MMOLEDI 6

₁Go na le ye nngwe taba ye e kwešago batho bohloko ye ke e bonago mo lefaseng: ₂Ke ge Modimo a efa motho lehumo le thoto le bohlomphegi – tšohle tše motho a di nyakago – fela a se ke a mo dumelela go ipshina ka tšona, di lewe ke motho o šele. Ye taba ke lefeela, ke masetlapelo a magolo. ₃Le ge motho a ka tswala bana ba lekgolo a ba a phela nako ye telele, le ge a ka tšofala bjang le bjang, ge a se a ka a ipshina ka menate ya bophelo le gona a se a bolokwa gabotse, gona ke re o phalwa le ke sefolotšana; ₄gobane go tswalwa ga sona ga go thuše selo, ga se bone seetša, le go rewa leina ga se rewe, ₅le letšatši ga se le bone, ga se tsebe selo, fela se ikhuditše go phala yena. ₆Yena, le ge a be a ka phela mengwaga ye sekete a e boeletša a sa ipshine ka bophelo, a ke re o ya felo gotee le sefolotšana?

₇Motho o itapiša go dio hwetša diyamaleng, le ge go le bjalo ga a khore. ₈Na mohlalefi o phala setlaela ka eng? Modiidi yena go mo thušang go tseba go phedišana le batho? ₉Go kgotsofala ka tše o nago natšo go kaone go phala go ba le pelo ye telele, gobane go ba le megabaru le gona ke lefeela, ke go phuthela phefo ka kobo.

₁₀Tšohle tše di lego gona di šetše di theilwe maina, le gona go a tsebja gore motho ke motho, mme a ka se sekišane le yo a mo fetago ka maatla. ₁₁Go bolela kudu ke go itshwenya, gomme go hola motho ka eng? ₁₂Kgane ke mang yo a tsebago tše di holago motho bophelong bjo bokopana bjo bja go se re selo, bja go feta bjalo ka moriti? Ke mang yo a ka mmotšago se se tlago hlaga mo lefaseng ge yena a hwile?