DITIRO 24

₁Ge go fetile matšatši a mahlano Moprista yo Mogologolo, Ananiase, a ya Kesarea a na le bagolo ba bangwenyana ba setšhaba le mmoleledi yo ba rego ke Tertulose. Ba tla go Mmušiši Felikise, ba bega Paulose. _2-3Ke ge Paulose a bitšwa. Tertulose a thoma go mo latofatša a re:

“Mohlomphegi, re bile le boiketlo nako ye telele ge re bušwa ke wena, le setšhaba sa gaborena se holega ka ditlhabollo tše o di tlišago ka go bonela pele ga gago. Taba ye re e thabela ka mehla le mo gohle, gomme re go leboga e le ruri. ₄Ke be ke sa rate go go ditela kudu, fela ke dio kgopela gore o re theeletše ka botho ge re go nyetlela taba ya rena. ₅Monna yo re hweditše gore ke kgwara, ke mphapantšhi wa Bajuda lefaseng ka moka, ke ketapele ya bakgelogi ba go thwego ke Manasaretha. ₆Le gona o lekile go tšhela Tempele setšhila gomme ra mo swara. _7-8Ge o ka mmotšiša, o tla ikwela ka bowena tšohle tše re mo latofatšago ka tšona.” ₉Bajuda ba napa ba mo tlatša, ba re taba tšeo di bjalo.

₁₀Mmušiši a kgwathetša Paulose gore a bolele, gomme Paulose a re:

“Ka ge ke tseba gore e šetše e le mengwaga ye mentši o le moahlodi wa setšhaba se, ke iphetolela ke phuthologile. ₁₁Bjalo ka ge o ka kgonthiša ka bowena, go tloga mola ka yago Jerusalema go rapela go fihlela gonabjale, ga se matšatši a a fetago a lesome le a mabedi. ₁₂Ga se ba ka ba nkhwetša ke phegišana le motho ka Tempeleng, goba ke ferekanya batho ka disinagogeng goba mo gongwe motseng. ₁₃Ebile le bohlatse bja ditaba tše ba ntatofatšago ka tšona ga ba nabjo. ₁₄Se ke sa se ganetšego mo pele ga gago ke gore ke rapela Modimo wa borakgolokhukhu ka go phela ka thuto ye bona ba rego ke ya bakgelogi, ke ntše ke dumela le tšohle tše di ngwadilwego ka melaong ya Moshe le ka dipukung tša baprofeta. ₁₅Ke holofela bjalo ka bona gore Modimo o tla tsoša batho bohle bahung, ba go loka le ba go se loke. ₁₆Ke ka lebaka leo ka mehla ke itekago gore ke se itshetshengwe mo pele ga Modimo le pele ga batho.

₁₇“Ka morago ga ge ke tlogile Jerusalema mengwaga ye mentši, ke ile ka boela gona go išetša ba setšhaba sa gešo dimpho tše di fiwago bahloki, le go yo dira dihlabelo. ₁₈Ke tšona tše ba nkhweditšego ke di dira ka Tempeleng ka morago ga ge ke phethile tirelo ya boitlhwekišo. Ke be ke se na lešaba, mokurukuru le wona o be o se gona. ₁₉Fela Bajuda ba bangwe ba go tšwa nageng ya Asia ba be ba le gona. Ke bona ba bego ba swanetše go ba mo pele ga gago ba ntatofatša, ge eba ba na le se ba ka ntatofatšago ka sona. ₂₀Ka ge ba se gona, bona ba ba lego mo a ba bolele molato wo ba mponego wona mola ke eme Kgorongkgolo ya bona, ₂₁ntle le taba e tee ye ke ilego ka e bolela ka re: ‘Etse lehono le ntshekiša ka lebaka la ge ke dumela gore bahu ba tla tsoga.’ ”

₂₂Felikise, yo a bego a tseba tša thuto ya Bokriste gabotse, a bušetša molato morago a re: “E tla re ge Lisiase, rasekete wa bahlabani, a tlile ka kgaola taba ya lena.” ₂₃A laela ralekgolo gore a lete Paulose, fela a se ke a mo kgoka, le gona a dumelela bagwera ba gagwe gore ba mo tlišetše tše a di hlokago.

₂₄Ge go fetile matšatši a mmalwa Felikise a tla le mosadi wa gagwe, Drusila, yo e bego e le Mojuda. A re Paulose a tlišwe, gomme a mo theeletša ge a bolela ka tša tumelo go Kriste Jesu. ₂₅Fela e rile ge Paulose a ntše a bolela mabapi le go phetha tše Modimo a di nyakago, le tša boitshwaro, le tša kahlolo ye e tlilogo ba gona, Felikise a tšhoga kudu mme a re: “Bjale o ka no sepela, ke tla tla ke go bitša gape ge ke hweditše sebaka.” ₂₆Gape o be a holofetše gore Paulose o tla mo fa tsogolekobong; ke ka lebaka leo a bego a fela a mmitša a bolela le yena.

₂₇Ge go fetile mengwaga ye mebedi Porkiose Festose a hlatlama Felikise. Felikise, ka ge a be a rata go ithatiša Bajuda, a tlogela Paulose ka kgolegong.