BAGALATIA 3

₁Hee, lena Bagalatia ba ditlaela! Le loilwe ke mang, lena ba le hlalošeditšwego gabotse tša Jesu Kriste, go no swana le ge nke o bapotšwe sefapanong le mo lebeletše?

₂Taba e tee ye ke nyakago go le botšiša yona še: Na e ka ba Moya wo Mokgethwa le o amogetše ka go phetha tše di laelwago ke melao ya Moshe, goba ka go kwa Ebangedi mme la e dumela? ₃Na ruri le ka napa la dio tlaela ka mokgwa wo? Etse le thomile ka go hlohleletšwa ke Moya, gomme bjale le reng le nyaka go feleletša ka tša nama? ₄Kgane tše dintši tše di le hlagetšego di le hlageletše lefeela? Ruri, ga go bjalo! ₅Na e ka ba ge Modimo a le fa Moya wo Mokgethwa a bile a dira mehlolo mo go lena ke ka lebaka la ge le phetha tše di laelwago ke melao ya Moshe, goba ke ka lebaka la ge le ekwa Ebangedi mme le e dumela?

₆Le go Abrahama go bile bjalo. Bjalo ka ge Mangwalo a Makgethwa a bolela, “o ile a dumela go Modimo, gomme ka lebaka la tumelo ya gagwe Modimo a mmona e le moloki.” ₇Ka gona, tsebang ge, gore ba ba nago le tumelo ke bona ditlogolo tša Abrahama. ₈Mangwalo a Makgethwa a boletše e sa le pele gore Modimo o tla lokafatša baditšhaba ka tumelo. Ke ka moo ona Mangwalo a Makgethwa a boditšego Abrahama Ebangedi e sa le pele, a re: “Ditšhaba tšohle di tla šegofatšwa ka wena.” ₉Ka gona, ba ba dumelago ke bona ba ba šegofatšwago gotee le Abrahama yo a dumetšego.

₁₀Bohle ba ba ikantšego go phetha melao ya Moshe ba phela ba rogakilwe. Gobane Mangwalo a Makgethwa a re: “Go rogakwe mang le mang yo a sa phegelelego go phetha tšohle tše di ngwadilwego ka pukung ya melao ya Moshe.” ₁₁Bjale ge, go bonala gabotse gore ga go motho yo a ka lokafatšwago ke Modimo ka melao ya Moshe, gobane Mangwalo a Makgethwa a re: “Yo a lokafaditšwego ke Modimo ka tumelo o tla phela.” ₁₂Melao ya Moshe ga e šome ka tumelo, gobane Mangwalo a Makgethwa a re: “Yo a phethago tše di laelwago ke melao ya Moshe o tla phela ka tšona.”

₁₃Kriste o re lokolotše thogakong ya go tla le melao yeo ka go ba morogakwa yena mong bakeng sa rena; gobane Mangwalo a Makgethwa a re: “Go rogakwe mang le mang yo a fegilwego koteng.” ₁₄Seo Kriste Jesu o se diretše gore tšhegofatšo ye Modimo a e filego Abrahama e tle e fiwe le baditšhaba ka yena, gore ka tumelo re tle re amogele Moya wo Mokgethwa wo re o holofeditšwego.

₁₅Banabešo, ke nyaka go le swantšhetša ka se se tlwaelegilego, gore ge lengwalo la bohwa le tiišeditšwe go ka se be le yo a le hlanamišago goba a le tlaleletšago. ₁₆Modimo o holofeditše Abrahama le setlogolo sa gagwe. Mangwalo a Makgethwa ga a re “le ditlogolo” mo nkego ke tše dintši, etšwe e le se setee fela, mme go thwe “le setlogolo sa gago”, e lego Kriste. ₁₇Ke ra gore Modimo o dirile kgwerano le Abrahama, mme a holofetša e sa le pele gore o tla e phetha. Melao ya Moshe ye e ilego ya bewa ka morago ga mengwaga ye makgolo a mane le masome a mararo e ka se kgone go hlanamiša kgwerano yeo ya phumola kholofetšo ya Modimo. ₁₈Gobane ge bohwa bo ka be bo etla ka melao ya Moshe, gona bo ka be bo sa tle ka kholofetšo. Eupša e be e le ka lebaka la kholofetšo ge Modimo, ka kgaugelo ya gagwe, a efa Abrahama bohwa bjoo.

₁₉Bjale melao ya Moshe ke ya go dirang? Ke ya go tlaleletša kgwerano go bontšha se e lego phošo, e beetšwe go ba gona go fihlela ge go etla setlogolo sa Abrahama, yo e lego yena yo a holofeditšwego. E tlišitšwe ke barongwa ba na le mmaditsela. ₂₀Eupša taba e ama motho o tee fela, mmaditsela ga a nyakege, gomme Modimo yena o tee.

₂₁Kgane seo se ra gore melao ya Moshe e ganana le dikholofetšo tša Modimo? Aowa, le gatee! Gobane ge batho ba ka be ba filwe molao wa go phediša, gona ba ka be ba lokafatšwa ka go o phetha. ₂₂Eupša Mangwalo a Makgethwa a re lefase lohle le golegilwe ke sebe, gore badumedi ba fiwe tše ba di holofeditšwego ka go dumela go Jesu Kriste.

₂₃Mola nako ya go dumela e sešo ya tla, melao ya Moshe e be e re tswaleletše re le dibofša, gwa ba gwa tla nako ya go utollwa ga tša tumelo. ₂₄Ka gona, melao yeo ya ba mohlokomedi wa rena go fihlela ge Kriste a etla, gore re tle re lokafatšwe ka tumelo. ₂₅Bjale ka gore tumelo e tlile, melao yeo ga e sa le mohlokomedi wa rena.

₂₆Ke ka go dumela go Kriste Jesu ge bohle le le bana ba Modimo. ₂₇Le kolobeditšwe la ba ba tee le Kriste, gomme bjale le phele bjalo ka yena. ₂₈Ka gona Bajuda le baditšhaba ga ba fapane, makgoba le balokologi ga ba fapane, banna le basadi ga ba fapane; bohle le selo se tee ka go ba ba tee le Kriste Jesu. ₂₉Gomme ge le le ba Kriste ke gona ge le le ditlogolo tša Abrahama, gomme le tla fiwa tše Modimo a le holofeditšego tšona le le bajalefa ba gagwe.