HABAKUKU 2

₁Ke tla namela sethalana sa ka, ka ema godimo ga tora ya tlhapetšo, ka letela go kwa se Morena a tlago mpotša sona, le phetolo ya gagwe mabapi le sello sa ka.

₂Morena a mphetola a re: “Ditaba tše ke go utollelago tšona o di tloke matlapaneng, gore di balege gabonolo. ₃O di tloke ka gobane nako ya tšona ya gore di phethagale e sa tla. Fela nako yeo e tla tla ka pela, le tše ke go utollelago tšona di tla phethagala. Le ge di ka tšea nako, o di letele; go phethagala gona di tla phethagala go se go ye kae. ₄Molaetša wa gona šo: ‘Yo kgopo a ka se phologe; yo a lokafaditšwego ke Modimo ka tumelo ya gagwe yena o tla phela.’ ”

₅Ruri, lehumo le a fora. Motho wa go ikgogomoša ga a phele nako ye telele. O na le megabaru bjalo ka bodulabahu; go swana le lehu ga a khore. Ke ka lebaka leo a thopelago ditšhaba. ₆Bohle ba tla mo kodutla, ba mo opela koša ba re: “Owaa, moiphatšabangwe towe, ga wa le bona! O yo feletša kae le go ikhumiša ka tše o di amogilego ba ba llego molato go wena?”

₇Ruri, o tla re o sa itebetše, gwa tšwelela ba wena o llego molato go bona, gwa tsoga ba go tlo go tšhoša, mme ba go thopela. ₈Ka ge o hlakotše ditšhaba tše dintši, mašaledi ohle a tšona a tla go hula, ya ba ge o lefa polao yela ya gago le boganka bja gago bathong ba lefase metseng ya bona.

₉O yo madimabe, moamogabangwe ka šiši towe, wa humiša lapa la gago, wa ikagela ntlo ya malekeleke gore o tle o se šwahlelwe! ₁₀O ikgobošeditše lapa ka maanomabe a gago; ka go fediša ditšhaba tše dintši ka madira a gago o ipolaile. ₁₁Le maswika a merako a a go tšwa, le tšona dikota tša mahlomo di touta seo.

₁₂Owe, wena o bušago motse ka bosenyi le polao! ₁₃Na ga se Morena Ramaatlaohle yo a dirilego gore maitapišo a ditšhaba a felele mollong, le gore merafe e itapišetše lefeela? ₁₄Bjalo ka ge lewatle le na le meetse a mantši, batho ba lefase le bona ba tla ba le tsebo ye ntši ya bogolo bja Morena.

₁₅O ikobetše, wena o nošago ditšhaba tše di agelanego le wena senwelo se se tletšego kgalefo ya gago sa ba sa ba taga gore o ba bonele. ₁₆Le wena o tla apešwa kgobogo, e sego seriti; le wena enwa senwelo se se tletšego kgalefo ya gago gore o tle o bonelwe. Morena o tla go noša senwelo sa kotlo se a se swerego ka seatla sa la go ja, gomme seriti sela sa gago se tla fetoga kgobogo. ₁₇O remile dithokgwa tša Lebanone, gomme bjale go tlilo rengwa wena. O bolaile diphoofolo tša gona, gomme diphoofolo di tlilo go tšhoša wa lefišetšwa go bolaya batho, le boganka bjo o bego o bo dira go badudi ba lefase le metse ya lona.

₁₈Modimo wa seswantšho wo o betlilwego ke motho o thušang, goba seswantšhobopša se batho ba iphorago ka sona? Go thušang ge mmopi a bota sebopša sa gagwe, modingwana wo o sa kgonego le go bolela? ₁₉O lahlegile, wena o rego go kota: “Tsoga!” goba go leswika le le sa phelego: “Emelela!” Kgane modimo wa seswantšho o ka ruta motho selo? Le ge o manegilwe ka gauta le ka silibera, go phela gona ga o phele.

₂₀Morena yena o ka Tempeleng ya gagwe ye kgethwa; batho bohle ba lefase a ba iphuthe ge ba le pele ga gagwe.