modimo a sa re phološe go bao ba re gatelelago. Re letetše gore go se, eupša e sa no ba bošego; re holofetše gore re tla sepela seeding, eupša ke leswiswi fela. ₁₀Re phophola le leboto bjalo ka difofu, re etša batho ba ba se nago difahlego. Re kgopša mosegare wo monana mo nkego ke bošego; bjalo ka ge nke re šetše re le leswiswing la bodulabahu. ₁₁Bohle re bokolela bjalo ka dibere, re lla bjalo ka maeba re nyamile. Re letetše gore Modimo a re hlakodiše, eupša ga go nko ye e tšwago lemina; re holofetše gore o tla re phološa, fela ga go direge selo.

₁₂“Morena, melato ye re go šitetšego ka yona ke ye e sa balwego. Dibe tša rena di a re tšwa. Makgopo a rena ohle re a tseba gabotse: ₁₃Re go tsogetše maatla, ra go latola, ra tšea ka tsela e šele. Re be re gateletše batho mme re go furaletše. Megopolo ya rena ga se yona; dipolelo tša rena ke maaka. ₁₄Re gana toka mme le tshwanelo ga re e amogele, le kgorong ya mošate nnete e a šarakantšhwa, se se lokilego ga se gona. ₁₅Therešo e a hlokega, gomme yo a tlogelago go dira tše kgopo o swarwa gampe.”

Morena o bone dilo tšeo gomme o selekilwe ke go hloka toka ga setšhaba. ₁₆O tlabilwe ke ge a bona go se yo a ka thušago bagatelelwa. Ka gona yena ka noši o tla ba hlakodiša. ₁₇O tla apara toka ya ba seaparo sa boitšhireletšo, le phološo ya ba mongatse wa tshipi. O tla apara phišegelo ya go lefeletša setšhaba sa gagwe. ₁₈O tla tukela manaba a gagwe bogale, a ba otlela tše ba di dirilego, ešita le ba ba dulago mabopong a kgole. ₁₉Go tloga bohlabatšatši go iša bodikela batho ba tla mmoifa, ba boifa le bogoši bja gagwe. O tla tla bjalo ka lefula la meetse le le gapšago ke ledimo.

₂₀Morena o re go setšhaba sa gagwe: “Ke tla tla Jerusalema go tlo le phološa, lena ditlogolo tša Jakobo tšeo di sokologilego dibeng tša tšona. ₂₁Le gona ke dira kgwerano le lena; yona še: Ke le file moya wa ka le dithuto tša ka go ya go ile, gomme go tloga bjale le swanetše go ntheeletša le go ruta bana ba lena le ditlogolo tša lena gore ba ntheeletše le ka moso.”