JESAYA 10

₁Le lahlegile, lena le beago melao ye mebe ye e gatelelago setšhaba sa ka. ₂Ke ka moo le thibelago badiidi ge ba etla tshekong, la ba amoga ditokelo tša bona. Ke ka tsela yeo le tlaišago bahlologadi le ditšhuana ka yona, la ba amoga dithoto tša bona. ₃Le tla dirang ge Modimo a tlilo le otla? Le tla dirang ge a le tlišetša masetlapelo a go tšwa nageng ya kgole? Le tla tšhabela go mang gore a le thuše? Mahumo a lena le tla a fihla kae? ₄Ga le sa šaletšwe ke selo ntle le go inama la ba mathopša goba le hwela ntweng. Le ge go le bjalo kgalefo ya Morena e ka se okobale; letsogo la gagwe o tla fela a le emišeditše go otla.

₅Morena o re: “Joo, Asiria! Ke šomiša Asiria bjalo ka patla le phata go otla bao ke ba galefetšego. ₆Ke romeletša Baasiria go setšhaba se se ganago nna, Modimo wa sona; ke ba laela gore ba yo hlasela setšhaba se ke se tukelago bogale. Ke ba roma gore ba yo se hula, ba se thopele, mme ba se gatake bjalo ka leraga mekgotheng.”

₇Eupša kgoši ya Asiria yona ga e gopole ka mokgwa woo, ga se ya ikemišetša go dira seo. E ikemišeditše go senya, go fediša ditšhaba tše dintši. ₈O a ikgantšha o re: “Babuši ba dilete tša ka ke dikgoši ka moka! ₉Ke fentše motse wa Kalene le wa Karkemishe, motse wa Hamate le wa Arpade. Ke fentše Samaria le Damaskose. ₁₀Ke ile ka emiša letsogo ka thopa mebušo yeo ya go khunamela medingwana e šele, medimo ya diswantšhobetlwa ye mentši go feta ya Jerusalema le ya Samaria. ₁₁Ke pšhatlagantše Samaria le medimo yohle ya yona ya diswantšho, gomme Jerusalema le medimo ya yona ya diswantšho ke tla di dira sona seo.”

₁₂Eupša Mong wa bohle o re: “Ge ke fetša tšohle tše ke di dirago thabeng ya Sione le motseng wa Jerusalema, ke tla otla kgoši ya Asiria ka lebaka la go ikgantšha le go ikgogomoša ga gagwe.”

₁₃Kgoši ya Asiria e a ikgantšha e re: “Ke dirile dilo tšeo ka a ka maatla le bohlale bja ka, ka gore nna ke yo bohlale. Ke tlošitše mellwane ya ditšhaba, ka ba ka thopa matlotlo a tšona. Ke fentše badudi ba fao bjalo ka nkgwete. ₁₄Ditšhaba tša lefase di be di swana le sehlaga sa nonyana, gomme nna ka tšea mahumo a tšona bjalo ka mae ka sehlageng se se ngadilwego. Gwa se be le lefego le le rego phuruphuru la go ntšhošetša, goba molongwana wo o rego tswiritswiri!”

₁₅Eupša Morena o re: “Na selepe se ka nyatša moremi? A saga e ka itheta go feta mosagi. Lepara le ka se rethe motho yo a le topago, le patla ga e emiše yo a e swerego.”

₁₆Mong wa bohle, Morena Ramaatlaohle, o tlilo otiša Basiria bao bjale ba jago ba khora. Bahlomphegi gare ga bona ba tla tšhungwa ka teng ke mollo wo o sa timego. ₁₇Modimo, seetša sa Israele, o tla fetoga mollo. Modimo yo mokgethwa wa Israele e tla ba kgabo ya mollo, yeo ka letšatši le tee e tlago fiša ya fediša mehlašana ya meetlwa le mabjang, e lego banyatšegi gare ga bona. ₁₈Dithokgwa le dirapa tša mehlare ya dikenywa, e lego bahlomphegi, ba tla swa thokgethokge bjalo ka molwetši yo a kgaogago. ₁₉Go tla šala batho ba ba sego nene mo e lego gore le mošemanyana a ka ba bala.

₂₀Nako e etla yeo ka yona mašaledi a Israele le ditlogolo tša Jakobo tše di phonyokgilego ba ka se sa botago setšhaba se se ilego sa ba hlasela. Morena Modimo yo mokgethwa wa Israele ba tla tshepha yena ka nnete. ₂₁Mašaledi a tla boela go Modimo wa ona yo maatla, ona mašaledi a setšhaba sa Israele. ₂₂Le ge gonabjale setšhaba se lekana le dithorwana tša lešabašaba la lewatle ka bontši, go tla boa fela mašaletšana. Se šetše se ahloletšwe go fedišwa, ebile go a se swanela. ₂₃Ee, Mong wa bohle, Morena Ramaatlaohle, o ikemišeditše go fediša naga yohle.

₂₄Mong wa bohle, Morena Ramaatlaohle, o re go setšhaba sa gagwe se se dulago Sione: “Le se ke la tšhaba Baasiria, le ge ba le gateletše bjalo ka Baegepeta mehleng yela. ₂₅Kgauswinyana nka se sa le galefela, gomme ke tla tukela bona bogale ka ba fediša. ₂₆Nna, Morena Ramaatlaohle, ke tla ba otla ka tshelane ya ka, ka etša mola ke fenya Bamidiane letlapeng la Orebe. Ke tla emiša lepara la ka ka godimo ga lewatle ka betha Asiria go swana le mola ke itia Egepeta. ₂₇Ge nako yeo e fihla ke tla le lokolla jokong ya Asiria, ye e bego e le morwalo magetleng a lena. Kgatelelo yeo e tla fedišwa ke mokhora wa lena, batho ba Juda.”

₂₈Manaba a wetše motse wa Ai godimo! A putlile Migrone! A tlogetše merwalo ya ona Mikimase! ₂₉A tshetše sefata gomme a re: “A re yeng re yo lala Geba.” Batho ba motse wa Rama ba a thothomela, le batho ba Gibea, motse wa Kgoši Saulo, ba tšhabile. ₃₀Hlabang mokgoši, lena batho ba Galime! Theeletšang, lena badudi ba Laesha! Lena ba Anathote, arabang mokgoši woo! ₃₁Batho ba Madimena ba ipha lešoka, ba Gebime ba a khuta. ₃₂Lehono manaba a motseng wa Nobo, gomme gona moo ba rethela thaba ya Sione matswele, thaba ye motse wa Jerusalema o agilwego godimo ga yona.

₃₃Mong wa bohle, Morena Ramaatlaohle, o tla ba remaganya bjalo ka makala a mohlare. Batho ba maemo ba tla bolawa, gomme bahlomphegi ba kokobetšwa. ₃₄Morena o tla ba rema bjalo ka mehlare ye megolo ya sethokgweng, Yomaatla o tla ba uša boka mehlare ye metelele ya Lebanone.