Molaetša wa Nathane go Dafida
1Kgoši Dafida o be a dutše gabotse mošate, gomme Morena a dira gore manaba a gagwe ka moka a se ke a hlwa a mo tshwenya.
2Ke moo kgoši a itšego go moprofeta Nathane: “Nnaena šefa ke dutše ka ngwakong wo o agilwego ka dikota tša mosedere, eupša Polokelo ya Kgwerano ya Modimo yona e beilwe ka tenteng!”
3Nathane a mo fetola a re: “Dira se o se gopotšego, ka gobane Morena o na le wena.”
4Eupša bošegong bjoo Morena a re go Nathane: 5“Sepela o yo botša Dafida, mohlanka wa ka, gore ke re go yena: ‘Ga se wena o tlago nkagela tempele ye ke tlago dula ka go yona. 6Go tloga ka nako yela ka go ntšha setšhaba sa Israele Egepeta go fihlela bjale, ga se ka ka ka dula ka tempeleng; ke raletše mo gohle ke le ka tenteng. 7Mesepelong ya ka ka moka le setšhaba sa Israele ga se ka ka ka botšiša yo mongwe wa baetapele ba ke bego ke ba bea badiši ba setšhaba sa ka gore ke ka lebaka lang ba sa nkagele tempele ka dikota tša mosedere.’
8“Ka gona botša Dafida, mohlanka wa ka, gore nna, Morena Ramaatlaohle, ke re go yena: ‘Ke go tšere o diša dinku madišong ka go bea mmuši wa setšhaba sa ka sa Israele. 9Ke bile nago mo gongwe le mo gongwe mo o ilego wa ya gona, mme ke fentše manaba a gago ka moka ge o a hlasela. Ke tla go dira gore o tume bjalo ka baetapele ba bagolo mo lefaseng. 10-11Ke kgethetše setšhaba sa ka sa Israele naga gomme ka se tsema go yona, moo se kago dula ntle le go hlwa se tšhošetšwa. E sa le go tloga mola ba tsenago mo nageng ye mehleng yela ya baahlodi ba gatelelwa ke batho ba babe, eupša seo se ka se hlwe se direga. Ke go holofetša gore ke tla dira gore manaba a gago ka moka a se sa go tshwenya, mme ka go fa ditlogolo. 12Ge o hlokafetše mme o bolokilwe le borakgolokhukhu ba gago, ke tla bea yo mongwe wa barwa ba gago kgoši mme ka tiiša mmušo wa gagwe. 13Ke yena yo a tlago nkagela tempele, gomme ke tla hloma bogoši bja lešika la gagwe ka bo dira gore e be bja neng le neng. 14Ke tla ba tatagwe, mme yena ya ba morwa wa ka. Ge a phoša ke tla mo otla bjalo ka tatagongwana ge a otla ngwana wa gagwe; ke tla šomiša batho go mo otla. 15Eupša nka se lese go mmotegela bjalo ka ge ke ile ka lesa go botegela Saulo, yoo ke mo tlošitšego gore wena o tle o be kgoši. 16O tla fela o na le ditlogolo, gomme ke tla dira gore mmušo wa gago e be wa neng le neng. Bogoši bjeno bo ka se tsoge bo fedile.’ ”
17Nathane o ile a botša Dafida tšohle tše Modimo a mo utolletšego tšona.
Thapelo ya Dafida ya tebogo
18Ke moka Kgoši Dafida a tsena ka Tenteng ya bodulo bja Morena, a dula fase mme a rapela a re: “Ga ke a swanela tše o šetšego o ntiretše tšona, Morena, Mong wa ka, le lona lapa la ka ga le a di swanela. 19Le ge go le bjalo, tšeo ga se ya ba selo mahlong a gago, Morena, Mong wa ka; o tšwetše pele o bolela tše botse tša mehleng ye e tlago mabapi le ditlogolo tša ka, nna, mohlanka wa gago. Tšeo ke taba tše kgolo bjang go ka di holofetša motho, Morena, Mong wa ka! 20Go feta moo a nka go botša eng? O a ntseba, nna, mohlanka wa gago. 21O dirile dilo tše kgolo tše ka gobane o be o nkholofeditše tšona, le ka gore o be o rata gore o nthute. 22Ka gona o yo mogolo bjang, Morena Yogodimodimo! Ga go yo a swanago le wena; go ya ka tšohle tše re di kwelego re a tseba gore ke wena o nnoši o lego Modimo. 23Ga go setšhaba se sengwe lefaseng se se swanago le sa Israele, se o se phološitšego bokgobeng go tlo se dira setšhaba sa gago. Dilo tše kgolo tše di tšhošago tše o ba diretšego tšona di go tumišitše. O lelekile ditšhaba tše dingwe le medimo ya tšona ge setšhaba sa gago se goroga, setšhaba se o se lokolotšego Egepeta gore e be sa gago. 24O dirile Baisraele setšhaba sa gago go ya go ile, gomme wena, Morena, wa ba Modimo wa bona.
25“Bjale, Morena Modimo, phethagaletša sa ruri tše o di boletšego mabapi le nna, mohlanka wa gago, le ditlogolo tša ka, gomme o dire se o boletšego gore o tla se dira. 26O tla tuma, gomme batho ka mehla ba tla re: ‘Morena Ramaatlaohle ke Modimo wa Israele.’ Gomme o tla boloka mmušo wa ka ka dinako ka moka. 27Morena Ramaatlaohle, Modimo wa Israele, ke na le sebete sa go go rapela ka thapelo ye ka gobane o nkutolletše taba tše ka moka, nna, mohlanka wa gago, gomme o mpoditše gore o tla dira ditlogolo tša ka dikgoši.
28“Bjale ge, Morena, Mong wa ka, ke wena Modimo; ka mehla o phetha dikholofetšo tša gago, gomme o nkholofeditše taba ye e makatšago ye. 29Ke go kgopela gore o šegofatše ditlogolo tša ka gore di fele di ipshina ka botho bja gago. Wena, Morena, Mong wa ka, o rile o tla di šegofatša, gomme tšhegofatšo ya gago e tla ba go tšona go ya go ile.”
