Morena o tla otla Egepeta
1Morena a re go nna: 2“Wena motho wa nama, porofeta o bege gore nna, Morena, Mong wa bohle, ke re gololang le re:
“Jonna joo,
tšatši le le šiišago le etla!
3Tšatši leo le kgauswi,
tšatši la go šoma ga Morena.
E tla ba tšatši la maru a maso,
tšatši la tahlego ya ditšhaba.
4Baegepeta ba tla hlaselwa ka tšhoša;
batho ba Etopia ba tla thothomela ka letšhogo,
ge Baegepeta ba bolawa,
ba hlakolwa le mahumo,
le metse ya bona e pšhatlaganywa.
5“Ntweng yeo ba Etopia, le ba Lidia, le ba Libia, le ba Arabia ka moka, le ba Kube, le ba naga ye ke dirilego kgwerano le yona ba tla bolawa ka tšhoša.”
6Morena, Mong wa bohle, o re: “Go tloga Migdolo go fihla Asoane ba ba emago le Egepeta ba tla bolawa ka tšhoša. Madira a Egepeta a go ikgantšha a tla fedišwa. Ke realo, nna, Morena, Mong wa bohle. 7Naga yeo e tla ba ye e ngadilwego go feta dinaga ka moka, gomme metse ya yona e tla šala e le marope go feta metse ka moka. 8Mohla ke tšhuma Egepeta ka mollo gomme bašireletši ba yona ka moka ba bolawa, ke mo ba tlago lemoga gore Morena ke nna.
9“Ge letšatši leo le fihla mme Egepeta e fedišwa, ke tla roma batseta ka maselawatle go yo tšhoša batho ba Etopia ba sa itebetše, gomme ba tla welwa ke masetlapelo. Tšatši leo le etla!”
10Morena, Mong wa bohle, o re: “Ke tla swielela makoko a Egepeta ka Nebukadnesare, kgoši ya Babilonia. 11Yena le setšhaba sa gagwe se sehlogo go feta ditšhaba tše dingwe ke tla ba romela go ripitla naga yeo. Ba tla hlasela badudi ba Egepeta ka ditšhoša, gomme ba tlatša naga ka ditopo. 12Ke tla pšheša noka ya Naele gomme ka dira gore naga e bušwe ke badiratšempe. Bašele ba tla senya naga yohle. Ke realo, nna, Morena.”
13Morena, Mong wa bohle, o re: “Ke tla pšhatlaganya medingwana, ka tloša le medimo ya diswantšho le ya maaka Memfise. Go ka se be le yo a bušago naga ya Egepeta, gomme ke tla tšhoša badudi ba gona. 14Ke tla senya Egepeta ka borwa, gomme ka tšhuma motse wa Tsoane ka leboa. Ke tla otla badudi ba motse wa Tebetse. 15Ke tla tšholla kgalefo ya ka godimo ga Pelusiomo, e lego wona motse wa sebo se segolo sa Egepeta. Ke tla fediša makoko a motse wa Tebetse. 16Ke tla tšhuma Egepeta ka mollo, gomme badudi ba Pelusiomo ba tla menekana ka go kwa bohloko. Merako ya Tebetse e tla pšhatlwa, gomme motse wa kgangwa ke meetse. 17Masogana a motse wa Heliopolise le wa Bubastise a tla bolawa ka tšhoša, gomme batho ba bangwe ba thopša. 18Tagpanese mosegare go tla fifala ge ke fediša pušo ya Egepeta, ke fediša le madira a ba bego ba ikgantšha ka ona. Egepeta e tla khurumetšwa ke leru, gomme batho ba metse yohle ya gona ba tla thopša. 19Mohla ke otla Egepeta ka mokgwa woo ba tla lemoga gore ke nna Morena.”
Morena o robile kgoši ya Egepeta letsogo
20Ka tšatši la bošupa la kgwedi ya pele ya ngwaga wa lesome le motšo o tee wa ge re le mathopša Morena a re go nna: 21“Wena motho wa nama, ke robile kgoši ya Egepeta letsogo. Ga go motho yo a mmofilego lona goba a mo fapilego lona ka thapo, gore le tle le fole mme le tiele go ka swara tšhoša gape. 22Bjale ge, nna, Morena, Mong wa bohle, ke re: Ke lwa le kgoši ya Egepeta. Ke ya go mo roba matsogo ka mabedi – le le sa itekanetšego le le le robegilego – ka dira gore tšhoša e we seatleng sa gagwe. 23Baegepeta ke tla ba šwalalanya le ditšhaba, ka ba gašanya le dinaga. 24Ke moka ka tiiša kgoši ya Babilonia matsogo, ka mo swariša tšhoša ya ka. Kgoši ya Egepeta yona ke tla e roba matsogo, gomme e tla golola e le pele ga gagwe boka motho yo a gobaditšwego wa go hwa. 25Ee, ke tla tiiša matsogo a kgoši ya Babilonia, a kgoši ya Egepeta ona ka a rephiša. Batho ba tla lemoga gore Morena ke nna ge ke neela kgoši ya Babilonia tšhoša ya ka, mme yena a šupa Egepeta ka yona. 26Ke tla šwalalanya Baegepeta le ditšhaba, ka ba gašanya le dinaga. Ke mo ba tlago lemoga gore Morena ke nna.”
