DOITERONOMIO 20

₁“Ge le eya ntweng go yo lwa le manaba a lena mme la bona dikoloi tša ntwa le dipere le madira a a le fetago, le se ke la ba boifa. Morena Modimo wa lena yo a le ntšhitšego Egepeta o tla ba le lena. ₂Pele ga ge le thoma go lwa, moprista a tle ka pele gomme a re go madira: ₃‘Lena banna ba Israele, theetšang! Lehono le tsena ntweng. Le se ke la boifa manaba a lena, goba la nolega moko, goba la tlalelwa. ₄Morena Modimo wa lena o ya le lena, mme o tla dira gore le fenye.’

₅“Gomme balaodi ba bolele le banna ba re: ‘A mo go na le yo a sa tšogo aga ngwako, gomme a sego a tšwa a o kgakola? Ge eba o gona, a a boele gae, ka gore ge a ka bolawa ntweng, yo mongwe o tla kgakola ngwako wa gagwe. ₆A go na le yo a sa tšogo lema serapa sa merara, fela a sego a ka a ba le sebaka sa go buna diterebe tša sona? Ge eba o gona, a a boele gae, ka gore ge a ka bolawa ntweng, yo mongwe o tla loma dienywa tša sona. ₇A go na le mo yo a beeleditšego mosadi? Ge eba o gona, a a boele gae, ka gore ge a ka bolawa ntweng, yo mongwe o tla nyala mosadi yola a mmeeleditšego.’

₈“Balaodi ba iše pele ba re go bona: ‘A go na le yo a boifago gape a nolegilego moko? Ge eba o gona, a a boele gae, ka gore o tla nola ba bangwe moko.’ ₉Ge balaodi ba feditše go bolela le madira, go kgethwe baetapele ba sekgao se sengwe le se sengwe.

₁₀“Ge le eya go hlasela motse, sa pele le feng batho ba wona sebaka sa go ineela. ₁₁Ge ba ka bula dikgoro tša motse gomme ba ineela, ka moka e swanetše go ba makgoba a lena mme ba le direle mediro ka kgapeletšo. ₁₂Eupša ge batho ba motse woo ba sa nyake go ineela, ba ikgethela go hlabana, le o dikanetše ka madira a lena. ₁₃Ge Morena Modimo wa lena a ka le kgontšha go o thopa, le bolayeng banna ka moka go wona. ₁₄Fela le ka itšeela basadi, bana, diruiwa le se sengwe le se sengwe motseng woo. Le ka šomiša tšohle tše e lego tša manaba a lena. Morena o le file tšona. ₁₅Ke ka moo le swanetšego go dira metse yeo e lego kgolekgole le naga ye le tlago dula go yona.

₁₆“Eupša ge le thopa metse nageng ye Morena Modimo wa lena a le fago yona, le bolayeng se sengwe le se sengwe se se phelago. ₁₇Le fediše batho taa: Bahete, Baamore, Bakanana, Baperise, Bahibe le Bajebuse, bjalo ka ge Morena a le laetše. ₁₈Le ba bolayeng, gore ba se ke ba tla ba le diriša sebe pele ga Morena Modimo wa lena go le ruta gore le dire dilo tša bohlola ka moka tše ba di dirago tirelong ya medimo ya bona.

₁₉“Ge le hlasela motse gore le o thope, le se ke la rema mehlare ya wona ya dienywa, le ge go dikanetša motse moo go ka tšea nako ye telele. Le jeng dienywa, fela le se ke la senya mehlare yeo; yona ga se manaba a lena. ₂₀Le ka rema mehlare ye mengwe ye e sego ya dienywa mme la šomiša yona go aga tše madira a tlago di namela ge a hlasela motse go fihlela o thopiwa.”