JESAYA 27

₁Mohlang woo Morena o tla hlaba Lebiathane, mmamogašwa wa lebelo wa go tshophagana, ka tšhoša ya gagwe ye šoro, ye e tiilego ye kgolo; a bolaya wona mmamokebe wa lewatle.

₂Ka letšatši leo le opele le re Morena o tla bolela mabapi le serapa sa gagwe se sebotse sa merara a re: ₃“Ke nna mohlokomedi wa sona, ke dula ke se nošetša. Ke se leta bošego le mosegare gore go se be le yo a se senyago. ₄Ga ke sa galefetše serapa sa ka. Ge nkabe se na le mehlašana ya meetlwa le mabjang, nkabe ke di epa ka di tšhuma lorelore. ₅Fela ge eba manaba a setšhaba sa ka a nyaka gore ke a šireletše, gona a ba kwane le nna. Ee, a ba kwane le nna.”

₆Ka moso Baisraele ba tla melela sa ruri nageng ya bona, ditlogolo tša Jakobo di tla atlega, gomme lefase ka moka la holega.

₇Kgane Morena o kile a otla Baisraele bjalo ka ge a otlile baotli ba bona? Goba bona ba kile ba bolawa ka bontši boka babolai ba bona? ₈Morena o otlile setšhaba sa gagwe gannyane ka go se iša bothopša. A ba tšeiša ledimo le lešoro la bohlabela. ₉Eupša Baisraele ba tla swarelwa dibe fela ge ba ka šilaganya maswika a dialetare tša medimo ya diswantšho, a ba bjalo ka motaga wo o šitšwego, gwa se sa ba le dialetare tša diorelo, goba dikota tša borapedi.

₁₀Motse wola o bego o tiile, bjale o tlogetšwe o nnoši; ga o sa na le batho, o bjalo ka lešoka. O fetogile phulo ya dikgomo, felo mo di robalago gona ge di kgothile mehlašana. ₁₁Makala a mehlare a a omelela a robega, mme basadi ba a tla ba a rwalela dikgong. Ka ge setšhaba sa Israele se sa kwešiše, Modimo, Mohlodi wa sona, a ka se se šokele, Mmopi wa sona, a ka se se gaugele.

₁₂Mohlang woo Morena o tla kgoboketša setšhaba sa gagwe ka o tee ka o tee, go tloga Yufratese go yo fihla mollwaneng wa Egepeta, bjalo ka motho ge a hlokola mabele.

₁₃Ka letšatši leo go tla letšwa phalafala ye kgolo, gwa bitšwa Baisraele ka moka ba ba išitšwego bothopša Asiria le Egepeta. Ba tla tla ba khunamela Morena thabeng ya gagwe ye kgethwa, Jerusalema.