BAGALATIA 2

₁Ka morago ga mengwaga ye lesome le ye mene ka boela Jerusalema ke na le Barnabase, ka tšea le Titose. ₂Ka ya gona ka ge Modimo a be a nkutolletše gore ke ye. Ka fihla ka boledišana le baetapele ba nnoši ka ba hlalošetša Ebangedi ye ke e begelago baditšhaba. Ke be ke sa nyake gore modiro wa ka wa gonabjale goba wa mehleng ye e fetilego e be lefeela. ₃Le Titose yo a bego a na le nna, le ge e le Mogerike, ga se a ka a gapeletšwa go bolla, ₄le ge ba bangwe ba be ba nyaka gore a bolle. Bona bao ba ile ba tsena mo sehlopheng sa rena ka go khukhuna, ba itira nke ke badumedi gore e tle e be dihlodi tša go bona ge eba bolokologi bja rena ke bja go ba batee le Kriste Jesu. Ba be ba nyaka go re dira makgoba a melao ya Moshe; ₅fela le gatee ra se dumele, ka ge re be re nyaka gore le dule le na le nnete ya Ebangedi.

₆Fela bao ba bego ba tsebja e le baetapele – le ge seo go nna e se selo, gobane Modimo ga a ahlole motho go ya ka tebelelo ya mahlo – bona baetapele bao ba be ba kgotsofetše ka Ebangedi ye ke bego ke e ruta. ₇Ba lemogile gore Modimo o mphile modiro wa go begela baditšhaba Ebangedi, go no swana le ge a file Petrose modiro wa go begela Bajuda Ebangedi. ₈Gobane yena Modimo yo a filego Petrose maatla a go ba moapostola wa Bajuda, nna o mphile maatla a go ba moapostola wa baditšhaba. ₉E rile ge ba lemoga gore modiro wo ke o filwe ke Modimo, Jakobose le Kefase le Johanese, bona ba ba bego ba bonala e le baetapele, ba fana diatla le nna le Barnabase e le sešupo sa gore re badirišani. Ra kwana gore nna le Barnabase re tla ya go baditšhaba, bona ba tla ya go Bajuda. ₁₀Se ba re kgopetšego sona e bile gore re se lebale bahloki, e lego yona taba ye e bego e mpolaiša pelo.

₁₁E rile ge Petrose a fihla Antiokia nna ka mo sola pepeneneng, ka gobane o be a dira phošo ye e lego molaleng. ₁₂Pele ga ge go fihla balatedi ba Jakobose, Petrose o be a eja le badumedi ba go tšwa baditšhabeng. Fela e rile ge banna bao ba fihlile a hunyela a ipea lekata, ka go tšhaba Bajuda. ₁₃Badumedi ba bangwe ba Bajuda le bona ba mo ekiša ba dira tša boikaketši, ešita le Barnabase a gogolwa ke boikaketši bja bona. ₁₄Nna ge ke bona gore ga ba dire ka mo go lebanego go ya ka nnete ya Ebangedi, ka botša Petrose mo pele ga bona ka moka ka re: “Ge wena o lego Mojuda o sa phethe Sejuda, o phetha seditšhaba, o ka gapeletša bjang badumedi ba baditšhaba gore ba phethe Sejuda?”

₁₅Rena re Bajuda ka tlhago, ga re badiradibe ba go tšwa boditšhabeng. ₁₆Le ge go le bjalo, se re se tsebago ke gore motho o lokafatšwa fela ka go dumela go Jesu Kriste, e sego ka go phetha tše di laelwago ke melao ya Moshe. Le rena re dumetše go Kriste Jesu gore re tle re lokafatšwe ka tumelo ya rena go Kriste, e sego ka go phetha tše di laelwago ke melao ya Moshe. Gobane ga go motho yo a lokafatšwago ka go phetha tše di laelwago ke melao yeo. ₁₇Bjale ge rena re nyakago go lokafatšwa ka go dumela go Kriste re ka hwetšwa re le badiradibe bjalo ka baditšhaba, na e ka se be gore Kriste o kgothaletša batho go dira sebe? Le gatee! ₁₈Ge nka tsošološa melao ya Moshe yela ke rilego ga se yona, gona ke tla be ke bontšha gore ke a e tshela. ₁₉Ge go iwa ka melao ya Moshe, nna ke hwile – ke bolailwe ke yona – e le gore ke tle ke phelele Modimo. Ke bolailwe le Kriste sefapanong, ₂₀gomme ge ke phela ga e sa le nna yo a phelago, eupša ke Kriste yo a phelago mo go nna. Bophelo bjo ke bo phelago bjale ke bo phela ka go dumela go Morwa wa Modimo yo a nthatilego gomme a ikgafa ka lebaka la ka. ₂₁Ga se gore kgaugelo ya Modimo ga se selo. Ge eba motho o lokafatšwa ka melao ya Moshe, gona ke gore Kriste o hwetše lefeela.