DITIRO 21

₁Ge re seno laelana nabo ra tloga ka leselawatle ra leba Kose thwii, ra ba ra yo fihla. Ka le le latelago ra fihla Rodose, gomme go tloga moo ra fetela Patara. ₂Ra fihla ra hwetša leselawatle le le yago Fenikia, ra re go le namela, ra tloga. ₃Ge re fihla mo re bonago sehlakahlaka sa Saeprose, ra se pota ka letsogong la manngele go leba Siria, ra fihla motseng wa Tirose moo leselawatle le bego le iša diphahla. ₄Ra fihla ra hwetša badumedi moo gomme ra dula nabo matšatši a a šupago. Bona ba botša Paulose ba tutuetšwa ke Moya wo Mokgethwa ba re a se ke a fetela Jerusalema. ₅Ge re seno fetša matšatši ao le bona ra tloga ra wela tsela. Ba re felesetša ka moka ga bona, le ka basadi le bana, ba re fihliša ka ntle ga motse. Ge re le lešing la lewatle ra khunama ka dikhuru ra rapela. ₆Ke moka ra laelana, rena ra namela leselawatle mola bona ba boela gae.

₇Go tloga Tirose ra tšwela pele ka leeto ra goroga Petolemaise. Ra fihla ra dumediša badumedi mme ra hlwa nabo tšatši le tee. ₈Ka le le latelago ra fetela Kesarea. Gona ra fihla ra dula ka ga moebangedi Filipi yo e bego e le yo mongwe wa bathuši bale ba go šupa. ₉O be a na le barwedi ba bane ba ba sego ba nyalwa bao ba bego ba na le mpho ya go bega molaetša wa Modimo. ₁₀E rile ge e šetše e le matšatši re le moo gwa fihla moprofeta yo ba rego ke Agabose wa go tšwa Judea. ₁₁A tla go rena, a tšea lepanta la Paulose, a ipofa maoto le matsogo ka lona a re: “Moya wo Mokgethwa o re: ‘Mong wa lepanta le Bajuda ba ya go mmofa ka mokgwa wo kua Jerusalema, ba mo gafela baditšhaba.’ ”

₁₂Ge re ekwa a realo, rena le badumedi ba moo ra rapela Paulose gore a se ye Jerusalema. ₁₃Yena a re fetola ka go re: “Le reng le lla le nyaka go ntlhanamiša? Gape nna ke itokišeditše e sego fela go bofša, eupša le go bolaelwa Morena Jesu kua Jerusalema.”

₁₄Ge a re palela bjalo, ra ineela ra re: “A go phethwe thato ya Morena.”

₁₅Ge go fetile matšatši ao, ra itokiša ra ya Jerusalema. ₁₆Badumedi ba bangwe ba go tšwa Kesarea le bona ba ya le rena, ba re iša go Monasone wa go tšwa Saeprose yo e bego e le modumedi wa kgale, yo re bego re yo dula ka ga gagwe.

₁₇Ge re fihla Jerusalema badumedi ba re amogela ka lethabo. ₁₈Ka le le latelago Paulose a ya le rena go bona Jakobose; le bagolo ba phuthego ka moka ba be ba le gona. ₁₉Paulose a re go ba dumediša a ba anegela ka botlalo tšohle tše Modimo a di dirilego ka yena go baditšhaba. ₂₀Ge ba seno di kwa, bohle ba reta Modimo. Ke moka ba re go Paulose: “Ngwanešo, le wena o a iponela ka bowena gore ke dikete tše kaakang tša Bajuda ba ba dumetšego, le gore bohle ba botegela molao wa Moshe bjang. ₂₁Ba boditšwe gore wena o ruta Bajuda bohle ba ba falaletšego baditšhabeng gore ba kgeloge molaong wa Moshe; o re ba se ke ba bolotša bana ba bona, le gona ba se ke ba latela ditlwaedi tša Sejuda. ₂₂Bjale go ka dirwang? Gobane go tla kwala gore o tlile fa. ₂₃Dira se re go botšago sona. Go na le banna ba bane mo ba ba ikannego. ₂₄Sepela nabo le yo phetha tirelo ya boitlhwekišo, gomme o ba lefele tšhelete ya tlhwekišo gore ba kgone go ipoolwa dihlogo. Ke mo bohle ba tlago tseba gore go tše ba di boditšwego ka wena ga go therešo, gomme o phela ka molao wa Moshe. ₂₅Ge e le baditšhaba ba ba sokologilego bona re ba ngwaletše lengwalo ra ba botša gore re kwane gore ba ile dinama tša didimo, le bobete, le dinama tša diphoofolo tše di kgamilwego, le go nyalana ga lešika.”

