Paulose o sola baapostola ba bofora
1Nke nkabe le nkgotlelela, le ge ke bontšha botlaejana. Hle, nkgotleleleng! 2Ke le fišegela bjalo ka Modimo; ke le swantšha le kgarebe ye e se nago bosodi, ye ke e beeleleditšego monna o tee, yena Kriste ka sebele. 3Se ke se šiago ke gore le ka senywa megopolo la ba la se sa botegela Kriste gabotse, la etša Efa mola a tla forwa ke noga ka mahlajana a yona. 4Gobane ge motho yo mongwe a etla a le ruta tša Jesu tše di fapanago le tše le di rutilwego ke rena le mo kgotlelela gabotse. Le amogela moya go yena wo le sa kago la o amogela go rena. Le gona le amogela Ebangedi ye a e begago ye e fapanago le ye le e amogetšego go rena.
5Gape nna ga ke bone ke phalwa ke baapostola bao ba go ba bommakaipea. 6Le ge polelo ke sa e kgone, tsebo yona ga ke e hloke; taba ye re le lemošitše yona nakong yohle le ka mekgwa yohle.
7Ga se nke ka le lefiša selo mola ke le begela Taba ye Botse ya Modimo; ke ile ka ikokobetša gore go godišwe lena. Kgane ke be ke foša? 8Mola ke le šomela bjalo ke be ke lefša ke diphuthego tše dingwe. Ke setšha ke be ke di hlakola. 9Mola ke dula le lena ke hloka, le gona ga se nke ka imetša motho, gobane tšohle tše ke bego ke di hloka ke ile ka di fiwa ke badumedikanna ba go tšwa Matsedonia. Ke mo ke ilego ka ithiba, mme ke tla no fela ke ithiba gore ke se le imetše ka selo. 10Ke ikana ka therešo ya Kriste ye e lego mo go nna gore mo gohle dinageng tša Agaya ga go yo a kago nthibela ge ke kgantšha taba tše. 11Ka lebaka lang? Kgane ke ka lebaka la gore ga ke le rate? Modimo yena o a tseba gore ke a le rata.
12Se ke se dirago bjale ke tla no fela ke se dira, gore ba ba nyakago lebaka la go kgantšha le go bolela gore ba dira tša go swana le tše di dirwago ke nna ba le hloke. 13Gobane batho bao ke baapostola ba maaka, ke badiri ba boradia ba ba itirago tše nkego ke baapostola ba Kriste. 14Fela ga go makatše, gobane Sathane ka boyena o tle a itire tše nkego ke morongwa wa seetša. 15Ka gona, ga se semaka ge bahlanka ba gagwe ba itira tše nkego ke bahlanka ba toka. Mafelelong ba tla dirwa se se swanelago mediro ya bona.
Paulose o kgantšha go tlaišwa ga gagwe
16Ke a boeletša ke re: Go se be le yo a mponago botlaela. Fela le ge e le gore le mpona bjalo, le upše le amogele botlaela bja ka, gore le nna ke ithete gosenene. 17Tše ke di bolelago tše ga se tše ke di laetšwego ke Morena. Tabeng ye ya go itheta ke bolela tša botlaela. 18Eupša ka ge ba bantši ba itheta ka tša nama, le nna ke nyaka go itheta bjalo. 19Gobane lena ba bohlale, le kgotlelela ditlaela gabotse. 20Etse le kgotlelela yo a le dirago bahlanka, goba yo a le hlalefetšago, goba yo a le radiago, goba yo a le nyatšago, goba yo a le fapholago sefahlegong. 21Ke bolela ka dihlong ge ke re dilo tšeo re be re se na sebete sa go di dira.
Fela ge eba go na le yo a kago beta pelo a itheta – ke bolela tša botlaela – gona le nna ke tla beta pelo ka itheta. 22Ge ba re re Baheberu, le nna ke re ke Moheberu. Ge ba re re Baisraele, le nna ke realo. Ge ba re re ditlogolo tša Abrahama, le nna ke re ke sona. 23Ge ba re re bahlanka ba Kriste – ke bolela tša bogafi – nka re ke a ba phala. Ke ba phadile ka go šoma gaboima, ka go ya kgolegong gantši, ka go otlwa ka tshelane kudu, ka go ba kotsing ya lehu gantši. 24Ke gahlano ke otlwa ke Bajuda kotlo ye e tlwaelegilego ya dithupa tša masome a mararo le tše senyane, 25ke gararo ke bethwa ka patla, ke gatee ke bethwa ka maswika, ke gararo ke robegelwa ke leselawatle, gomme nkile ka fetša bošego le mosegare ka garegare ga lewatle. 26Mo maetong a ka a mantši ke bile kotsing ya dikgogola, kotsing ya bahlakodi, kotsing ya setšhaba sa gešo, kotsing ya baditšhaba, kotsing ka metseng, kotsing lešokeng, kotsing lewatleng, le kotsing badumeding ba maaka. 27Ke itapišitše ka go šoma kudu, ke gantši ke lala ke sa robale, ke ehlwa ka tlala le lenyora; ke gantši ke hloka dijo; ke be ke bolawa ke phefo, ke hlaelelwa ka diaparo. 28Ntle le tše dingwe tše ke sa di balego, ka mehla ke imelwa ke go balabala ka diphuthego ka moka. 29Ge yo mongwe a fokola, le nna ke fokola naye; ge yo mongwe a dirišwa sebe, le nna ke a galefa.
30Ge eba go itheta go swanetše, nna ke tla itheta ka tše di bontšhago bofokodi bja ka. 31Modimo, yena Tatago Morena Jesu Kriste, yo a tumišwago go ya go ile, o a tseba gore ga ke bolele maaka. 32Mola ke le Damaskose, mmušiši wa Kgoši Aretase o ile a ntalela ka baleti lesorong la motse gore ba ntshware. 33Eupša ka mo tšwa ka diatleng ka go theošwa ka šešegwana lešobaneng la morako.
