EKSODOSE 40

₁Morena a re go Moshe: ₂“Ka letšatši la pele la kgwedi ya mathomo o hlome Tente ya bodulo bja ka. ₃Ka gare ga yona o bee Polokelo ya Kgwerano yeo e swerego Melao ye Lesome, mme o e širetše ka seširo. ₄O tsenye tafola ka Tenteng, mme o beakanye ditlabakelo godimo ga yona. O tsenye le sehlomamabone, mme o hlome mabone godimo ga sona. ₅O bee aletare ya gauta ya go tšhumela seorelo pele ga Polokelo ya Kgwerano yeo e swerego Melao ye Lesome, gomme o fege seširo mojakong wa Tente. ₆Pele ga mojako wa Tente o bee aletare ya dihlabelo. ₇O bee sebjana sa go hlapela gare ga Tente le aletare, mme o se tlatše meetse. ₈O hlome kgoro mme o fege seširo mojakong wa yona.

₉“Ka morago ga fao o kgethwafatše Tente le ditlabakelo tša yona ka moka ka go e tlotša ka makhura a tlotšo, mme e tla ba ye kgethwa. ₁₀Bjale o kgethwafatše aletare le ditlabakelo tša yona ka moka ka go e tlotša ka ona, mme e tla ba ye kgethwakgethwa. ₁₁O kgethwafatše le sebjana sa go hlapela le bogato bja sona ka yona tsela yeo.

₁₂“O tliše Arone le barwa ba gagwe mojakong wa Tente, gomme o ba hlapiše ka meetse. ₁₃O apeše Arone diaparo tše dikgethwa, o mo tlotše ka makhura ale, mme e be go mo kgethwafatša, gore a tle a kgone go ntirela e le moprista. ₁₄O tliše barwa ba gagwe, o ba apeše dihempe. ₁₅Bjale o ba tlotše ka wona mokgwa woo o tloditšego tatabo, gore ba tle ba kgone go ntirela e le baprista. Go tlotšwa mo go tla ba dira baprista ba go ya go ile.”

₁₆Moshe a dira tšohle ka moo Morena a mo laetšego. ₁₇Ka fao ka letšatši la pele la kgwedi ya mathomo ya ngwaga wa bobedi ka morago ga ge ba tlogile Egepeta, Tente ya bodulo bja Morena ya hlongwa. ₁₈Moshe a bea mabogato a yona, a hloma mahlomo a yona a go e thekga, a tlemelela dipalelo tša yona, mme a tsema dikota tša yona. ₁₉A phurolla sepipetši godimo ga Tente, a bea le sepipetši sa ka ntle godimo ga sona, ka moo Morena a laetšego ka gona. ₂₀Ka morago ga fao a tšea matlapa ale a mabedi a a bea ka Polokelong ya Kgwerano. A khwamela mapara mekgokong ya Polokelo, mme a e khurumela ka sekhurumelo. ₂₁Bjale a bea Polokelo ka Tenteng mme a fega seširo sa go e širetša. Ka tsela ye a šireletša Polokelo ya Kgwerano yeo e bego e swere matlapa, ka moo Morena a bego a laetše ka gona.

₂₂A bea tafola ka Tenteng, ka lehlakoreng la ka leboa ka ntle ga seširo, ₂₃gomme godimo ga yona a beakanya dinkgwa tšeo di bego di abetšwe Morena, ka moo Morena a bego a laetše ka gona. ₂₄A bea sehlomamabone ka Tenteng go lebana le tafola ka lehlakoreng la ka borwa, ₂₅gomme moo pele ga Morena a hloma mabone ale, ka moo Morena a bego a laetše ka gona. ₂₆A bea aletare ya gauta ka Tenteng pele ga seširo, ₂₇mme a tšhuma seorelo sa go nkga bose, ka moo Morena a bego a laetše ka gona. ₂₈A fega seširo mojakong wa Tente, ₂₉mme moo pele ga seširo a bea aletare ya dihlabelo. Godimo ga yona a dira sehlabelo sa go tšhungwa ka moka, le kabelo ya bupi, ka moo Morena a bego a laetše ka gona. ₃₀A bea sebjana sa go hlapela gare ga Tente le aletare, mme a se tlatša meetse. ₃₁Moshe le Arone le barwa ba gagwe ba hlapela diatla le maoto ka moo ₃₂nako ye nngwe le ye nngwe ge ba tsena ka Tenteng, goba ba batamela aletare, ka moo Morena a bego a laetše ka gona. ₃₃Moshe a hloma kgoro go dikologa Tente le aletare, mme a fega seširo mojakong wa kgoro. Ke ka mo a phethilego modiro ka moka.

₃₄Bjale leru la pipetša Tente ya bodulo bja Morena, mme seetša se se fahlago sa letago la Morena sa tlala Tente. ₃₅Ka lebaka leo Moshe a se ke a kgona go tsena ka Tenteng. ₃₆Mo leetong lohle la Baisraele, e be e re ge leru le apoga ka godimo ga Tente, Baisraele ba huduge. ₃₇Ge leru le sa apoge, ba be ba sa huduge. ₃₈Leetong la bona ka moka ba be ba bona leru la letago la Morena godimo ga Tente mosegare, le mollo wo o tukago ka godimo ga yona bošego.