JESAYA 14

₁Morena o tla boeletša a šokela ditlogolo tša Jakobo, a ikgethela setšhaba seo sa Israele. O tla ba dudiša nageng ya bona gape, gomme bafaladi ba tla tla ba dula le bona, ba ikopanya nabo. ₂Ditšhaba di tla thuša setšhaba sa Israele go boela nageng ya sona, gomme gona moo nageng ye Morena a ba filego yona ditšhaba di tla hlankela Baisraele e le makgoba. Bale ba kilego ba thopa Baisraele bjale ba tla thopša ke bona, gomme setšhaba sa buša bale ba kilego ba se gatelela.

₃Morena o tla imolla lena setšhaba sa Israele matshwenyegong le mahlokong a lena, le modirong wo boima wo le bego le gapeletšwa go o dira. ₄Ge a dira bjalo lena le tla gegea kgoši ya Babilonia ka koša la re:

“Agaa, yeo ke yona pheletšo ya mogateledi! Kgatelelo e fedile! ₅Morena o fedišitše maatla a babuši ba babe ₆ba ba bego ba dula ba gateletše ditšhaba ka bogale; ba di hlakiša ba befetšwe, gomme ba sa lese go hlomara ba ba ba fentšego. ₇Bjale lefase lohle le hlomotšwe mootlwa, le iketlile, bohle ba letša mekgolokwane. ₈Mephaene le mesedere ya Lebanone e thabetše se se hlagetšego kgoši, e re: ‘Ka ge kgoši a se sa le gona ga go sa tlo ba le yo a re remago!’

₉“Bodulabahu bo ferehlegile, bo itokišetša go amogela kgoši ya Babilonia. Meoya ya bale ba bego ba na le maatla lefaseng e a huduega. Meoya ya dikgoši e emelela ditulong tša yona tša bogoši. ₁₀Yohle e a mo dumediša e re: ‘Ea, kganthe le wena o fokotše bjalo ka rena! O swana le rena! ₁₁O be o hlompšha ka modumo wa diharepa, eupša bjale o theošeditšwe mono bodulabahu. Bolao le kobo ya gago ke diboko.’

₁₂“Hee, kgoši ya Babilonia! Wena mphatlalatšane, naledi ya masa, o napile o wele o etšwa legodimong! Bjale o pšhatlagane fase, wena mafenyaditšhaba. ₁₃O be o ipotša o re o namelela legodimong, o yo bea setulo sa gago sa bogoši ka godimo ga dinaledi tša godimodimo. O re o tla dula o le kgoši godimo ga thaba yela medimo e kgobokanago go yona ka leboa. ₁₄O be o re o tla namelela ka godimo ga maru wa swana le Ramaatlaohle. ₁₅Eupša o kgoromeleditšwe mono fasefase bodulabahu.

₁₆“Bahu ba tla go tomolela mahlo, ba go lebeledišiša ba re: ‘Afa yo ke yena yola wa go šikinya lefase, a thothomediša le mebušo? ₁₇A ga se yena yola wa go pšhatlaganya metse gomme a fetoša lefase lešoka? Afa ke yena yola a bego a sa lokolle dibofša tša gagwe, a di lesa tša ikela gae?’ ₁₈Magoši ohle a lefase – yo mongwe le yo mongwe wa bona – o ithobaletše ka lebitleng la gagwe la segoši, ₁₉eupša wena ga se wa bolokwa, setopo sa gago se lahlilwe gore se bole. Se khupeditšwe ke ditopo tša bahlabani ba ba bolailwego ka tšhoša ba lahlelwa ka moleteng wa maswika, gomme se a gatakelwa. ₂₀Ka gobane o sentše naga ya gago gomme wa bolaya le setšhaba sa gago, o ka se bolokwe bjalo ka magoši a mangwe. Ga go na le o tee wa ba lapa leno le lebe yo a tlago šala. ₂₁Thomang go bolaya barwa ba kgoši ye; ba swanetše go hwa ka lebaka la dibe tša borakgolokhukhu ba bona. Ga go na le o tee wa bona yo a tlago emelela a thopa lefase goba a le tlatša metse.”

₂₂Morena Ramaatlaohle o re: “Ke tla hlasela motse wa Babilone ka o pšhatlaganya. Nka se tlogele selo – bana goba ditlogolo goba mašaledi afe le afe. Go bolela nna, Morena. ₂₃Babilone ke tla e fetoša mohlaka mo go tlago dula bomašianoke. Ke tla swiela Babilone ka leswielo la go gogola se sengwe le se sengwe. Go bolela nna, Morena Ramaatlaohle.”

₂₄Morena Ramaatlaohle o enne a re: “Tše ke di gopotšego di tla direga. Tše ke ikemišeditšego go di dira di tla phethagala. ₂₅Ke tla fediša Baasiria nageng ya ka ya Israele, gomme ka ba gatakela godimo ga dithaba tša ka. Ke tla rola setšhaba sa ka joko ya Baasiria le merwalo ye ba bego ba e rwele magetleng. ₂₆Tšeo ke tše ke ikemišeditšego go di dira lefase, gomme letsogo la ka ke le emišeditše go otla ditšhaba.” ₂₇Morena Ramaatlaohle o ikemišeditše go dira tšeo – ke mang yo a ka mo thibelago? O emišeditše letsogo la gagwe go otla – ke mang a ka le išago fase?

₂₈Molaetša wo o ilego wa begwa ka ngwaga wo Kgoši Ahase a hwilego ka wona šo:

₂₉Lena batho ka moka ba Filistia, patla yela le bego le bethwa ka yona e robegile, eupša le se ke la thaba. Noga e tswala mokopa bjalo ka ge semela se hloga modung, gomme leeng la wona go thwathwašwa mmamokebe. ₃₀Morena e tla ba modiši wa badiididiidi gare ga setšhaba sa gagwe, gomme bahloki o tla dira gore ba dule ba bolokegile. Eupša lena Bafilista o tla le fediša ka tlala, gomme go ka se šale motho gare ga lena.

₃₁Gololang le lle, lena metse ya Bafilista! Nolegang moko bohle! Lerole le tla le etšwa ka leboa – ke madira a a tlago ka lekoko.

₃₂Na batseta ba go tšwa Filistia re tla ba botša eng? Re tla ba botša gore Morena o hlomile Sione, le gore bahlaki gare ga setšhaba sa gagwe ba tla tšhabela gona.