HESEKIELE 2

₁E rile ge ke bona tšeo, ka itahlela fase ka sefahlego. Ke moka ka kwa lentšu la yo a bolelago le re: “Wena motho wa nama, emelela; ke nyaka go bolela le wena.” ₂Ya re ge a realo ka tsenwa ke moya wa Morena mme wa nkemiša ka maoto, gomme ka kwa a iša pele a re: ₃“Wena motho wa nama, ke go roma go setšhaba sa Israele. Ba ile ba ntsogela maatla mme le bjale ba sa ntsogela. Bona le borakgolokhukhu ba bona ba lwele le nna go fihlela le lehono. ₄Ba ngangabetše, gomme ga ba ntlhomphe, ka gona ke go roma gore o yo ba botša tše nna, Morena, Mong wa bohle, ke ba botšago tšona. ₅Le ge setšhaba seo sa batsošampherefere se ka go theeletša goba sa se go theeletše, se tla tseba gore moprofeta o kile a ba gona gare ga sona.

₆“Eupša wena motho wa nama, o se ba tšhabe goba wa boifa se ba se bolelago. Ba tla ngangabala ba se go theeletše; go tla swana le ge o ka phela gare ga diphepheng. Le ge go le bjalo, o se boife setšhaba seo sa batsošampherefere goba wa tšhošwa ke tše ba di bolelago. ₇O ba botše tše ke go botšago tšona, le ge eba ba ka go theeletša goba ba se go theeletše, ka gobane ke batsošampherefere.

₈“Wena motho wa nama, theeletša se ke go botšago sona. O se ke wa tsoša mpherefere go etša bona. Ahlama o je se ke go neago sona.”

₉Ge ke lebelela ka bona seatla se nkobeletša se swere lengwalo le le phuthilwego. ₁₀Seatla seo sa phutholla lengwalo lela; le be le ngwadilwe ka mo le ka mo – go ngwadilwe dikopelo tša dillo le mantšu a manyami le a go golola.