MMOLEDI 1

₁Šedi dipolelo tša Mmoledi, morwa wa Dafida. Mmoledi yo e be e le kgoši kua Jerusalema.

₂Yena o re: “Tšohle ke lefeela, lefeela la mafeela, tšohle ke lefeela. ₃Etse motho o boelwa ke eng ge a dulela go itapiša ka go šoma mo lefaseng? ₄Moloko ge o tloga go tla wo mongwe, eupša lefase lona ga le fetoge. ₅Letšatši le a hlaba la ba la yo sobela, la boela mo le tšwago gona le lapile, gore le yo hlaba gape. ₆Phefo e fokela borwa, ya retologa ya fokela leboa; e dikologa ka mokgwa woo e etšwa mo e thomilego gona. ₇Dinoka tšohle di elela ka lewatleng, eupša lewatle ga le tlale. Meetse a lona a boela mo dinoka di thomegago gona, gomme a elela ka lewatleng gape. ₈Dillo ka moka di a lapiša – ke tapišego ye motho a sa kgonego go e hlaloša. Mahlo a rena ga a lapišwe ke go bona; ditsebe tša rena ga di tenwe ke go kwa. ₉Tše di kilego tša hlaga di tla no hlaga gape. Tše di kilego tša dirwa di tla buša tša dirwa. Ga go na selo se sefsa lefaseng ka moka. ₁₀Ge go ka hlaga se sengwenyana se motho a ka rego: ‘Bonang, se selo ke se sefsa!’ nnete ke gore se šetše se kile sa hlaga mehleng ya kgale, re sešo ra belegwa. ₁₁Ga go motho yo a gopolago tše di kilego tša hlaga mehleng ye e fetilego, ebile ka moso ga go yo a tlago gopola tše di hlagago go tloga bjale go fihlela mehleng yeo ya ka moso.”

₁₂Nna, Mmoledi, ke be ke le kgoši ya Israele motseng wa Jerusalema. ₁₃Ka ikemišetša gore ke tla lebeledišiša dilo tšohle tše di dirwago mo lefaseng, mme ka ithuta tšona ka bohlale. Eupša woo ke mošomo wo o tlaišago wo Modimo a o filego motho gore a o dire. ₁₄Tšohle tše di dirwago mo lefaseng ke di bone, gomme ke le botša gore ke lefeela. Di swana le go phuthela phefo ka kobo. ₁₅Tše di kgopamego ga di otlollege, tše di sego gona di ka se balwe.

₁₆Nkile ka ipotša ka re: “Ke nna monna wa maemo, ke hlalefile go phala magoši ohle a a kilego a buša a le Jerusalema. Ke tseba gabotsebotse se bohlale le tsebo di lego sona.” ₁₇Ke be ke ikemišeditše go ithuta gore na tsebo le botlaela di fapana bjang, le gore bohlale le bogafi di a swana na. Eupša ka lemoga gore le seo ke go phuthela phefo ka kobo. ₁₈Ge o le bohlale kudu ke mo o bago le mathata a mantši; ge o tseba kudu ke gona o tlaišegago le go feta.