MMOLEDI 8

₁Ke mang yo a swanago le monna yo bohlale? Yo a kgonago go hlatholla dilo yena ke mang? Bohlale bja motho bo mo ediša sefahlego, bo mo dira le gore a se šinyalale.

₂Phetha taelo ya kgoši, ka gobane o ikanne ka Modimo. ₃O se potlakele go tloga go kgoši. O se ngangabale tabeng ye mpe, ka gobane kgoši e dira se e se ratago. ₄Lentšu la kgoši le agelwa lešaka, kgane ke mang yo a ka mo sekišago ge a dira tša gagwe? ₅Yo a phethago melao ya gagwe a ka se tsene mathateng; motho yo bohlale le yena o tseba nako ya gona le mokgwa. ₆Dilo tšohle di na le nako ya tšona le mokgwa wa go di dira, le ge motho yena a tshwenywa kudu ₇ke go se tsebe tša ka moso, ka ge go se yo a ka mmotšago tšona. ₈Ga go motho yo a ka thibelago lehu la gagwe, goba a diegiša letšatši la gagwe la go hwa. Ge go lwewa ga go mohlabani yo a dumeletšwego go ya gae, le modiratšekgopo a ka se phološwe ke bokgopo bja gagwe.

₉Tšeo ka moka ke di bone ge ke ntše ke nagana ka tšohle tše di dirwago mo lefaseng, ge motho a laola yo mongwe, a mo hlakiša. ₁₀Ke bone le bakgopo ba yo bolokwa mabitleng, mola baloki bona ba tloga motseng mme ba lebalwa. Seo le sona ke lefeela.

₁₁Ka ge disenyi di diegelwa go otlwa, batho ba ikgafela bosenyi. ₁₂Modiradibe o senya gantšintši mme a no tšwela pele le go phela, fela nna ke tseba gore ba ba theeletšago Modimo ke bona ba ba tlago phela gabotse ka lebaka la tlhompho ya bona. ₁₃Fela yo kgopo yena di ka se mo sepelele gabotse, le bophelo bja gagwe bo ka se telefale bjalo ka moriti, ka ge a sa theeletše Modimo. ₁₄Go na le se sengwe sa lefeela mo lefaseng: Nako ye nngwe moloki o hlagelwa ke se se swanetšego yo kgopo, yo kgopo a hlagelwe ke se se swanetšego moloki. Nna ke re seo le sona ke lefeela.

₁₅Ka gona, ke re go botse ge batho ba ithabiša, gobane mo lefaseng ga go se sekaone go phala go ja, le go nwa, le go ithabiša. Se sona a ka se kgona ge a sa ntše a katana bophelong bjo a bo filwego ke Modimo mo lefaseng.

₁₆Ka mehla ge ke be ke re ke leka go tseba bohlale le go lebelela tše batho ba di dirago mo lefaseng ba itlhokiša boroko bošego le mosegare, ₁₇ke be ke bona tšohle tše Modimo a di dirago, le gore ga go yo a ka kwešišago tše di diregago mo lefaseng. Le ge motho a ka leka bjang le bjang a ka se kgone. Mohlalefi le ge a ka re o a tseba a ka se kwešiše.