2 JOHANESE 1

₁Nna, mogolo, ke ngwalela wena, mohumagadi yo a kgethilwego ke Modimo, wena le bana ba gago ba ke le ratago ruri. Gomme ga se nna fela ke le ratago, eupša le bohle ba ba tsebago nnete ya Modimo ba a le rata, ₂gobane nnete e dula mo go rena mme e tla dulela sa ruri.

₃Modimo le Jesu Kriste, Morwa wa Tate, ba tla re gaugela, ba re lokela, ba re fa khutšo, rena re phelago ka nnete le ka go ratana.

₄Ke ile ka thaba bjang ge mo baneng ba gago ke hwetša go na le ba ba phelago ka therešo, ka mo re lailwego ke Tatagorena. ₅Gomme ke a kgopela, wena mohumagadi, ke re: A re rataneng. Wo ga se molao wo mofsa wo ke go ngwalelago wona, ke molao wo re bilego le wona go tloga mathomong. ₆Lerato le ke la gore re phele ka go phetha ditaelo tša Modimo. Gomme taelo e sa le yona yela le e kwelego go tloga mathomong, e lego ya gore le phele ka go ratana.

₇Baradia ba bantši ba phaletše le lefase, bona ba ba sa dumelego gore Jesu Kriste o tlile e le motho. Motho wa mohuta woo ke yena moradia ebile ke yena molwalekriste. ₈Ka gona, le itlhokomele, gore le se lobe se re se šometšego, gore le tle le fiwe moputso wa lena ka botlalo.

₉Mang le mang yo a oketšago ka tša gagwe, a sa kgomarele thuto ya Kriste, ga a na Modimo; eupša yo a kgomarelago thuto ye o na le Tatagorena le Morwagwe. ₁₀Ka fao, yo a kago tla go lena a sa tliše thuto ye, le se mo amogele ka magaeng a lena; le go mo dumediša le se mo dumediše. ₁₁Gobane yo a kago mo dumediša o ikopanya naye medirong ya gagwe ye mebe.

₁₂Ke sa na le ditaba tše dintši tše nka le ngwalelago tšona, eupša ga ke rate go le botša tšona ka lengwalo; ke holofela gore ke tla le etela, ka tla ka le botša tšona ka molomo, gore lethabo la rena e tle e be le le tletšego.

₁₃Bana ba kgaetšedi ya gago yo a kgethilwego ke Modimo ba re o dumele.