DOITERONOMIO 26

₁“Ge le thopile naga ye Morena Modimo wa lena a le fago yona mme le dutše go yona, ₂motho a tšee dithakangwaga tše dingwe tša dibjalo tšohle tše a di bunnego a di lokele ka serotong, mme a di iše lefelong la tirelo le Morena a le kgethilego. ₃A ye go moprista yo a lego modirong ka nako yeo mme a re go yena: ‘Bjale ke begela Morena Modimo wa gago gore ke tsene nageng ye a enetšego borakgolokhukhu ba rena gore o tla re fa yona.’

₄“Moprista a tšee seroto go yena, mme a se bee pele ga aletare ya Morena Modimo wa motlišadithakangwaga yoo. ₅Mme moo pele ga Morena yena a bolele mantšu a: ‘Rakgolokhukhu wa ka e be e le Moaramo yo a ralalago. O ile a falaletša lapa la gagwe Egepeta. Ba be ba se nene ge ba eya moo, eupša e ile ya ba setšhaba se segolo se maatla. ₆Baegepeta ba ile ba re swara gampe, ba re gatelela mme ba re gapeletša go šoma sekgoba. ₇Ka gona ra llela Morena, Modimo wa borakgolokhukhu ba rena. Yena a re kwa mme a bona go tlaišega ga rena le mathata a rena le go šokiša ga rena. ₈Ka maatla a gagwe a magolo le go tia ga gagwe a re ntšha Egepeta. O ile a dira mehlolo le dimakatšo, le dilo tše di tšhošago. ₉O re tlišitše mo mme a re fa naga ye ya mokhora le monono. ₁₀Bjale šemo, ke tliša go Morena dithakangwaga tše dingwe tša puno ye a mphilego yona.’

“Ka morago ga moo a bee seroto fase pele ga Morena mme a mo obamele fao. ₁₁A thabele dilo tše botse tše Morena Modimo wa gagwe a filego yena le lapa la gagwe; mme Balefi le bafaladi bao ba dulago gare ga lena le bona ba thabe le yena.

₁₂“Ngwaga wo mongwe le wo mongwe wa boraro ke ngwaga wa karolo ya lesome. Ka ngwaga woo o ntšhe karolo ya lesome ya dibjalo tša gago, o e fe Balefi, bafaladi, ditšhuana le bahlologadi, gore motseng wo mongwe le wo mongwe ba tle ba be le tšohle tše ba di hlokago tša go ja. ₁₃Ge le dirile seo, le re go Morena: ‘Ke ntšhitše karolo yela ye kgethwa ka lapeng la ka ka e fa Balefi, bafaladi, ditšhuana le bahlologadi, ka moo o ntaetšego ka gona. Ga se ka tshela goba ka lebala ye nngwe ya ditaelo tša gago mabapi le karolo ya lesome. ₁₄Ga se ka ja se sengwe sa yona ke iletše; ga se ka ntšha se sengwe sa yona ngwakong wa ka ke tšhilafetše; ebile ga se ka dira se sengwe sa yona sedimo. Ke go theeleditše, Morena Modimo wa ka; ke dirile tšohle tše o ntaetšego tšona mabapi le karolo ya lesome. ₁₅Okamela fase o le lefelong la gago le lekgethwa legodimong gomme o šegofatše setšhaba sa gago sa Israele; o šegofatše le naga ye ya mokhora le monono ye o re filego yona, bjalo ka ge o e enetše borakgolokhukhu ba rena.’

₁₆“Lehono Morena Modimo wa lena o le laela gore le phethe melao le melawana ya gagwe ka moka; ka gona le e phethe ka go e botegela ka dipelo tša lena ka moka le ka moya wa lena ka moka. ₁₇Lehono le dumetše gore Morena ke Modimo wa lena; le tshephišitše gore le tla mo theeletša, le tla phetha melao ya gagwe ka moka, le gore le tla dira tšohle tše a le laelago tšona. ₁₈Lehono Morena o le tšere gore le setšhaba se e lego sa gagwe, ka moo a le holofeditšego, gomme o le laela gore le phethe melao ya gagwe ka moka. ₁₉Ditšhaba ka moka tše a di bopilego o tla dira gore le di fete ka maatla, mme le tla mo tumiša la mo godiša. Le tla ba setšhaba se sekgethwa sa Morena, bjalo ka ge a le holofeditše.”