JESAYA 45

₁Morena o beile Korese kgoši,

a ba a mmea mofenyi wa ditšhaba

le wa go amoga dikgoši maatla;

Morena o tla mmulela dikgoro tša metse –

di ka se dule di tswaletšwe.

Morena o botša Korese yo o re:

₂“Nna ka noši ke tla go lokišetša tsela,

ka lekanetša meboto.

Ke tla robaganya dikgoro tša mphiri,

ka pšhatlaganya le maphika a tšona a tshipi.

₃Ke tla go fa matlotlo a a tšwago mafelong a leswiswi,

le mahumo a a fihlilwego;

ke gona o tlago tseba gore ke nna Morena,

le gore Modimo wa Israele o go bitša ka leina.

₄Ke go bea mothuši wa Baisraele,

bahlanka ba ka,

e lego setšhaba se ke se kgethilego.

Ke go bitša ka maina a a hlomphegago,

etšwe o sa ntsebe.

₅“Ke nna Morena – ga go Modimo wo mongwe.

Ke tla go tiiša, le ge o sa ntsebe.

₆Seo ke se direla gore go tloga bohlabatšatši go fihlela bodikela

batho ka moka ba tsebe gore Morena ke nna,

le gore ga go Modimo wo mongwe.

₇Ke nna ke dirago seetša,

gape ke hlolago leswiswi;

ke nna ke tlišago tšhegofatšo,

ka hlola le masetlapelo.

Ke nna Morena ke dirago dilo tše ka moka.

₈Ke tla romela boloki bo etšwa legodimong bjalo ka pula ya matlorotloro;

lefase le tla bo amogela ka lethabo,

gomme la hlogiša phologo le toka.

Ke nna Morena ke tlago phethagatša tšeo.”

₉Kgane pitša e ka ngangišana le mmopi wa yona,

pitša ya go swana le tše dingwe?

A letsopa le ka botšiša mmopi gore o dirang?

Na pitša e ka belaela ya re mmopi wa yona ga a kgone?

₁₀A lesea le ka botšiša tatagolona la re:

“Ke eng se o se tswetšego?”

goba la botšiša mmagolona la re:

“O belege eng?”

₁₁Morena, Modimo yo mokgethwa wa setšhaba sa Israele,

yo a se hlodilego, o re:

“Le ka no mpotšiša tša ka moso,

eupša bana ba ka bona,

mediro ya diatla tša ka,

ga le a swanela go mpotšiša ka bona.

₁₂Ke nna ke hlodilego lefase,

le batho ba ba dulago go lona ke ba bopile.

Ke phurolotše magodimo ka diatla tše tša ka;

ke nna ke laolago letšatši le ngwedi le dinaledi.

₁₃Nna ka noši ke hlohleleditše Korese gore a dire ka boloki.

Tsela tšohle tše a tšeago ka tšona ke tla di lekanetša.

O tla tsošološa Jerusalema, motse wa ka,

mme a lokolla setšhaba sa ka bothopša.

Ga se a rekwa goba a amogetšwa tsogolekobong go dira taba tše.”

O realo, Morena Ramaatlaohle.

“Thoto ya Egepeta le tšhelete ya Etopia e tla ba tša lena,

gomme banna bale ba batelele ba Seba e tla ba makgoba a lena;

ba tla le šala morago ba tlemilwe ka diketane.

Ba tla le khunamela ba bega ba re:

‘Ruri, Modimo o na le lena;

ka ntle le yena ga go Modimo wo mongwe.

₁₅Modimo wa Israele,

Mophološi wa setšhaba sa gagwe,

ke Modimo yo a iphihlago.

₁₆Bao ba dirago medimo ya diswantšho ba tla lewa ke dihlong;

ka moka ga bona ba tla gobošwa.

₁₇Eupša Baisraele bona ba phološwa ke Morena,

gomme go phološwa ga bona e tla ba ga go ya go ile;

setšhaba sa bona se ka se tsoge se llwe ke dihlong goba se gobošitšwe.’ ”

₁₈Morena o hlodile magodimo –

ke yena e lego Modimo!

O hlodile lefase mme a le bopa,

a le tiiša madulong a lona.

Ga se a le hlolela go se dulwe ke motho,

eupša o le diretše batho.

Ke yena a rego:

“Ke nna Morena,

gomme ga go modimo wo mongwe.

₁₉Ga se ka bolela sephiring, leswiswing.

Ga se ka botša setšhaba sa Israele gore se nnyake se sa nkhwetše.

Ke nna Morena,

gomme ke bolela therešo;

ke tsebiša setšhaba gore tše di lokilego ke eng.”

“Kgobokanang,

lena mašaledi a ditšhabatšhaba,

lena le šetšego ge mmušo wa Babilonia o fedišwa;

batamelang le hlagiše taba ya lena kgorong ya tsheko!

Batho ba ba felago ba rwala medimo ya bona ya diswantšhobetlwa phatlalatša,

gomme ba rapela medimo ye e ka se kego ya ba phološa –

bona bao ga ba tsebe selo!

₂₁Etlang le bege taba ya lena kgorong;

baboleledi ba lena a ba rerišane.

Ke mang yo a kilego a bolela se se tlago hlaga?

Ke mang yo a se begilego kgale?

Na ga se nna, Morena?

Ntle le nna ga go Modimo wo mongwe.

Ke nna fela Modimo wa toka yo a phološago setšhaba sa gagwe.

₂₂“Retologelang go nna le phološwe,

lena batho ba lefase lohle!

Ke nna fela Modimo yo a lego gona.

₂₃Se ke le holofetšago sona ka keno ke therešo,

gomme se ka se fetoge.

Ke a ikana ke re:

Batho ka moka ba tla tla ba khunama pele ga ka,

ba ikana gore ba tla mpotegela.

₂₄“Ba tla tla go nna ba re toka le maatla di hwetšwa fela mo go nna;

eupša bohle ba ba nkgalefetšego ba tla gobošwa.

₂₅Nna, Morena, ke tla phološa ditlogolo tšohle tša Jakobo,

gomme tšona di tla ntheta.”