Amose o bona seroto sa dikenywa ponong
1Morena, Mong wa bohle, o ile a mpontšha pono ye nngwe. Mo go yona ka bona seroto sa dikenywa tše di budulego. 2A mpotšiša a re: “Amose, na o bonang?”
Ka mo fetola ka re: “Ke bona seroto sa dikenywa.”
Ke moka Morena a re go nna: “Ke mafelelo a setšhaba sa ka sa Israele. Nka se sa buša pelo ka se se otle. 3Mohlang woo mošate batho ba ka se sa opela, ba tla lla. Go tla ba le ditopo tše dintši, mme tša lahlwa ka setu.”
Baisraele ba lahlegile
4Theeletšang mo, lena le gatelelago bahloki, le tlaišago badiidi ba naga ye. 5Le ipotša le re: “Monyanya wa Ngwedi wa lebalana o tla feta neng gore re tle re rekiše mabele a rena? Sabatha e tla feta neng, gore re tle re a rekiše? Ke mo re tlago ela ka dikelo tše e sego tšona, ra lefiša batho go feta tekanyo, ra ba hlalefetša ka dikeloboima tše e sego tšona. 6Modiidi re ka mo reka ka tšhelete, le mohloki ra mo reka ka dieta, ešita le ditlhoka tša mabele ra di rekiša.”
7Morena, yo Baisraele ba ikgantšhago ka yena, o ikanne a re: “Nka se tsoge ke lebetše mediro ya bona ye mebe. 8Ga ke re ke yona ye e tlago hlola tšhišinyego ya lefase, gomme bohle ba ba dulago mo nageng ba lla? Ruri, lefase lohle le tla tekateka la kukutlologa bjalo ka Naele, la ba la kokobela bjalo ka noka yeo ya Egepeta. 9Mohlang woo ke tla dira gore letšatši le sobele mosegare wo mogolo, le lefase le aparelwe ke leswiswi mosegare. Ke realo, nna, Morena, Mong wa bohle.
10“Menyanya ya lena ke tla e fetoša mahloko, dikopelo tša lena ka di fetoša dillo. Ke tla le apariša tša go ilela, ka le boodiša dihlogo, gomme le tla swana le batswadi ba ba iletšego morwa motswalwanoši wa bona. Letšatši leo ka moka e tla ba la mahloko.
11“Go tla nako yeo ka yona ke tlago wiša tlala nageng. Batho ba tla swarwa ke tlala, eupša e sego ya bogobe; ba tla nyorwa, eupša ba sa nyorelwe meetse. Ba tla swarwa ke tlala le lenyora la go nyaka go kwa tše Morena a di bolelago. Ke realo, nna, Morena, Mong wa bohle. 12Batho ba tla ebela go tloga Lewatleng le le Hwilego go yo fihla Lewatleng la Mediteraniene, ba goloma ba tloga leboa ba ya bohlabela ba nyaka lentšu la Morena, fela ba le hloka. 13Mohlang woo makgarebe a mabotse le masogana ba tla akgega ka lenyora. 14Bao ba ikanago ka modimo wa seswantšho wa Samaria ba rego: ‘Ka modimo wa Dane wo o phelago,’ goba ‘Ka modimo wa Beresheba wo o phelago,’ ba tla wa gomme ba se sa tsoga.”
