2 DIKGOŠI 6

₁Ka letšatši le lengwe sehlopha sa baprofeta se Elisha a bego a se okametše se ile sa tla go yena sa re: “Felo fa re dulago gona ke mo gonnyane kudu! ₂Re dumelele gore re ye Jordane, yo mongwe le yo mongwe wa rena a reme kota, re age felo mo re ka dulago gona.”

Elisha a ba fetola a re: “Go lokile.”

₃Yo mongwe wa bona a mo kgopela gore a ye le bona; a dumela, ₄gomme ba tloga mmogo. Ge ba fihla Jordane ba thoma go rema dikota. ₅Ya re ge yo mongwe wa bona a rema mohlare, selepe sa gagwe sa tshwamoga sa wela ka meetseng. A llela Elisha a re: “Joo, mong wa ka! Ke selepe sa go adingwa!”

₆Elisha a mmotšiša a re: “Na se wetše kae?”

Monna yoo a mo laetša felo fao, gomme Elisha a rema phata, a e lahlela ka moo meetseng mme a dira gore selepe se phaphamale. ₇Elisha a re: “Se ntšhe.” Monna yoo a obelela ka letsogo a se tšea.

₈Kgoši ya Siria e be e elwa le Baisraele. Ya boledišana le balaodi ba madira a yona gomme ya kgetha lefelo le e tlago hloma mešaša go lona. ₉Elisha a roma motho go kgoši ya Israele gore a e sebele gore e se ke ya feta felo fao, ka gobane Basiria ba be ba theogela gona. ₁₀Ka gona kgoši ya Israele ya sebela batho ba ba dulago moo, gomme ba dula ba phafogile. Elisha o ile a sebela kgoši makga a mmalwa.

₁₁Kgoši ya Siria ya befelwa kudu ka taba yeo; a bitša balaodi bale a ba botšiša a re: “Ke mang wa lena yo a emago le kgoši ya Israele?”

₁₂Yo mongwe wa bona a mo fetola a re: “Ga a gona, kgoši, mong wa ka! Ke moprofeta Elisha yo a lego Israele yo a botšago kgoši ya Baisraele se o se bolelago le ka phapošing ya gago ya go robala.”

₁₃Kgoši a re: “Sepelang le yo nyakišiša gore o kae, gomme ke tla romela banna go yo mo thopa.”

Ya re ge a botšwa gore Elisha o Dotane, ₁₄a romela madira a mantši fao ka dipere le makoloi a ntwa. Ba fihla motseng bošego mme ba o dikanetša. ₁₅Mosong wa le le latelago e sa le bošego mohlanka wa Elisha a tsoga, a tšwa ka ngwakong, gomme a bona madira a Basiria ka dipere le makoloi a bona a ntwa a dikaneditše motse. A boela go Elisha mme a kgotsa a re: “Joo, mong wa ka! A re ka dira eng?”

₁₆Elisha a mo fetola a re: “O se ke wa boifa. Re na le batho ba bantši ba ba emego le rena go feta ba ba emego le bona.” ₁₇Ke moo a rapetšego a re: “Hle, Morena, mo ponyolle mahlo mme a bone!” Morena a kwa thapelo ya gagwe, gomme mohlanka wa Elisha a bona thaba e tletše dipere le makoloi a ntwa a mollo go dikologa Elisha.

₁₈Ge Basiria ba hlasela, Elisha a rapela a re: “Hle, Morena, foufatša banna ba!” Morena a kwa thapelo ya gagwe gomme a ba foufatša. ₁₉Ke gona Elisha a itšego go bona: “Le tšere ka tsela ye e sego yona; wo ga se motse wo le o nyakago. Ntšhaleng morago mme ke tla le iša go monna yo le mo nyakago.” Gomme a ba iša Samaria.

₂₀Ge ba seno tsena motseng Elisha a rapela a re: “Ba bule mahlo, Morena, mme ba bone.” Morena a ba bula mahlo, a dira gore ba boele ba bone, gomme ba ikhwetša ba le ka gare ga motse wa Samaria.

₂₁Ya re ge kgoši ya Israele e bona Basiria, ya botšiša Elisha ya re: “Na ke ba bolaye, tate? Ke ba bolaye?”

₂₂Elisha a mo fetola a re: “Aowaa! Le bahlabani ba o ba thopilego ntweng ga o ba bolaye. Ba fe sa go ja le sa go nwa, mme o ba lese ba boele go kgoši ya bona.” ₂₃Ka gona kgoši ya Israele ya ba fa dijo tše ntši, gomme ge ba lle, ba nwele, a re ba gomele go kgoši ya bona. Go tloga tšatši leo Basiria ba se hlwe ba hlasela naga ya Israele.

₂₄Ka morago ga lebaka Kgoši Benhadade wa Siria a rapa madira a gagwe ka moka go yo lwa le Israele, gomme a dikanetša motse wa Samaria. ₂₅Ka lebaka la go dikanetšwa moo dijo tša hlokega kudu ka motseng moo e lego gore hlogo ya pokolo e be e rekwa ka dipapetlana tša silibera tše masome a seswai, mme dikramo tše makgolo a mabedi tša morole wa maeba di rekwa ka dipapetlana tše di fetšago seatla tša silibera.

₂₆Kgoši ya Israele e be e sepela godimo ga morako wa motse ge mosadi a goeletša a re: “Nthuše, kgoši, mong wa ka!”

₂₇Kgoši ya mo fetola ya re: “Ge Morena a sa go thuše, a nna nka go thuša ka eng? A ke na le mabele goba beine? ₂₈Molato ke eng?”

Mosadi a mo fetola a re: “Ka letšatši le lengwe mosadi yo o ile a re re je ngwana wa ka, mme re tle re je wa gagwe ka letšatši le le latelago. ₂₉Ka gona ra apea morwa wa ka ra mo ja. Ka le le latelago ka mmotša gore a tliše morwa wa gagwe re mo je, eupša o be a mo utile!”

₃₀Ya re ge kgoši a ekwa taba yeo, a gagola diaparo tša gagwe, a fela a sepela godimo ga morako, gomme batho ba kgona go bona gore o apere masaka ka gare. ₃₁A goa a re: “A Modimo a mpolaye thoo ge Elisha, morwa wa Shafate, a ka se ripše molala lehono!” ₃₂A napa a roma motseta go Elisha.

Elisha o be a le gae a na le bagolo ba bangwe ba ba bego ba mo etetše. Pele ga ge motseta wa kgoši a fihla, Elisha a re go bagolo bao: “Mmolai yola o romela motho yo mongwe gore a tle a mpolaye! Bjale, ge a fihla mo, le tswaleleng lemati mme le se ke la mo lesa a tsena. Kgoši ka boyena o mo šetše morago.” ₃₃O be a se a tšwa a fetša go bolela ge kgoši a fihla mme a re: “Ke Morena yo a re tlišeditšego bothatha bjo! Ke ka lebaka lang ke swanetše go fela ke mo letetše gore a dire se sengwe?”