EKSODOSE 16

₁Setšhaba ka moka sa Israele se rutlologile sa tloga Elime, gomme ka letšatši la lesome le metšo ye mehlano la kgwedi ya bobedi ge ba tlogile Egepeta, ba fihla lešokeng la Tsine, le le lego kgatheng ga Elime le Sinai. ₂Ge ba le moo lešokeng, ka moka ba ngongoregela Moshe le Arone ₃ba re: “Re duma ge nkabe Morena a re bolaile re sa le Egepeta, moo re bego re kgona go itulela pele ga dipitša tša nama, ra ja ra khora. Bjale le re ntšhitše Egepeta la re tliša mo lešokeng go bolaya setšhaba se ka moka ka tlala.”

₄Morena a re go Moshe: “Bona, ke tlilo le nešetša dijo tše di tšwago legodimong. Batho a ba tšwe letšatši ka letšatši ba yo itopela tše di lekanego letšatši leo. Ka tsela ye ke tla ba leka gore ke bone ge eba ba tla phetha ditaelo tša ka, goba ba ka se di phethe. ₅Ka letšatši la boselela ba itopele tše di lekanego matšatši a mabedi, gomme ba di apee.”

₆Ka gona Moshe le Arone ba re go Baisraele ka moka: “Mantšiboeng a lehono le tla tseba gore ke Morena yo a le ntšhitšego nageng ya Egepeta. ₇Mosong le tla bona seetša se se fahlago sa letago la Morena, gobane o kwele ge le mo tsota. Gape le tsota yena, gobane ge e le rena re bomang moo le ka hlwago le re tsota?” ₈Ke moka Moshe a re: “Ge Morena a le fa nama mantšiboeng, gomme goseng a le fa bogobe bjo bo lekanego go le khoriša, ka ge a kwele ka mo le mo tsotago, rena re bomang? Ge le tsota rena, gabotsebotse le tsota Morena.”

₉Moshe a re go Arone: “Botša setšhaba ka moka se batamele pele ga Morena, gobane o kwele dingongorego tša bona.” ₁₀Ge Arone a bolela le setšhaba sohle, ba lebiša difahlego lešokeng, gomme ka bjako seetša se se fahlago sa letago la Morena sa bonagala lerung. ₁₁Morena a re go Moshe: ₁₂“Ke kwele dingongorego tša Baisraele. Ba botše gore ka maabane ba tla ba le nama ya go ja, gomme goseng ba khorišwa ka bogobe. Ke gona ba tlago tseba gore nna, Morena, ke Modimo wa bona.”

₁₃Mantšiboa gwa rotoga dikhwiri tša aparela mešaša, gomme goseng phoka e be e wele go dikologa mešaša. ₁₄Ge phoka e tologa, gwa šala dikgakgapšana tše tshesenyane tša go gwaša di ikadile nageng. E be e le tše boletiana bjalo ka tšhwaane. ₁₅Ge Baisraele ba di fahlogela ba se ke ba tseba gore ke eng, mme ba botšišana ba re: “Ke eng tše?”

Moshe a re go bona: “Tše ke bogobe bjo Morena a le filego bjona gore le je. ₁₆Morena o laetše gore yo mongwe le yo mongwe wa lena a tope ka mo go lekanego, yo mongwe le yo mongwe lapeng a hwetše dilitara tše pedi.”

₁₇Baisraele ba dira bjalo, ba bangwe ba topa kudu mola ba bangwe ba topa gannyane. ₁₈Ge ba ela, gwa hwetšagala gore ba ba topilego kudu ga ba topa kudu go fetiša tekanyo, mme bao ba topilego gannyane le bona ga ba nyenyefatša kudu go hlaetša. Yo mongwe le yo mongwe o topile ka mo go mo lekanego. ₁₉Moshe a re go bona: “Go se be le yo a šadišago dijo molatša a beela la ka moswane.” ₂₀Ba bangwe ba bona ba se ke ba theeletša Moshe, gomme ba šadiša molatša. Ka la ka moswane ke ge dijo di nyeuma diboko di nkga sebodi, gomme Moshe a ba befelelwa. ₂₁Mosong wa tšatši le lengwe le le lengwe yo mongwe le yo mongwe o be a topa fela ka tekanyetšo; ge letšatši le thoma go fiša, tše di šetšego nageng di be di tologa.

₂₂Ka letšatši la boselela ba topa dijo tše di lekanego matšatši a mabedi, dilitara tše nne hlogo ya motho. Baetapele ka moka ba setšhaba ba tla go Moshe ba mmegela taba ye, ₂₃gomme yena a re go bona: “Morena o laetše gore la ka moswane ke letšatši le lekgethwa la go khutša, le kgethetšwe Morena. Lehono le bešeng se le ratago go se beša, le apeeng se le ratago go se apea. Tšohle tše le di šadišago le di bolokeleng la ka moswane.” ₂₄Ba dira ka mo Moshe a ba laetšego ka gona, ba bolokela tše di šetšego la ka moswane; dijo tša se ke tša senyega, le gona tša se be le diboko. ₂₅Moshe a re: “Di jeng lehono, gobane lehono ke Sabatha, letšatši la go khutša le le kgethetšwego Morena, gomme le ka se hwetše dijo kua nageng lehono. ₂₆Le tope dijo matšatši a a selelago, eupša ka la bošupa, letšatši la go khutša, go ka se be le selo.”

₂₇Ka letšatši la bošupa ba bangwe ba setšhaba ba tšwa go yo topa, eupša ba se hwetše selo. ₂₈Ke mo Morena a rilego go Moshe: “Go tla fihlela neng le gana go phetha melao le ditaelo tša ka? ₂₉Gopolang gore nna, Morena, ke le file letšatši la go khutša, ke ka lebaka leo ka letšatši la boselela ke tlago fela ke le fa dijo tša matšatši a mabedi. Yo mongwe le yo mongwe a hlwe gae, a se ke a tloga mo a dulago ntshe ka letšatši la bošupa.” ₃₀Ka gona setšhaba sa khutša ka letšatši la bošupa.

₃₁Setšhaba sa Israele sa rea dijo tšeo leina la manna. A be a swana le pewana ye tšhwaanyana, mme ka ganong a kwala bjalo ka dinkgwana tša magegetswana tša go dirwa ka todi ya nose. ₃₂Moshe a re: “Morena o re laetše go lota manna a mangwe, gore a bolokelwe ditlogolo tša rena, di tle di bone dijo tše Morena a re filego tšona re le lešokeng gore re je ge a re ntšha Egepeta.” ₃₃Moshe a re go Arone: “Tšea pitšana o tšhele dilitara tše pedi tša manna ka go yona, gomme o e bee pele ga sefahlego sa Morena gore a lotelwe ditlogolo.” ₃₄Arone a bea manna pele ga Polokelo ya Kgwerano, ka moo Morena a laetšego Moshe, gore a tle a lotege. ₃₅Baisraele ba lle manna mengwaga ye masome a mane, go fihlela ba fihla nageng ye e dutšwego ke batho, mellwaneng ya naga ya Kanana.

₃₆Pitšana yeo ya go swara dilitara tše pedi e be e tsena galesome ka moeteng.