EKSODOSE 1

₁Šea maina a barwa ba Jakobo bao ba ilego ba ya le yena Egepeta, yo mongwe le yo mongwe le lapa la gagwe: ₂Rubene, Simeone, Lefi, Juda, ₃Isakara, Sebulone, Benjamene, ₄Dane, Naftali, Gade le Asere. ₅Batho ka moka ba leloko la Jakobo ka madi e be e le ba masome a a šupago; Josefa, morwagwe, yena o be a šetše a le Egepeta. ₆Josefa le bomorwarragwe ka moka le batho ka moka ba mehleng yeo ba ile ba hwa. ₇Fela Baisraele, ditlogolo tša Jakobo, ba ba le thari ba ata kudu, ba ba le maatla gagolo mme ba enela, ba tlala naga ya Egepeta.

₈Ka morago ga lebaka gwa bewa kgoši ye mpsha Egepeta ye e bego e sa tsebe selo ka Josefa. ₉Ya re go batho ba yona: “Bonang! Baisraele ba ba ata kudu, ba ba le maatla go re feta. ₁₀Ge ntwa e ka tsoga ba ka ema le manaba, ba lwa le rena mme ba tšhaba nageng ye. A re logeng maano gore ba se hlwe ba ata go ya pele.” ₁₁Ka fao Baegepeta ba beela Baisraele bahlapetši ba go ba šomiša sekgoba, gore ba ba fetše maatla ka go ba diriša mešomo ye boima. Baisraele ba agela kgoši metse ye megolo ya polokelo ya Pitome le Ramsese. ₁₂Eupša ge Baegepeta ba gatelela Baisraele kudu, ya ba moo Baisraele ba atago go fetišiša, ba tlala naga moo e lego gore Baegepeta ba ile ba thoma go tlalelwa. ₁₃Ba napa ba gapeletša Baisraele bokgoba ka sehlogo; ₁₄ba ba galakišetša bophelo ka go ba gapeletša mediro ye boima ya maraga le ditena le mediro ka moka ya mašemong ka sehlogo se segolo.

₁₅Bjale kgoši ya Egepeta ya bolela le babelegiši ba basadi ba Baheberu; leina la yo mongwe e be e le Shifra, la yo mongwe e le Pua. ₁₆A re go bona: “Le hlokomeleng ge le belegiša basadi ba Baheberu; ge le hwetša leseana e le mošemane le le bolaye, fela ge le hwetša e le mosetsana le le lese le phele.” ₁₇Fela babelegiši ba be ba boifa Modimo mme ba se ke ba dira ka moo kgoši a ba laetšego, eupša ba lesa bašemane ba phela. ₁₈Ka gona kgoši a bitša babelegiši a re go bona: “Le direlang taba ye? Le reng le lesa bašemane ba phela?”

₁₉Bona ba fetola kgoši ba re: “Basadi ba Baheberu ga ba swane le basadi ba Baegepeta; ba Baheberu ba belega sesolo, mme pele mmelegiši a fihla go bona ba be ba šetše ba belege.” _20-21Ka ge babelegiši ba be ba boifa Modimo, Modimo a ba fa bana. Gomme Baisraele ba fela ba ata ba eba le maatla kudu.

₂₂Ke moo kgoši a laetšego setšhaba sa gagwe ka moka a re: “Mošemanyana yo mongwe le yo mongwe wa Moheberu yo a belegwago le mo lahlele ka nokeng ya Naele, fela banenyana le ba lese ba phele.”