₂₆Ka le le latelago Paulose a tloga le banna bao a yo phetha le bona tirelo ya boitlhwekišo. Ke moka a ya ka Tempeleng a bega gore nako ya gagwe ya matšatši a boitlhwekišo e tla fela neng, ge yo mongwe le yo mongwe wa bona a tlilo direlwa sehlabelo.

₂₇E rile ge matšatši ao a go šupa a šetše a eya mafelelong, Bajuda ba bangwe ba go tšwa nageng ya Asia ba bona Paulose ka Tempeleng. Ba hlohleletša lešaba ka moka, ba mo swara. ₂₈Ba goa ba re: “Lena banna ba Israele, thušang! Monna yo ke yena yo a rutago batho ka moka mo gohle a ba fapantšha le setšhaba le melao ya Moshe le Tempele ye. Ebile bjale o tlišitše baditšhaba ka mo Tempeleng, gomme o tšhetše lefelo le lekgethwa le setšhila!” ₂₉Ba realo ka ge ba mmone motseng a na le Trofimose wa Efeso, gomme ba hloma nke o tsene le yena ka Tempeleng.

₃₀Gwa tsoga mmudubudu motseng ka moka, setšhaba sa bokana ka lephakuphaku; ba swara Paulose, ba mo goga ba mo ntšha ka Tempeleng, gomme mejako ya tswalelwa ka pela. ₃₁E rile ba sa re ba a mmolaya, rasekete wa bahlabani a hlabelwa mokgoši wa gore motseng wohle wa Jerusalema go tsogile kgaruru. ₃₂A akgofa a tloga le bahlabani le boralekgolo ba bangwenyana ba bahlabani ba hlaganela kua lešabeng. Ge ba mmona a na le bahlabani ba lesa go keketa Paulose. ₃₃Yena a ya go Paulose, a mo swara, a laela gore a kgokwe ka diketane tše pedi. Ke moka a botšiša gore motho yoo ke mang, le gore o dirileng. ₃₄Ba bangwe moo lešabeng ba goa tša bona, bangwe ba goa tše dingwe – ya ba tlhatlhariane fela ya go šitiša rasekete go kwa se e lego taba; ka gona a laela gore Paulose a išwe sebong. ₃₅Ge ba fihla manamelong bahlabani ba mo kuka gore ba mo phephiše bogale bja lešaba. ₃₆Bohle ba be ba ba šetše morago ba goa ba re: “Mmolayeng!”

₃₇E rile ge bahlabani ba re ba mo iša ka sebong, a re go rasekete: “Na nka se bolele le wena?”

Yena a mmotšiša a re: “Kganthe o tseba Segerike? ₃₈Gona ga se wena Moegepeta yola wa go tsoša mmudubudu malobanyana mo, a ya lešokeng le batšhošetši ba dikete tše nne, kgane o yena?”

₃₉Paulose a mo fetola a re: “Nna ke Mojuda wa motse wa Tarsose kua Tsilitsia; ke modudi wa motse wo o tsebegago. Ke a go kgopela, hle, ntumelele go bolela le lešaba le.”

₄₀Rasekete a mo dumelela, gomme Paulose a ema manamelong, a homotša lešaba ka seatla. Ge ba rile tuu, a bolela le bona ka Seheberu a re: