JESAYA 47

“Wena Babilone,

theoga setulong sa gago sa bogoši o dule fase leroleng.

O kile wa ba bjalo ka kgarebe,

wa ba motse wo o sa kago wa senywa,

eupša bjale ga o sa le yo boletiana,

ga o sa le seithati.

₂Tšea tšhilo o šile bupi!

Khupolla lešira,

o apole le diaparo tša gago tša botšhepi!

Gara dithetho tša gago o tshele dinoka!

₃O tla hlobolwa, wa bonelwa ke batho.

Ke tla itefeletša, gomme ka se thibelwe ke motho.”

₄Modimo yo mokgethwa wa Israele o a re phološa,

leina la gagwe ke Morena Ramaatlaohle.

“Dula fase o ikhomolele,

o ye leswiswing;

o ka se sa bitšwa mohumagadi wa ditšhaba!

₆Ke be ke galefetše setšhaba sa ka;

ke se swere bjalo ka ge e ka ga e sa le sa ka;

ka se gafela diatleng tša gago,

gomme wa se se šokele;

le batšofadi wa ba swara gampempe.

₇O be o gopola gore o tla ba mohumagadi go ya go ile,

gomme o sa šetše ditaba tše,

o sa gopodišiše ka moo di tlago felela ka gona.

₈“Theeletša, wena mmalethabo,

o dulago o lotegile.

O gopola gore ke wena Modimo,

gomme ga go yo a swanago nago.

O be o hloma e ka o ka se tsoge o bile mohlologadi,

goba o lobile bana ba gago.

₉Eupša dilo tše ka dipedi di tla go hlagela ka bogale ka ponyo ya leihlo,

ka letšatši le tee.

Le ge o ka šomiša dipheko tša mehutahuta le meupo ye bogale,

o tla no hlokofalelwa ke monna le bana.

₁₀“O be o tshephile bobe bja gago,

bohlale le tsebo ya gago di go lahleditše,

wa iphora wa re:

‘Ke nna Modimo,

ga go yo a swanago le nna.’

₁₁Fela o tla welwa ke masetlapelo,

wa se tsebe le pheko ye o ka a thibelago ka yona.

Kotsi e tla go phuthumetša,

wa se kgone go e phepha.

Mathata a o sego wa ka wa a gopola a tla go wela godimo.

₁₂Šomiša dipheko le meupo ya gago,

tše o di dirišitšego go tloga bjaneng.

Mohlomongwe di ka ba le ka mo di ka go thušago ka gona;

mo gongwe o ka tšhošetša manaba a gago.

₁₃O itapišitše ka go loga maano a mantši.

Boradinaledi ba gago bjale a ba tle ba go eletše –

batho bale ba go ithuta dinaledi,

ba go arolanya leratadima,

bao kgwedi ka kgwedi ba go botšago tše di tlago go hlagela.

₁₄“Ba tla swana le mahlaka,

mme mollo wa ba tšhuma.

Ba ka se kgone go iphološa –

mollo woo e ka se be wa go orwa le go dulelwa.

₁₅Ka tsela yeo o tla lahlegelwa ke bona boradinaledi bale o bego o rerišana nabo,

ebile o dirišana le bona go tloga bjaneng bja gago.

Yo mongwe le yo mongwe wa bona o tla tšea ya gagwe tsela,

gomme ga go yo a tlago šala a go phološa.”